Свет
Русија призна присуство на радиоактивни материјали при експлозијата во воената база
По дводневен молк, Русија денеска призна дека експлозијата која во четвртокот се случи во база за лансирање на проектили на далечниот север на земјата, имала нуклеарни карактеристики и ја зголеми официјалната бројка на жртви на петмина загинати.
Во соопштение, руската нуклеарна агенција „Росатом“ објави дека во експлозијата загинале петмина членови од нивниот персонал и дека три лица претрпеле изгореници, пренесува хрватски „Индекс“.
„Росатом“ прецизираше дека негов персонал обезбедувал техничка поддршка за „изотопски извор на енергија“ на моторот на проектилот, додека пак војската не спомена нуклеарно гориво во врска со несреќата.
Во соопштението на „Росатом“ на кое се повикаа и неколку руски медиуми се наведува дека несреќата се случила на поморска платформа и дека од силата на експлозијата неколку работници биле исфрлени во морето.
„Ги баравме додека имаше надеж дека ќе ги најдеме живи. Сега објавуваме дека загинати се петмина соработници на ‘Росатом’“, се вели во соопштението.
Веднаш по несреќата, руското министерството за одбрана изјави дека се случила експлозија при тестирање на мотор на проектил со течен погон и дека двајца стручњаци им подлегнале на повредите. До денеска не е јасно дали петте мртви што ги спомнува „Росатом“ ги вклучуваат и овие двајца стручњаци.
Властите досега објавија малку детали за несреќата во базата која инаку е отворена во 1954 година и е специјализирана за тестирање на проектили на руската флота и балистички ракети.
Руската војска и портпаролот на регионалниот гувернер во четвртокот соопштија дека нема радиоактивно загадување, но градската администрација на Северодвинск, град со 190.000 жители на 30 километри од базата, на својата веб-страница наведе дека регистрирано е краткорочно зголемување на радиоактивноста.
Објавата потоа беше тргната од интернет страницата на градското собрание, иако во истата не беше прецизирано до кој степен се зголемила радиоактивноста.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
За европските избори во Хрватска беа пријавени 25 листи, осум помалку од 2019 година
Државната изборна комисија (ДИК) до крајниот рок доби 25 кандидатски листи за европските избори во Хрватска, што е за осум помалку од 2019 година.
Во недела на 9 јуни ќе се одржат избори за Европскиот парламент во Хрватска, а ќе се изберат 12 европратеници со мандат од пет години.
Со поднесување на списокот и официјално започнува изборната кампања која ќе трае до 7 јуни кога ќе започне изборниот молк.
Европските избори во Хрватска се втор изборен циклус годинава, по парламентарните избори одржани на 17 април, а на крајот на годината ќе се одржат и претседателските избори.
Свет
Моќната сестра на севернокорејскиот лидер: Ќе изградиме супериорна воена сила
Ким Јо Џонг, моќната сестра на севернокорејскиот лидер Ким Џонг Ун, рече дека земјата ќе продолжи да гради супериорна и најмоќна воена сила за да го заштити својот суверенитет и регионалниот мир, објави севернокорејската новинска агенција КЦНА.
Ким рече дека серијата воени вежби на американската војска во регионот оваа година, почнувајќи со вежби спроведени со „јужнокорејски марионетски воени гангстери“, опасно ја нарушуваат регионалната безбедносна средина.
„Ќе продолжиме да ја градиме најголемата и најмоќната воена сила за заштита на нашиот суверенитет, безбедност и регионален мир“, ја цитираше КЦНА нејзината изјава.
Војските на САД и Јужна Кореја во последните месеци спроведоа серија големи и интензивни вежби, а лидерите на двете земји ветија дека ќе ја подобрат борбената готовност против воените закани на Северна Кореја.
Околу 100 воени авиони извршија двонеделни воздушни вежби овој месец, соопшти јужнокорејската војска.
Северна Кореја вели дека американските воени вежби се подготовки за нуклеарна војна против неа. Вашингтон и Сеул велат дека вежбите имаат одбранбен карактер и се спроведуваат редовно за да се одржи подготвеноста.
Свет
Израел: Нашата армија не ги закопа Палестинците во масовна гробница во Газа
Телата откриени во масовна гробница во Појасот Газа не биле закопани од израелски војници, туку од Палестинци, соопшти израелската амбасада во Женева.
„Тврдењето дека израелските одбранбени сили (ИДФ) закопале палестински тела е неосновано“, соопшти амбасадата.
„Војниците само ги прегледале телата во гробницата во потрага по израелски заложници, се почитувало достоинството на загинатите, а телата на Палестинците биле вратени на истото место“, се додава во соопштението.
„Прегледот беше извршен внимателно и исклучиво на места каде разузнавачките информации укажуваа на можно присуство на заложници“, соопшти амбасадата.
Палестинскиот тим за цивилна одбрана во Газа извести дека масовна гробница со 283 тела била откриена во близина на болницата Насер во градот Кан Јунис на југот од енклавата.
Според канцеларијата на високиот комесар на ОН за човекови права Фолкер Турк, кој ја повика цивилната одбрана, на некои тела им биле врзани рацете.