Свет
САД тајно поднеле обвинение против Асанж, случајно откри американски обвинител
Џулијан Асанж веќе е обвинет од САД, но случајот ќе остане запечатен до апсењето на укажувачот, информира „Викиликс“ цитирајќи судски поднесоци што не се поврзани со нивниот коосновач.
„…Ниту една друга постапка не може да го задржи доверлив фактот дека Асанж е обвинет“, напишал помошник-јавниот обвинител, Келен С. Дваер, барајќи од судијата да го задржи предметот запечатен. Сепак, точната природа на наводните обвиненија против укажувачот не беше веднаш откриена и нема да биде откриена до апсењето на Асанж, се вели во документот.
„Викиликс“ го објави документот во четвртокот велејќи дека станува збор за очигледна грешка при „копи-пејст“.
Истите судски поднесоци беа цитирани во извештајот на „Вашингтон пост“. Весникот, цитирајќи ги своите извори, вели дека она што го кажал Двајер е вистина, но дека откривањето било ненамерно. Канцеларијата на јавниот обвинител во источниот округ Вирџинија, каде што бил поднесен документот за откривање на наводните обвиненија, изјави дека поднесокот е направен по грешка.
Претходно „Волстрит џурнал“ објави дека во Министерството за правда разговарале за можноста да го обвинат Асанж со голем број злосторства поради кои, како што се надеваат, ќе го протераат од Амбасадата на Еквадор во Лондон. Иако Министерството го истражува Асанж осум години, обвинителите допрва треба да се согласат со прецизните обвиненија со кои може да се соочи тој. Спомната била и можноста да го обвинат укажувачот за кршење на законот за шпионажа.
Миистерството би можело да го обвини Асанж во врска со објавувањето околу 750.000 воени и дипломатски документи од страна на Челзи Менинг во 2010 година. Особено за објавувањето на класифицираните американски воени снимки со наслов „Колатерално убиство“ од американскиот хеликоптер „апачи“, кој пукал врз ирачки цивили.
„Обвинителите исто така сметаат дека Асанж е поврзан со странски разузнавачки служби“, велат луѓе запознаени со разговорите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.