Свет
САД, Канада и 14 европски земји протеруваат руски дипломати, Москва ќе го возврати ударот
САД, Канада и најмалку 14 земји на ЕУ, вклучувајќи ги Германија и Франција, донесоа одлука за протерување на руски дипломати во врска со случајот на труење на поранешниот разузнавач, Сергеј Скрипал. Одлука за протерување на руски дипломати по случајот со Скрипал донесоа 14 земји на ЕУ, како и САД, соопшти претседателот на Европскиот совет, Доналд Туск.
Туск изјави дека постои можност да се применат дополнителни мерки, кои ќе вклучуваат нови протерувања во наредните денови или недели, објавија светските новински агенции. Меѓу земјите кои ќе протераат руски претставници се: Полска, Литванија, Летонија, Естонија, Германија, Франција, Данска, Украина, Чешка, Холандија, Франција, Италија и САД.
Во продолжение ова е листата на земји од кои се протерани руски дипломати и нивната бројка:
САД – 60
Канада – 4
Полска – 4
Литванија – 3
Летонија – 1
Холандија -2
Украина – 13
Франција – 4
Данска – 2
Чешка – 3
Естонија – 1
Германија – 4
Италија – 2
Романија – 1
Хрватска – 1
Финска – 1
Уште едена земја која се споменува во медиумите, а за која нема официјална потврда е Шпанија.
САД, исто така, одлучија да го затворат рускиот конзулат во Сиетл, а некои од дипломатите што ќе бидат протерани оттаму биле дел од мисијата на Обединетите нации, но администрацијата на Трамп се сомнева дека ваквата позиција ја користеле како параван за нивните разузнавачки активности.
Колку за потсетување, веќе 23 руски дипломати се протерани од Велика Британија откако поранешниот руски двоен шпион, Сергеј Скрипал и неговата ќерка Јулија беа нападнати со нервен агенс во англискиот град Салисбури. Нивната состојба е сé уште критична.
Инаку, руските амбасадори во Полска, Летонија, Литванија и Естонија утрово биле повикани во министерствата за надворешни работи на тие земји. Според информации кои ги пренесе „Ројтерс“, Москва веќе реагирала на најновите дипломатски бранувања, така што ќе протера најмалку 60 членови на американската дипломатска мисија во Русија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас: Ќе станеме политичка партија ако се формира палестинска држава
Заменик-претседателот на политбирото на Хамас за Газа, Калил ал-Хаја, рече дека палестинската милитантна група е подготвена да се договори за петгодишно примирје со Израел и да се претвори во политичка партија доколку се формира палестинска држава со границите од 1976 година.
Ал Хаја, претставник на Хамас во преговорите за прекин на огнот и враќање на заложниците, рече дека групата ќе прифати „целосно суверена палестинска држава на Западниот брег и Појасот Газа и враќање на палестинските бегалци во согласност со меѓународните резолуции“.
Во интервју за „Асошиетед прес“ тој додаде дека во тој случај военото крило на Хамас ќе биде распуштено.
„Сите искуства на луѓето што се бореле против окупаторите, кога се осамостоија и ги освоија своите права и својата земја, се претворија во политички партии, а нивните борбени сили се претворија во национална армија“, рече тој.
Тој оцени дека долго најавуваната израелска копнена офанзива во градот Рафа нема да го победи Хамас.
Свет
Погодена железница во Украина, оштетен и облакодер: Русите нападнаа со моќниот „Искандер“
Руски проектил оштети критична инфраструктура и повреди шест лица во регионот Черкаси во централна Украина, изјави регионалниот гувернер.
Во нападот беше погодена цивилната и железничката инфраструктура во градот Смила, изјави портпаролот на украинските воздухопловни сили, Илја Јевлаш, во телевизиски пренос. Според првичните информации, во нападот бил употребен проектил „Искандер-К“, додаде Јевлаш.
Оштетени се и 47 приватни станбени згради и искршени се прозорци во станбена висококатница, објави на „Телеграм“ гувернерот на Черкаси, Ихор Табурец. Украинската воздушна одбрана ја собори воздушната цел, рече тој, додавајќи дека службите за итни случаи се на терен.
Руските сили претходно ја оштетија железничката инфраструктура во нападот на реонот на Днепар на 19 април, како што објавија украинските железници „Укрзализница“ на „Телеграм“.
Свет
(Видео) Пратеник во ЕУ пушти гулаб во знак на мир
Словачки пратеник во Европскиот парламент денеска привлече внимание со пуштање жива птица од говорницата по својот говор. Како што рече, тоа го направил во знак на мир во светот.
На збунетост и изненадување на присутните претставници во Стразбур, Мирослав Радачовски, лидер на десничарската партија Словачки патриот, посегна во чантата што ја имаше под јакната и го пушти гулабот да одлета во собраниската сала.
Тој рече дека „сака мир за целиот свет, за Русите и Украинците“.
„Би сакал да го ослободам овој гулаб како симбол на мирот, да симболизирам дека на Европа ѝ треба мир. Да оставиме овој гулаб да нѐ обедини сите“, рече Радачовски.
Сепак, иако сакаше да ги обедини присутните, некои ги згрози.
Каролин Руз, француска пратеничка во Европскиот парламент од редовите на зелените, го критикува велејќи дека користел живо животно за да даде политичко мислење, што е спротивно на правилата на парламентот.
„Тој употреби животно, скриено во неговата торба како едноставен предмет, само за да даде изјава за мир денес. Што ќе направите за да го вратите ова животно, господине? Каде е благосостојбата на животните во гестот на овој говорник? Сметам дека ова е апсолутно неприфатливо“, рече Руз.
Додека птицата леташе во салата, друг колега го праша Радачовски: „Можеш ли да ја фатиш“.
Јан-Кристоф Отјен, заменик-претседател на парламентот, рече дека инцидентот ќе биде пријавен кај претседателот на домот, додавајќи: „Се надеваме дека животното ќе биде добро“.