Свет
Ричард: Кина развива нуклеарно оружје многу побрзо од САД
Шефот на американската стратешка команда, адмирал Чарлс Ричард, предупреди дека Кина развива нуклеарно оружје многу побрзо од САД, пренесува Си-Ен-Ен.
Пентагон со години предупредува за военото зајакнување на Кина и развој на нуклеарно оружје, но изјавата на Ричард ја прикажува ситуацијата како многу посериозна отколку што другите американски претставници јавно ја слушнале претходно, според американската телевизија.
На состанокот затворен за јавноста, тој способноста за одвраќање на САД во однос на Кина ја спореди со брод што полека тоне.
„Полека тоне, но тоне бидејќи во основа тие ги распоредуваат капацитетите на теренот побрзо од нас“, рече шефот на командата што ја надгледува американската програма за нуклеарно оружје.
Ричард го нарече развојот на кинеската програма за нуклеарно оружје „краткорочен проблем“.
„Поради начинот на кој тие продолжуваат да се движат, нема да биде важно колку е добар нашиот оперативен план или колку се добри нашите команданти или колку се добри нашите сили, нема да имаме доволно од нив. И тоа е многу краткорочен проблем“, рече Ричард според соопштението од Министерството за одбрана на САД.
Администрацијата на американскиот претседател Џозеф Бајден постојано ја нарекува Кина главен глобален конкурент на САД и предупредува на развојот на нивните воени програми и програми за нуклеарно оружје, според серија политички документи поврзани со одбранбената и воената стратегија на САД објавени на крајот на октомври, пренесува Си-Ен-Ен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Емануел Макрон: Постои ризик Европа да умре
Францускиот претседател Емануел Макрон за време на говорот на Универзитетот „Сорбона“ во Париз изјави дека постои ризик Европа да умре.
Макрон истакна дека битката за изградба на силна Европа е далеку од завршена и ризикува да заостане зад светските ривали во наредната деценија, пренесува „Ројтерс“.
Европа, како што оцени Макрон, е на пресвртна точка и мора да стори повеќе за да се натпреварува со забрзаното вооружување на своите глобални ривали.
Свет
Хамас: Ќе станеме политичка партија ако се формира палестинска држава
Заменик-претседателот на политбирото на Хамас за Газа, Калил ал-Хаја, рече дека палестинската милитантна група е подготвена да се договори за петгодишно примирје со Израел и да се претвори во политичка партија доколку се формира палестинска држава со границите од 1976 година.
Ал Хаја, претставник на Хамас во преговорите за прекин на огнот и враќање на заложниците, рече дека групата ќе прифати „целосно суверена палестинска држава на Западниот брег и Појасот Газа и враќање на палестинските бегалци во согласност со меѓународните резолуции“.
Во интервју за „Асошиетед прес“ тој додаде дека во тој случај военото крило на Хамас ќе биде распуштено.
„Сите искуства на луѓето што се бореле против окупаторите, кога се осамостоија и ги освоија своите права и својата земја, се претворија во политички партии, а нивните борбени сили се претворија во национална армија“, рече тој.
Тој оцени дека долго најавуваната израелска копнена офанзива во градот Рафа нема да го победи Хамас.
Свет
Погодена железница во Украина, оштетен и облакодер: Русите нападнаа со моќниот „Искандер“
Руски проектил оштети критична инфраструктура и повреди шест лица во регионот Черкаси во централна Украина, изјави регионалниот гувернер.
Во нападот беше погодена цивилната и железничката инфраструктура во градот Смила, изјави портпаролот на украинските воздухопловни сили, Илја Јевлаш, во телевизиски пренос. Според првичните информации, во нападот бил употребен проектил „Искандер-К“, додаде Јевлаш.
Оштетени се и 47 приватни станбени згради и искршени се прозорци во станбена висококатница, објави на „Телеграм“ гувернерот на Черкаси, Ихор Табурец. Украинската воздушна одбрана ја собори воздушната цел, рече тој, додавајќи дека службите за итни случаи се на терен.
Руските сили претходно ја оштетија железничката инфраструктура во нападот на реонот на Днепар на 19 април, како што објавија украинските железници „Укрзализница“ на „Телеграм“.