Свет
САД на трето место по бројот на заразени со коронавирус
Вкупниот број пациенти со коронавирус во САД достигна 35.070, со што земјата сега е трета во светот по бројот на заразени лица, по Кина и Италија. Последните податоци покажуваат дека до денеска починале 458 Американци од Ковид-19.
Како што расте бројот на потврдени случаи во САД, сè повеќе федерални држави воведуваат обврска граѓаните да останат дома, а излегувањето е дозволено само за купување храна и лекови или за извршување клучни работи за заедницата.
Орегон издаде ваква наредба во петокот вечер, по Калифорнија, Илиноис, Њујорк и Њу Џерси. До крајот на викендот се очекува забраните да важат за околу 20 проценти од Американците, пренесува „Гласот на Америка“.
Речиси половина од сите случаи на коронавирус се откриени во државата Њујорк, а градоначалникот Бил де Блазио проценува дека за десет дена градските болници ќе останат без витална опрема, како што се респираторите.
Поради бројните ограничувања, многу граѓани се привремено без работа, училиштата се затворени и откажани се црковните служби, свадбите, спортските и други настани.
Милиони здравствени работници не се добро опремени за борба против вирусот. Недостасуваат заштитни маски и респиратори, а многу држави имаат недостиг од опрема за тестирање.
Претседателот Доналд Трамп објави дека три американски производители на автомобили – „Џенерал моторс“, „Форд“ и „Тесла“ – добиле зелено светло за да започнат со забрзано производство на респиратори и други производи потребни за лекување на пациентите со коронавирус.
Американската администрација за храна и лекови (ФДА) ѝ даде итна дозвола на компанијата „Кафеид“ со седиште во Калифорнија, која произведува брз тест за коронавирус кој може да ја открие болеста за 45 минути.
На прво место според бројот на заразени во светот е Кина (81.093), а на второ е Италија (59.138). Според бројот на починати, пак, Италија е на прво место со 5.476 смртни случаи, следува Кина со 3.270 и Шпанија со 1.813 смртни случаи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Свет
Шефот на НАТО: Никој нема корист од војната на Блискиот Исток
Генералниот секретар на НАТО Јенс Столтенберг изрази загриженост за ситуацијата на Блискиот Исток по израелскиот напад врз Иран.
„Клучно е конфликтот да не излезе од контрола и затоа ги повикуваме сите страни на воздржаност“, изјави Столтенберг денеска во Брисел. „Никој нема корист од војната на Блискиот Исток“, рече тој.
Израел го нападна иранскиот Исфахан
Според извештаите на медиумите, Израел ја нападнал иранската провинција Исфахан рано во петокот како одговор на големиот ирански напад со беспилотни летала и ракети минатиот викенд.
Според израелскиот весник Jerusalem Post, нападот бил насочен кон воздушна база во Исфахан, недалеку од иранските нуклеарни постројки. Сепак, според Меѓународната агенција за атомска енергија (МААЕ), нуклеарните капацитети не биле погодени.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.