Свет
САД сакаат да го сменат режимот во Иран како што го направија тоа во Ирак
Американското повлекување од нуклеарниот договор со Техеран во вторникот е првиот чекор од американскиот план за промена на режимот во Иран спроведен речиси идентично со ирачкото сценарио, вели експертот за Блискиот Исток, Сами Рамадани, за РТ.
„Ако внимателно го слушате она што го кажа Трамп, САД не само што унилатерално се повлекуваат од овој мултилатерален меѓународен договор, со што го укинуваат, тие исто така, се закануваат со промена на режимот во Иран”, вели Рамадани.
„И тонот во неговиот говор; зборовите што ги користеше потсетуваат на говорот на Џорџ Буш Помладиот пред американската инвазија во 2003 година, кога беа искористени лаги за почнување геноцидна војна против народот на Ирак”, рече тој.
Рамадани истакна дека не само што ирачкиот режим беше соборен поради американската воена вмешаност, туку и целата земја беше уништена.
„САД со децении се обидуваат да го дестабилизираат Иран“, вели тој.
Вашингтон сака многу повеќе од Техеран отколку отстапките во врска со нуклеарниот договор што иранските власти не можат да ги прифатат поради силното незадоволство од договорот дома, смета Рамадани.
„Не верувам дека Иран е способен да прави понатамошни отстапки – тие велат дека никогаш не планирале да развијат нуклеарно оружје, а нивното почитување на договорот во повеќе наврати беше потврдено од страна на Меѓународната агенција за атомска енергија,“ додава тој.
Според Рамадани, САД сакаат Иран да се откаже од својата независност.
„САД не сакаат независна, силна нација во светот, особено не на блискиот Исток. И, без оглед што мислиме ние за неговиот политички систем, Иран го избра патот на независност од САД. Иран не сака да биде лакеј на американската политика во регионот, а САД им велат: Ќе ве казниме за тоа,“ објаснува експертот.
Новинарот Макс Блументал вели дека зад одлуката на Трамп да се повлече од договорот стои Тел Авив.
„Израелското влијание е апсолутно клучно “, вели новинарот.
Кон крајот на април, израелскиот премиер Бенјамин Нетанјаху презентираше наводни податоци од израелската разузнавачка служба за неисполнувањето на договорот од страна на Иран. Меѓутоа, презентацијата, според Блументал, беше неуверлива.
„Тоа е уште една разузнавачка измама која нè вовлекува во војна”, рече тој, нарекувајќи ги разузнавачките информации што ги цитираше Нетанјаху најверојатно фабрикувани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Макрон и градоначалничката на Париз најавија дека ќе пливаат во Сена: Сакаат да го докажат добриот квалитет на водата за Олимписките игри
Градоначалничката на Париз, Ан Идалго изјави дека ќе плива во Сена со францускиот претседател Емануел Макрон за да докаже дека квалитетот на водата на реката ќе биде на нивото потребно за претстојните Олимписки игри.
Идалго потврди дека ги поканила организаторите на Олимпијадата и високите француски функционери да пливаат во Сена на настан кон крајот на јуни или почетокот на јули оваа година, вклучувајќи го и Макрон, кој претходно ветил дека ќе плива во реката, пренесува АП.
„Ќе нуркаме во Сена и многу волонтери се појавија да нуркаат со мене и многу спортисти ќе бидат таму. Ќе биде безбедно да се плива во Сена“, изјави Идалго.
Претходно, француската невладина организација „Suffrider Foundation“ предупреди дека квалитетот на водата во Сена не е доволно добар за пливање за време на Олимпијадата, врз основа на шестмесечни мерења на квалитетот.
За чистење на оваа река ќе бидат инвестирани 1,4 милијарди евра, а од 1 јуни ќе почнат новите рутински мерења.
Организаторите на ОИ претходно најавија дека е можно да се одложат одредени настани во случај на голема загаденост на Сена, а во најлош случај ќе биде откажан пливачкиот дел од планираните триатлони.
Исто така, беше најавено дека пливањето во делови на Сена ќе биде дозволено за јавноста, за прв пат од 1923 година.
Свет
Јужнокореец уби 76 мачки, почнал да ги мрази откако му го изгребале автомобилот
Маж од Јужна Кореја е осуден на 14 месеци затвор за убиство на 76 мачки во еден од најлошите случаи на суровост кон животните во Јужна Кореја во последните години.
Човекот, кој има 20 години, беше осуден за кршење на јужнокорејскиот закон за благосостојба на животните минатата недела, соопшти Окружниот суд Чангвон во југоисточна Јужна Кореја. Судот не го објави името на човекот.
Човекот убивал мачки од декември 2022 година до септември 2023 година поради омразата кон животното која ја развил откако други мачки му го изгребале автомобилот, се наведува во образложението на пресудата.
Тој фатил мачки скитници и посвоил други од интернет-страниците пред да ги задави некои до смрт, а други да ги убие со ножици, смета судот.
Со автомобил прегазил една мачка.
Судот процени дека затворската казна е неизбежна затоа што тој постојано правел „неописливо сурови“ злосторства со предумисла.
Нагласено е дека изречената казна сепак го одразува фактот дека мажот немал криминално досие и се кае за сторените кривични дела, додавајќи дека е утврдено дека неутврденото психичко здравје на мажот било мотив за делата.
Човекот ја обжали пресудата.
„Овој случај на суровост, исто така, ја истакнува важноста од измена на Граѓанскиот законик за правно признавање на животните како живи суштества и дополнително зајакнување на нивната правна заштита“, рече Борами Сео, директор на јужнокорејската канцеларија на Humane Society International.
Свет
Убиен рапер, пронајден во хотелска гаража откако бил застрелан: Џастин Бибер јавно се прости од него
Раперот Крис Кинг почина во саботата во Нешвил, Тенеси.
Крис бил ранет околу 2 часот и 30 минути кога бил со пријателите во уличка, соопшти полицијата, пренесува „Пипл“.
Како што се наведува понатаму, тројца мажи им пришле и се обиделе да ги ограбат, а Кинг и уште еден маж биле ранети. Напаѓачите побегнале, а раперот бил пронајден во гаража на хотел.
View this post on Instagram
Веднаш бил пренесен во болница, но таму починал.
32-годишниот рапер беше близок пријател со пејачот Џастин Бибер, кој јавно се прости од него.
“Те сакам брат. Ова боли“, напиша Џастин Бибер, пренесува гореспоменатиот медиум.