Свет
Русија го смета затворено прашањето за Курилските Острови
Јапонија мора да разбере дека Русија смета оти прашањето за Курилските Острови е затворено и да се соочи со фактот дека рускиот премиер Михаил Мишустин е во посета на руска територија, изјави за ТАСС потпретседателот на Комисијата за надворешни работи на Советот на Руската Федерација, Владимир Џабаров.
Претходно, јапонското Министерство за надворешни работи го повика рускиот амбасадор во Јапонија, Михаил Галузин, за да изрази протест за посетата на Мишустин на островот Итуруп.
„Нашиот премиер патува низ руска територија што е неотуѓива од Русија. Тој стори сé во согласност со Уставот и не ни треба дозвола од друга земја за да ја посетиме сопствената територија. Мислам дека Јапонците треба да имаат помирен став кон ова. Тие мора да сфатат дека Русија го смета прашањето околу островите за затворено“, нагласи Џабаров.
Тој посочи дека Русија повеќе пати ги повикувала Јапонците на економска соработка на островот, а Москва е заинтересирана за тоа.
„Тоа ќе биде од корист и за Јапонија и за Русија и ќе биде подобро отколку да се обидуваат да ги направат островите дел од Јапонија за американски бази да може да се појават таму следниот ден. Јапонците никогаш не го криеја тоа. Тие се под американскиот ракетен чадор и овие острови ќе беа предадени за распоредување на американски бази. Ова прашање не е предмет на дискусија за Русија“, повтори тој.
Во понеделникот, Мишустин ја започна работната посета на Далечниот Исток на Русија и Сибир. Неговото патување започна со посета на Итуруп, кој е дел од Курилските Острови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Пентагон испраќа милијарда долари воена помош за Украина
Пентагон е подготвен брзо да испрати пакет воена помош од милијарда долари за Украина, изјавија неколку американски претставници, додека горниот дом на американскиот Конгрес ја започнува расправата за долгоочекуваниот нацрт-закон за финансирање на Украина и другите сојузници на САД, којa веќе го помина долниот дом.
Членовите на Конгресот беа длабоко поделени околу средствата, поради што претседателот на Претставничкиот дом, Мајк Џонсон, формираше сојуз од двете водечки партии за усвојување на законот.
Пакетот за странска помош од 95 милијарди долари беше усвоен од Претставничкиот дом во саботата, а денеска или утре се очекува одобрување од Сенатот.
Од вкупниот пакет помош околу 61 милијарда долари се наменети за Украина.
Регион
(Видео) Атина прекриена со сахарска прашина, нереални сцени во градот
Атина и јужните делови на земјата повторно беа обвиени со сахарска прашина, со нијанси на жолта и портокалова боја што создава нереална атмосфера во градот.
Облаци од прашина, пренесени преку Средоземното Море од Северна Африка, го обвиле Акропол и другите знаменитости на Атина, пишува „АП“.
Силните јужни ветрови носеа прашина од Сахара, па во последните часови од денот грчката престолнина изгледаше како да е користен филтер за фотографирање, пренесува Euronews.
🚨🇬🇷
HAPPENING NOW
The sky is totally orange over Athens, Greece
— Alex Barnicoat (@mrbarnicoat) April 23, 2024
Во среда се прогнозира разведрување на небото со поместување на ветровите и поместување на прашината и опаѓање на температурите.
Дневниот максимум во делови од јужниот остров Крит надмина 30 степени Целзиусови, повеќе од 20 степени Целзиусови над она што беше забележано во поголемиот дел од северна Грција.
Корисниците на социјалната мрежа Икс објавија видеа од необична „портокалова“ појава од територијата на цела Атина.
Веста за Атина во „портокалово“ многу брзо се прошири низ светските медиуми, а видеата ги споделија и профили на социјалните мрежи кои се занимаваат со глобални актуелни вести.
Свет
Уапсен заменикот на Сергеј Шојгу, осомничен е за примање мито
Рускиот заменик министер за одбрана Тимур Иванов е приведен под сомнение дека примил поткуп, соопштиРускиот истражен комитет.
„Заменик-министерот за одбрана на Русија, Тимур Владимирович Иванов, е приведен поради сомнение дека сторил кривично дело примање поткуп“, се наведува во соопштението објавено на каналот Телеграм на Истражниот комитет, пренесува РИА.
Во 2012 година, Иванов беше вицепремиер на Московскиот регион.
Од 2013 до 2016 година, тој беше генерален директор на АД Оборонстрој.
Во мај 2016 година со претседателски указ е назначен за заменик министер за одбрана.