Свет
Руси што војувале во Украина за регрутацијата: „Сите ќе загинат таму“
Руските регрути, чија мобилизација неодамна ја најави претседателот Владимир Путин, се испраќаат директно на фронтот, без никаква обука или медицински прегледи, се наведува на канал на „Телеграм“.
„Новите регрути не учествуваат во вежби, не се прегледани од лекарска комисија и не поминуваат никаква обука“, се наведува во групата „Прво одделение“ во објава на „Телеграм“.
Групата сподели видео објавено од неименуван регрут, кој бил повикан да се бори, пренесе „Република.рс“.
„Здраво на сите, првиот тенковски полк е тука. Официјално ни беше кажано дека нема да има обука пред да бидеме испратени во воена зона. Командантите на полкот го потврдија тоа. На 29 септември ќе бидеме испратени во Херсон“, вели руски војник во видеото објавено на „Телеграм“.
Русија има намера да регрутира речиси 300.000 војници како дел од делумната мобилизација со цел да ја промени ситуацијата на бојното поле, која во последните недели беше во корист на Киев.
Во исто време, по обелоденувањето на мобилизацијата, голем број Руси побрзаа да ја напуштат земјата.
Рускиот портал „Медуза“ ги праша Русите што веќе беа на фронтот во Украина што мислат за мобилизацијата. Нивните одговори ги пренесе „Индекс“.
Кирил
„Искрено, сите ќе загинат таму. Тоа не е обучена војска! На пример, служев долго време како војник со договор, а потоа решив да одам на фронтот во Украина. Но, сè уште не бев подготвен за она што ме чекаше таму. „Првиот ден сфатив дека ја направив најголемата грешка во животот“, изјави Кирил.
„Кога решив да одам во Украина, тоа го направив од патриотизам. Верував дека таму има некакви нацистички организации. Сите канали во Русија промовираа таква пропаганда. Но, штом ја минавме границата, сфатив дека ние сме окупатори, дека ние сме фашисти“, додаде тој.
„Од камионот ги погледнав сцените околу мене. Сите тие уништени села во Харков. Сфатив дека, всушност, ја уништуваме земјата заедно со цивилите. Мојот свет се преврте наопаку, се чувствував празно внатре. Сфатив дека мојот претходниот живот беше фикција“, рече Кирил.
Анатолиј
„Не ми е јасно што сакаат да постигнат со оваа толпа луѓе. Ако Украинците се погрижија за нас професионалците, што ќе прават со нив. Најдоброто сценарио е да останат во резервите во Донбас, а најлошото е да умираат со херојска смрт. Имаат две опции. Особено ако ги пуштат на терен по една недела тренинг. Недела, тоа не е ништо! На борбените единици им требаат најмалку месец или еден и пол месец да се навикнат“, вели Анатолиј.
Џингис
„Оваа мобилизација е доказ дека руската армија е поразена и регрутира секого. Многу луѓе не разбираат, но тоа е така. Во последната половина година руската професионална армија беше уништена, а сега ја регрутираа целата резерва. Јас служев според договор, а ни ние немавме соодветен тренинг“, изјави Чингиз.
„Каква разлика ќе направат овие регрути на линијата на фронтот? Тие ќе загинат за ништо. Тие се само цивили што во одреден момент ја отслужиле својата задолжителна воена служба. Сите што моментно се во Украина само сакаат да си одат дома, сакаат некој да ги замени. Сакаат да се вратат и моите колеги војници што ја поддржуваат војната: ‘Мораме барем да се одмориме дома еден-два месеца, а потоа можеме да се вратиме и да ги победиме фашистичките ѓубриња’“, рече тој.
„Имам пријател кој е регрутиран и за две недели треба да оди во Украина. Се обидов да го предомислам, но тој е премногу послушен. Вели дека во спротивно би завршил една година во затвор и дека подобро е да им помагаш на другите на фронтот. Тоа стана стандардна фраза: „Морам да им помагам на другите. Но, сите нормални момци веќе избегаа од таму“, додаде тој.
„Отидов во Украина во јануари и точно е, сите мислевме дека одиме таму само на воени вежби. Видов колку е неподготвена руската армија. Само отидовме напред и нѐ бомбардираа. Потоа стигнавме во Киев и повторно почнаа да нѐ бомбардираат. Тоа беше војна. Цивилите бегаа, ние постојано влегувавме во празни села. Семејствата што останаа закачија бели знамиња и останаа во своите куќи“, рече Чингиз.
„Во едно село во близина на Киев видов семејство со дете што има болки. Мајка му плачеше и му велеше дека не може да повика брза помош поради војната. Детето имаше силни болки, имаше пет години. Неколку дена подоцна дознав дека умрело, што значи дека умрело поради нас. Затоа што отидовме во Украина“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Столтенберг: НАТО работи на испорака на повеќе „Патриоти“ во Украина
НАТО работи на испраќање повеќе системи за противвоздушна одбрана во Украина, изјави генералниот секретар Јенс Столтенберг, додавајќи дека доцнењето во обезбедувањето таква помош им наштетува на напорите на Киев да се спротивстави на руските напади.
„Собравме податоци за различните системи за противвоздушна одбрана што ги имаме во НАТО и се фокусиравме на системите „Патриот“. И ние работиме со сојузниците за да се осигураме дека тие прераспоредуваат некои од нивните системи во Украина“, изјави тој за новинарите на маргините на состанокот на министрите за надворешни работи на Г7 во Италија.
„Работиме на можноста за испорака на повеќе батерии „Патриот“ за Украина. Водиме дијалог со некои земји“, рече Столтенберг, нарекувајќи го снабдувањето на „Патриотите“ „критично“, бидејќи тоа е најнапредниот одбранбен систем на кој алијансата може да смета.
Столтенберг рече дека други одбранбени системи, вклучително и ракетниот систем земја-воздух НАСАМС, може да и бидат доставени на Украина. Тој додаде дека состанокот на Советот НАТО-Украина ќе се одржи утре и дека се очекува виртуелно да учествува украинскиот претседател Володимир Зеленски.
„Охрабрен сум од посветеноста и одлучноста на сојузниците во НАТО да застанат во одбрана на Украина“, им рече тој на новинарите, додавајќи дека има охрабрувачки знаци дека американскиот Конгрес наскоро би можел да го отклучи пакетот помош од 60,84 милијарди долари за Украина.
Свет
Земјотрес во Турција со јачина од 5,6 степени според Рихтеровата скала
Земјотрес со јачина од 5,6 степени според Рихтеровата скала попладнево ја погоди централна Турција, соопшти државната агенција за справување со катастрофи. Веднаш не беше соопштено дали земјотресот предизвикал жртви или материјална штета.
Според Дирекцијата за управување со катастрофи и вонредни ситуации, земјотресот се случил во градот Сулусарај, во провинцијата Токат, на околу 450 километри источно од главниот град Анкара.
Според телевизијата Хабер Турк, земјотресот бил почувствуван во соседните провинции. Земјотресите во Турција се чести бидејќи земјата лежи на активни раседи.
Разорен земјотрес со јачина од 7,8 степени според Рихтер ја погоди минатата година
Европа
(Видео) Катастрофални поплави во Русија, куќи под вода, илјадници евакуирани
Поради последиците од големите поплави, во Русија се поплавени околу 18.000 домови, додека реката Тобол во областа во близина на границата со Казахстан се заканува да се искачи на рекордно ниво. Државната новинска агенција Тасс објави дека од вчера се поплавени уште 1.700 куќи. Илјадници луѓе се евакуирани во последните неколку дена.
Massive flood after the water level in the Ural River risen in Orenburg, Russia 🇷🇺 (13.04.2024)
TELEGRAM JOIN 👉 https://t.co/9cTkji5aZq pic.twitter.com/SXxuuoAmI1
— Disaster News (@Top_Disaster) April 13, 2024
Регионот Оренбург јужно од планината Урал и регионот Курган во Сибир беа најтешко погодени од катастрофални поплави во близина на јужната граница со Казахстан. Во главниот град на регионот, Курган, реката Тобол порасна за метар и половина за само 24 часа. Курган се подготвува за рекорден водостој и за големи поплави, изјави министерот за вонредни состојби Александар Куренков, кој рече дека нивото на водата се зголемува и во блиската област Тјумен во Сибир.
1/10🌊🇷🇺 #RussiaIsCollapsing
While the Russians fight in #Ukraine 🇺🇦, #Russia is sinking
📍#Kurgan the risk of another dam failure is high
As in #Orenburg & #Orsk, residents leave their homes, leaving dogs chained to deter looters. They won’t survive it. #floods #Rosja #Russie pic.twitter.com/JMURpr5Rbv
— 𝐀𝐧𝐧𝐚 𝐊𝐎𝐌𝐒𝐀 | 🇪🇺🇫🇷🇵🇱🇺🇦 (@tweetforAnna) April 18, 2024
Во моментов има приближно 94 села каде живеат 34.000 луѓе во опасност од поплави. Во четвртокот властите евакуираа 1.500 луѓе од Тјумен и ги транспортираа на безбедно. По обилните дождови и невообичаено снежната зима, Русија оваа година се бори со исклучително тешки сезонски поплави.
Жителите на погодените подрачја ги обвинуваат властите дека доцна преземаат мерки за нивна заштита и дека не реагираат доволно брзо. Слични поплави ги погодија областите преку границата во соседен Казахстан, каде властите претходно почнаа да ги евакуираат луѓето. Досега од таа област се евакуирани повеќе од 100.000 жители.