Свет
„Ројтерс“: Помошникот на Путин склучил договор со Киев пред војната, Путин го одбил
„Ројтерс“ утринава објави ексклузива дека главниот пратеник на Владимир Путин за Украина му рекол на рускиот лидер кога почна војната дека склучил привремен договор со Киев што ќе го задоволи барањето на Русија Украина да остане надвор од НАТО, но Путин одбил и продолжил со својот план.
Се известува дека, според тројца луѓе блиски до руското раководство, пратеникот со украинско потекло Дмитри Козак му рекол на Путин дека верува оти договорот што го постигнал ја отстранил потребата Русија да продолжи со својата голема окупација на Украина. „Ројтерс“ е првиот што известува за препораката на Козак до Путин да го усвои договорот.
Путин во неколку наврати пред војната тврдеше дека НАТО и неговата воена инфраструктура се приближуваат до границите на Русија со прифаќање нови членки од Источна Европа и дека алијансата сега се подготвува да ја воведе и Украина. Путин јавно кажа дека ова е егзистенцијална закана за Русија, што го принуди да реагира.
Но, и покрај неговата претходна поддршка за разговорите, Путин јасно стави до знаење кога му беше претставен договорот на Козак дека отстапките за кои преговараше неговиот помошник не одеа доволно далеку и дека тој ги прошири своите цели на анексија на делови од украинската територија, велат изворите. Договорот беше отфрлен, а на 24 февруари Русија изврши инвазија.
Прашан да ги коментира наодите на „Ројтерс“, портпаролот на Кремљ Дмитриј Песков рече: „Тоа нема апсолутно никаква врска со реалноста. Такво нешто никогаш не се случило. Тоа е апсолутно неточна информација“.
Треба да се напомене дека во ноември 2021 година, Песков ги опиша обвинувањата дека Русија се подготвува да ја нападне Украина како „шуплива и неоснована“ измислица од западните медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во Индија почнаа изборите, кои ќе траат шест недели, а ќе гласаат речиси 970 милиони
Денеска, почнаа најобемните избори во светот, а речиси 970 милиони регистрирани гласачи во Индија учествуваат во овој огромен процес, кој ќе се одвива во седум фази и ќе трае дури шест недели.
Премиерот Нарендра Моди се надева дека ќе освои трет последователен мандат во земјата со 1,4 милијарда жители. Гласачите, всушност, не го избираат директно премиерот, туку 543-те пратеници на Лок Сабха, долниот дом на парламентот на најнаселената земја во светот, објави „Дојче веле“.
На натпреварот учествуваат шест национални партии, 57 партии од индиските сојузни држави и 2.597 помали партии. Сепак, главната трка ќе биде меѓу двете најголеми политички партии во Индија: владејачката Индиска народна партија (БЈП) и опозицискиот Индиски национален конгрес (ИНЦ) или скратено Конгресната партија.
За да се спротивстави на владејачката БЈП и премиерот Моди, Конгресната партија формира сојуз од 28 партии, наречен Индиски национален развој – инклузивен сојуз.
Според анкетите, премиерот Моди и неговата хинду-националистичка БЈП се очекува да победат на изборите оваа година.
Моди е популарен лидер, делумно благодарение на агендата насочена кон хинду-мнозинството во Индија, кое сочинува 80 отсто од населението.
Свет
Русија повика на воздржаност помеѓу Израел и Иран
Русија повика на воздржаност по информациите за напад на Израел врз Иран.
Портпаролот на Кремљ, Дмитриј Песков, изјави денеска за новинарите дека Русија ги проучува деталите за нападот и дека ќе го коментира кога ќе се разјасни неговата природа.
„Во секој случај, без разлика на сѐ, продолжуваме да се залагаме за воздржаност од двете страни за да нема дејства што би предизвикале натамошна ескалација на тензиите во регионот“, рече Песков.
Русија и Иран имаат блиско партнерство. За време на инвазијата на Украина, Москва користи беспилотни летала „Шахед“ од иранско производство.
Свет
(Видео) Туристи малтретирале мечиња за селфи, па ги фатила полиција во Северна Каролина
Во станбен комплекс во округот Бункомб, Северна Каролина, шест лица се снимени како влечат мали мечиња од гранките на дрвото за кои се држеле, а сè со цел да позираат за фотографија. Шестемина ги тегнеле двете мечиња, а едното дури им испаднало од рацете во текот на снимањето.
Кога снимките од инцидентот стигнале до експертите што се занимаваат со заштита на дивите животни, тие веднаш излегле на терен и повикале полиција. Меѓу нив бил и биологот Ешли Хобс, која за „Еј-би-си 13 њуз“ рекла дека кога пристигнала до дрвото каде што луѓето се фотографирале, пронашла само едно мече. Целото било влажно и смрзнато, па било дадено на човечка грижа и нега за да закрепне. Поради тоа, сосема е можно никогаш да не може да се вратат во дивината бидејќи мечките што растат со луѓе потоа не сакаат да ги напуштат. Неверојатно, но можно е некој да ѝ го уништил животот на мечката само за да добие убава фотографија за социјалните мрежи.
„Мечето преживеа големо трауматско искуство. На луѓето што го направија тоа им објаснивме колку е неодговорно и потенцијално смртоносно за мечето да се одвои од мајка си, а особено на овој начин да го влечат од дрвото“, рекла Хобс, пренесува „Унилад“.
По објавувањето на видеото, многумина се згрозиле од она што го направиле овие луѓе. За сето тоа морало да разговараат и со полицијата.