Европа
Претседателот на Чешка: Русите се луди, на Путин да му се суди
Чешкиот претседател Милош Земан, кој до нападот на Украина тврдеше дека „Русите не се луди да го прават тоа сега“, истакна дека „очигледно се луди“.
Тој рече дека агресијата врз Украина е и директен напад на руските власти врз самата Русија.
„Затоа зборував за лудило. Ова не е најлоша одбрана на руските национални интереси. Најлошото е што Русија со оваа операција ја уништува не само Украина туку и самата себе“, рече Земан во интервјуто објавено денеска од чешкиот дневен весник „Млада Фронта“.
Милош Земан призна дека се излажал во врска со рускиот претседател Владимир Путин затоа што на почетокот изгледал како полудемократ, но се случило да ја изгуби самоконтролата со текот на годините на власт и да биде изведен пред лицето на правдата за убиство на цивили во Украина.
„Секој шеф на држава ги брани националните интереси на таа земја, но, за жал, во овој случај агресијата не е само директен напад на Украина туку и на Русија. Да, тоа е ирационално. Пред неколку дена објавив барање одговорните за убиствата на цивилите во Украина да бидат изведени пред меѓународниот суд. И мислам дека тоа ќе се случи порано или подоцна“, рече Земан, додавајќи дека и рускиот претседател треба да биде изведен пред лицето на правдата.
Земан призна дека долго време е поборник за коректни односи со Руската Федерација.
„Меѓу другото, бидејќи тие се важен снабдувач на енергија. Од друга страна, постојат вредности, како што се човечките животи, кои сè уште се над бизнисот. Па токму затоа го сменив мојот став. Таа промена почна неколку часа по руската агресија“, рече Земан.
Чешкиот претседател ги поддржа пратките на стари советски тенкови и борбени возила од чешките магацини во Украина, како и дополнително оружје, бидејќи верува дека тоа може значително да им помогне на Украинците во одбраната.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.