Свет
(Видео) Пукање во седиштето на „Јутјуб“, познат идентитетот на осомничената за нападот
Најмалку четири лица се повредени во пукањето во зградата на седиштето на „Јутјуб“ во калифорнискиот град Сан Бруно. Жената што е осомничена за нападот е мртва, објави Си-ен-ен. Началникот на полицијата на Сан Бруно, Ед Барберини, за новинарите изјави дека осомничената била пронајдена мртва, со прострелна рана од огнено оружје, што укажува на самоубиство.
Според информациите што ги пренесоа американските медиуми, напаѓачката е идентификувана како 39-годишната Насим Агдам, жителка на Сан Диего. Податоците покажуваат дека таа била активист и учествувала во протести за правата на животните. „За мене, правата на животните се еднакви на човековите права“, ја пренесуваат медиумите нејзината изјава од 2009 година.
Во нападот биле повредени четири лица, од кои тројца со прострелни рани и тие биле однесени во локалните болници.
Исмаил Агдам, татко на жената осомничена за вооружениот напад, изјавил оти таа била лута бидејќи компанијата престанала да плаќа за видеата што ги објавувала на интернет-платформата.
Тој додал дека ја предупредил полицијата дека ќерка му можеби ќе отиде во зградата на „Јутјуб“ бидејќи, едноставно, ја мразела компанијата. Навел дека ќерката ја пријавил за исчезната во понеделникот бидејќи таа не одговорила на неговите телефонски повици претходините два дена.
Според сведочењето што го пренесе Си-ен-ен, жената пукала за време на ручекот на вработените и тоа кон определено лице во градината на ресторанот за вработените во „Јутјуб“.
Белата куќа изјави дека претседателот на САД, Доналд Трамп, бил информиран за нападот во седиштето на „Јутјуб“. Локална телевизија објави снимки што покажуваат како вработените со подигнати раце ја напуштаат зградата.
Познатата интернет-платформа „Јутјуб“ е во сопственост на „Гугл“, од каде што објавија дека соработуваат во истрагата за овој инцидент и дека подоцна ќе објават подетаљни информации. Инаку, во седиштето на „Јутјуб“ работат околу 1.700 луѓе.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во Индија почнаа изборите, кои ќе траат шест недели, а ќе гласаат речиси 970 милиони
Денеска, почнаа најобемните избори во светот, а речиси 970 милиони регистрирани гласачи во Индија учествуваат во овој огромен процес, кој ќе се одвива во седум фази и ќе трае дури шест недели.
Премиерот Нарендра Моди се надева дека ќе освои трет последователен мандат во земјата со 1,4 милијарда жители. Гласачите, всушност, не го избираат директно премиерот, туку 543-те пратеници на Лок Сабха, долниот дом на парламентот на најнаселената земја во светот, објави „Дојче веле“.
На натпреварот учествуваат шест национални партии, 57 партии од индиските сојузни држави и 2.597 помали партии. Сепак, главната трка ќе биде меѓу двете најголеми политички партии во Индија: владејачката Индиска народна партија (БЈП) и опозицискиот Индиски национален конгрес (ИНЦ) или скратено Конгресната партија.
За да се спротивстави на владејачката БЈП и премиерот Моди, Конгресната партија формира сојуз од 28 партии, наречен Индиски национален развој – инклузивен сојуз.
Според анкетите, премиерот Моди и неговата хинду-националистичка БЈП се очекува да победат на изборите оваа година.
Моди е популарен лидер, делумно благодарение на агендата насочена кон хинду-мнозинството во Индија, кое сочинува 80 отсто од населението.
Свет
Русија повика на воздржаност помеѓу Израел и Иран
Русија повика на воздржаност по информациите за напад на Израел врз Иран.
Портпаролот на Кремљ, Дмитриј Песков, изјави денеска за новинарите дека Русија ги проучува деталите за нападот и дека ќе го коментира кога ќе се разјасни неговата природа.
„Во секој случај, без разлика на сѐ, продолжуваме да се залагаме за воздржаност од двете страни за да нема дејства што би предизвикале натамошна ескалација на тензиите во регионот“, рече Песков.
Русија и Иран имаат блиско партнерство. За време на инвазијата на Украина, Москва користи беспилотни летала „Шахед“ од иранско производство.
Свет
(Видео) Туристи малтретирале мечиња за селфи, па ги фатила полиција во Северна Каролина
Во станбен комплекс во округот Бункомб, Северна Каролина, шест лица се снимени како влечат мали мечиња од гранките на дрвото за кои се држеле, а сè со цел да позираат за фотографија. Шестемина ги тегнеле двете мечиња, а едното дури им испаднало од рацете во текот на снимањето.
Кога снимките од инцидентот стигнале до експертите што се занимаваат со заштита на дивите животни, тие веднаш излегле на терен и повикале полиција. Меѓу нив бил и биологот Ешли Хобс, која за „Еј-би-си 13 њуз“ рекла дека кога пристигнала до дрвото каде што луѓето се фотографирале, пронашла само едно мече. Целото било влажно и смрзнато, па било дадено на човечка грижа и нега за да закрепне. Поради тоа, сосема е можно никогаш да не може да се вратат во дивината бидејќи мечките што растат со луѓе потоа не сакаат да ги напуштат. Неверојатно, но можно е некој да ѝ го уништил животот на мечката само за да добие убава фотографија за социјалните мрежи.
„Мечето преживеа големо трауматско искуство. На луѓето што го направија тоа им објаснивме колку е неодговорно и потенцијално смртоносно за мечето да се одвои од мајка си, а особено на овој начин да го влечат од дрвото“, рекла Хобс, пренесува „Унилад“.
По објавувањето на видеото, многумина се згрозиле од она што го направиле овие луѓе. За сето тоа морало да разговараат и со полицијата.