Европа
Рекорден број на смртни случаи од дрога во Шкотска
Бројот на смртни случаи од дрога во Шкотска пораснал за 27 отсто во 2018 година, кога се забележани рекордни 1.187 смртни случаи како последица од консумирање наркотици, покажа извештајот на шкотскиот Завод за статистика.
Консумирање хероин, морфиум, метадон, кодеин, земање на еден или повеќе видови опојни средства се наведени како причина за смрт кај 1.021 лице или кај 86 проценти од вкупниот број смртни случаи како последица од земање дрога.
Стапката на смртност е трипати повисока отколку за цела Велика Британија и највисока на ниво на цела Европска Унија.
Според податоците на Заводот за статистика, најголем дел од починатите се мажи – 72%, лица на возраст од 35-44 години. Најголем дел од починатите се во Глазгов, 33%.
„Овие податоци се шокантни. Неопходно е оваа трагедија да се третира како прашање на јавното здравје и подготвени сме да преземеме иновативни и смели мерки“, изјави шкотскиот министер за здравство, Џо Фицпатрик.
„Овие статистички податоци не одговараат на едно од најбогатите општества во Европа“, коментира Розан Макласки, шефица на здружението Addaction, кое се бори против зависноста од дрога.
„Треба да престанеме кривично да ги гониме луѓето кои користат дроги и да ги поврземе со службите за лекување. Поддржувам заеднички простории за наркозависниците“, додала таа.
Повеќе шкотски политичари се заложија за одредување простории за консумирање дрога со лекарски надзор, но во таква мерка не верува британската конзервативна влада, која ја одредува политиката во врска со дрогата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Писториус: Русија произведува повеќе оружје отколку што и е потребно за војната во Украина
Германскиот министер за одбрана Борис Писториус тврди дека Русија произведува повеќе оружје отколку што и е потребно за да ја продолжи својата специјална воена операција во Украина.
Во интервју за телевизијата „АРД“, тој беше прашан дали го дели стравот на балтичките земји дека Русија ќе може да ја нападне територијата на НАТО за неколку години, тој одговори дека нема кристална топка за да ја предвиди иднината, пренесе ТАСС.
„Но, она што го велат воените експерти и специјалистите за оружје е дека Русија го зголемува производството на оружје“, рече тој.
Писториус истакна дека поголемиот дел од произведеното не се испраќа на фронт, туку оди во магацини. Според германскиот министер за одбрана, во случај на ескалација ќе биде вклучено целото НАТО.
„Во тој случај треба да можеме да се одбраниме, да водиме војна која ќе ни биде наметната. Затоа не штедиме напори за соодветно опремување на вооружените сили во Европа, во НАТО“, додаде тој.
Европа
Повеќе од сто килограми кокаин пронајдени меѓу банани во супермаркети во Германија
Вработени во неколку германски супермаркети во Берлин и Бранденбург откриле повеќе од 100 килограми кокаин во пакувања со банани, пренесува „Билд“ повикувајќи се на полициски извори.
Во Бранденбург, како што се наведува, во најмалку четири продавници биле пронајдени меѓу 20 и 100 килограми кокаин, пренесува „Танјуг“.
Полицијата во моментот спроведува истрага со проверка на стоката во продавниците поради што сѐ уште не се знае конечната количина дрога во нив, но не и информацијата во колку продавници има.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.