Свет
Руската полиција влезе во домовите на опозицијата
Руските активисти на опозицијата во четвртокот рекоа дека ќе продолжат со плановите за одржување неовластен митинг во Москва в сабота, и покрај полициските рации во текот на ноќта и притворањето на водечкиот критичар на Кремљ, Алексеј Навални.
Во средата вечерта полицијата влезе во домовите на четири лица од опозицијата, објавија активистите за човекови права.
Дмитриј Гудков, чиј дом бил меѓу оние во кои полицијата извршила рација, заедно со својата сопруга на „Твитер“ напиша дека 10 полицајци во средата вечерта влегле во нивниот дом, им го исклучиле интернетот половина час и заплениле „компјутерски дискови во врска со митинзите“.
Пред сослушувањето во четвртокот наутро, Гудков објави на социјалните медиуми дека на властите ќе им порача дека „изборите завршија“.
„Оваа институција згасна со Путин. Последната илузија дека можеме да учествуваме законски во политиката исчезна“, напиша тој.
Клучниот критичар на Кремљ, Навални, во средата беше осуден на 30 дена затвор поради тоа што ги повикал луѓето да протестираат во Москва оваа сабота во знак на осуда затоа што на опозициските лидери не им беше дозволено да се кандидираат на изборите за градскиот совет во септември.
Неодамна, кандидатите поддржани од Кремљ почнаа да ја губат својата популарност во Москва, па членовите на опозицијата сметаат дека можат да ја добијат поддршката на жителите на рускиот главен град.
Сепак, властите на многумина им забранија да се кандидираат под изговор дека тие не обезбедиле доволно потписи за поддршка.
Но, и покрај апсењето на Навални и рациите во текот на ноќта, неговите сојузници во четвртокот посочија дека ќе го одржат протестот.
Илија Јашин, кому не му беше дозволено да се кандидира, на поддржувачите им порача да излезат на протест во сабота без разлика на сè, додавајќи дека властите не им дозволуваат да се кандидираат бидејќи знаат дека не можат да ги победат.
На 20 јуни околу 20.000 поддржувачи излегоа на улиците на Москва барајќи на опозициските кандидати да им биде дозволено да се регистрираат за изборите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Девојка која исчезна во март во Србија е пронајдена
Тијана Симиќ, која била пријавена за исчезната на 13 март оваа година, и последен пат била видена на Карабурма во Белград, е пронајдена повеќе од еден месец од нејзиното исчезнување.
Засега не се познати детали, а среќните вести ги објави нејзината сестра на „Твитер“.
„Тијана ја пронајдовме, ви благодарам на сите за помошта“, напиша таа.
Tijanu smo pronašli, hvala puno svima na pomoći ♥️
— fifo (@sofoklee) April 24, 2024
Семејството на Тијана молеше за помош или било каква информација за неа, и после повеќе од еден месец е пронајдена.
Свет
Наставниците во Тенеси ќе можат да носат пиштоли на училиште
Пратениците во американската сојузна држава Тенеси усвоија закон со кој на наставниците во државата ќе им се овозможи да носат скриени пиштоли на училиште. Нацрт-законот беше одобрен со 68-28 гласови во Претставничкиот дом на Тенеси, во кој доминираат републиканците. Државниот Сенат го усвои законот претходно овој месец.
Тенеси има жестока дебата за законите за оружје по минатогодишното пукање во училиште во Нешвил во кое загинаа три деца и тројца возрасни членови на персоналот. Некои од демократите во Претставничкиот дом помогнаа во водењето на протестите во главниот град, што доведе до нивно кратко протерување од законодавниот дом минатата година.
„Ова е ужасен ден за Тенеси, нашите деца, нашите наставници и нашите заедници“, напиша на социјалните мрежи Џастин Пирсон, демократ кој беше исфрлен од Домот минатата година, а потоа беше реизбран. „Наместо да ги заштитат децата, тие пак ги заштитија пиштолите!“
Републиканците и другите конзервативци честопати повикуваат на вооружување на наставниците како одговор на бројните престрелки во училиштата што се случија во САД во последните 25 години. Поддржувачите на овие мерки тврдат дека вооружените наставници ќе ги одвратат потенцијалните пукања во училиштата.
Противниците велат дека оружјето во училиштата веројатно ќе доведе само до трагични случајни престрелки.
Околу половина од сите американски држави им дозволуваат на наставниците или другите вработени во училиштата да носат огнено оружје на училишни терени, според Правниот центар Гифордс, група за безбедност на оружје. Според законот на Тенеси, секое лице кое сака да носи скриен пиштол на училиште мора да заврши најмалку 40 часа полициска обука. Трошоците за обуката заедно со огненото оружје се на товар на поединецот.
Според предлог-законот, идентитетот на наставникот или член на персоналот кој носи оружје нема да биде јавен. Директорите на училиштата мора да дадат одобрение за лице да носи оружје, а началниците на локалната полиција мора да бидат информирани за идентитетот на носителот.
Регион
Во БиХ уапсени 14 криумчари, превезувале мигранти во Хрватска, заработиле 3 милиони евра
Припадниците на Граничната полиција на Босна и Херцеговина уапсија 14 лица под сомнение дека организирале мрежа на криумчари на илегални мигранти преку границата со Хрватска. Акцијата под кодното име „Пирамида“ координирана од Обвинителството на БиХ беше спроведена на 16 различни локации низ земјата.
Како што беше утврдено во досегашната истрага, уапсените организирале илегално преминување на границата на најмалку 600 лица, од кои стотина се деца.
„Според прелиминарните податоци, оваа меѓународна организирана криминална група во изминатите шест месеци остварила финансиска корист од повеќе од шест милиони конвертибилни марки (три милиони евра)“, се вели во полициското соопштение.
Разбивањето на оваа мрежа на трговци со луѓе беше спроведено заедно со Управата за криминалистичка полиција на МВР на Република Хрватска и Европол и со учество на припадници на Агенцијата за разузнавање и безбедност на Босна и Херцеговина (ОСА).
Граничната полиција на БиХ наведува дека продолжува да презема мерки за спречување на шверцот на луѓе, особено против организираните криминални групи. Потсетуваат дека во првите три месеци од годинава полициски службеници и граничари до обвинителството поднеле 83 пријави против 177 лица поради постоење основи на сомнение дека сториле 110 кривични дела криумчарење луѓе.