Свет
Саудиска активистка: „Tвитер е алатка со која нè замолчуват“
Истакната саудиска активистка ги затвори своите профили на Твитер и на Фејсбук обвинувајќи ги гигантите на социјалните мрежи дека станале алатки со кои деспотските влади ги таргетираат дисидентите и активистите за права со тролање и со ботови, пренесува РТ.
Саудиската активистка за правата на жените, Манал ал-Шариф, драматично го избриша профилот на Твитер, на кој имаше околу 300 000 следбеници, минатата недела на конференцијата SingularityU Nordic. Следниот ден таа објави видео на Јутјуб во кое објасни зошто го затворила својот профил, велејќи им на гледачите дека Твитер станал дом на „тролови, провладини банди и на ботови”, од кои многу се платени од провладини агенти за да ги замолчат, заплашат и малтретираат дисидентите.
Барајќи поетички социјални мрежи, Ал-Шариф рече: „Истите алатки на кои се приклучивме за нашето ослободување сега се користат за да нè угнетуваат и поткопуваат и за да шират лажни вести и омраза – јас излегувам од овие платформи”.
Ал-Шариф ја напушти Саудиска Арабија пред многу години и замина во самонаметнат егзил и во 2011 година помогна да се почне борбата на жените во Саудиска Арабија за правото да возат. Саудијките добија право да возат во јуни оваа година.
Според „Хјуман рајтс воч“, оваа арапска нација има долго досие за угнетување дисиденти. Во последните неколку месеци активистите за правата на жените во Саудиска Арабија забележаа најмалку 13 жени уапсени под маската на одржување на националната безбедност, при што обвинителите побараа смртна казна со обезглавување на една дисидентка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Разузнавачки извор за Си-ен-ен: Директните напади меѓу Израел и Иран завршија
Регионален разузнавачки извор рече дека директните напади меѓу Израел и Иран се завршени.
Изворот разговарал за Си-ен-ен под услов да остане анонимен околу два и пол часа по објавувањето на нападите. Изворот вели дека, според неговите сознанија, не се очекува Иран да одговори на нападот, но не наведе причина.
Претходно и висок ирански функционер изјави за „Ројтерс“ дека „Иран нема план за итна одмазда против Израел“.
Израел сѐ уште не потврдил дека го извршил нападот врз Иран, а тврдењата за нападот дојдоа од Вашингтон.
Од друга страна, од Иран доаѓаат контрадикторни информации, но нема официјален извештај.
Пред само еден час ирански аналитичар изјави за иранската државна телевизија дека „мини дроновите соборени од противвоздушната одбрана во Исфахан биле управувани од инфилтратори од Иран“.
Претходно, пак, ирански функционер изјави за „Ројтерс“ дека немало ракетен напад и дека експлозиите биле резултат на активирање на иранските системи за противвоздушна одбрана.
Свет
Украина тврди дека соборила руски бомбардер
Украинските воздухопловни сили денеска соопштија дека собориле руски стратешки бомбардер првпат од почетокот на руската инвазија, а Москва објави дека авионот се урнал поради технички дефект и дека еден член на екипажот загинал.
„Првпат противвоздушните ракетни единици на Военото воздухопловство во соработка со одбранбеното разузнавање на Украина го уништија стратешкиот бомбардер со долг дострел ‘ту-22М3’, кој носи крстосувачки ракети ‘Х-22’“, изјави командантот на украинските воздухопловни сили на „Телеграм“.
Украинската воена разузнавачка служба (ГУР) соопшти дека рускиот авион „бил соборен благодарение на специјалната операција спроведена од украинското одбранбено разузнавање во соработка со воздухопловните сили“.
Руското Министерство за одбрана не потврди дека украинската страна нападнала еден нејзин авион, но воен извор изјавил за новинската агенција ТАСС дека бомбардерот „туполев-22М3“ се урнал во регионот Ставропол по борбена мисија додека се враќал во базата. Според овој извор, авионот не носел оружје.
Свет
САД ставија вето на приемот на Палестина во ОН
Соединетите Американски Држави ставија вето на нацрт-резолуцијата на Советот за безбедност на Обединетите нации „Државата Палестина да биде прифатена како членка на ОН“.
Воздржани беа Велика Британија и Швајцарија, а „за“ гласаа Словенија, Сиера Леоне, Русија, Јужна Кореја, Мозамбик, Малта, Јапонија, Франција, Гвајана, Еквадор, Кина и Алжир.
Претходно вчера, заменик-портпаролот на американскиот Стејт департмент, Ведант Пател, потврди дека Вашингтон ќе стави вето на гласањето во Советот за безбедност на ОН наведувајќи дека нема едногласно мислење меѓу членовите на комитетот за тоа дали Палестинците ги исполнуваат критериумите неопходни за да бидат дефинирани како држава.
Палестинската управа (ПА) го осуди потегот нарекувајќи го „нефер, неетички и неоправдан“.
Кабинетот на претседателот на палестинската управа, Махмуд Абас, го нарече американското вето „еклатантна агресија …туркање на регионот преку работ“.
Израелскиот министер за надворешни работи, Израел Кац, го пофали американското вето додавајќи: „Срамниот предлог беше отфрлен. Тероризмот нема да биде награден“.