Свет
СЗО: Ако богатите земји продолжат да трупаат вакцини наместо да споделуваат, ќе се случат три големи проблеми
Богатите земји, кои се расправаат за вакцината против Ковид-19, мора да ја разгледаат состојбата во посиромашните делови на светот, соопшти денеска Светската здравствена организација (СЗО) предупредувајќи дека со собирањето дози вакцини во затворен круг се одржува пандемијата во живот.
Изјавата на СЗО следува откога Европската комисија соопшти дека ќе го ограничи извозот на вакцини од Европската Унија, вклучувајќи ја и Велика Британија, со изговор дека тоа морала да го стори за да си обезбеди сопствени резерви.
ЕУ, чии земји членки се далеку зад Израел, Велика Британија и Соединетите Американски Држави во однос на вакцинацијата, се обидува да се снабди со резерви додека најголемиот западен производител на вакцини ја забавува испораката на вакцините до Унијата поради проблеми со производството.
„Ако натрупаме вакцини наместо да ги споделуваме, ќе се случат три големи проблеми. Првиот, како што реков, ќе биде катастрофален морален неуспех, вториот, пандемијата сепак ќе биде жива и, трето, глобалното економско закрепнување ќе биде многу бавно“, рече на виртуелен брифинг генералниот директор на СЗО, Тедрос Аданом Гебрејсус.
„Изборот зависи од нас и се надевам дека ќе го направиме вистинскиот избор“, рече тој.
Мајк Рајан, главен експерт за итни случаи на СЗО, рече дека луѓето исто како нив треба да мислат на колегите што се во првите редови во борбата против заразата.
Тој ги осуди земјите што се борат за колачот, а здравствените работници во сиромашните земји немаат ниту пристап до трошки.
Организацијата минатата недела соопшти дека постигнала договор со „Фајзер“ и „Бионтек“ за 40 милиони дози вакцини и дека треба да почне со дистрибуција на вакцини за сиромашните земји, како и за оние со пониски примања како дел од програмата „Ковакс“ следниот месец.
СЗО се надева дека ќе добие итно одобрување за употреба на вакцината на „Астра зенека“ во рок од две недели, изјави Соумја Сваминанатан, главен научник на СЗО.
Маријангела Симао, помошник-генерален директор задолжен за пристап до лекови и здравствени производи, рече дека СЗО минатиот петок одржал состанок со руските производители на вакцини, а треба да се одржат повеќе состаноци додека чекаат дополнителни информации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Братот на осомничениот за убиството на малата Данка починал од насилство, а не од природна смрт, пишуваат медиуми
Д.Д.(40), брат на еден од осомничените за исчезнувањето и смртта на двегодишното девојче Д.И., починал од насилна смрт на 7 април во раните утрински часови во полициската станица во Бор, констатирано е од стручното мислење на Институтот за судска медицина во Белград, објави Радар.
Во судско-медицинскиот извештај на телото на Д.Д биле констатирани бројни повреди, поради што вештаците констатирале дека се работи за насилна смрт. Наодите на вештачењето се проследени до надлежното Вишо јавно обвинителство Заечар за понатамошно постапување, пишува Радар.
Осомничениот Д.Д од Бор, во саботата на 6 април, во полициската станица во Бор бил задржан до 48 часа поради постоење основи на сомнение дека по извршеното кривично дело му помогнал на својот десетгодишен брат, кој е осомничен за убиството на двегодишната Данка Илиќ.
Истата вечер, три часа по полноќ, полицијата соопшти дека од „природна смрт“ починал Д.Д. Во соопштението на полицијата од 7 април, се наведува дека на осомничениот му се „слошило“ во раните утрински часови и дека „и покрај навремената реакција на полициските службеници и лекарите од Здравствениот дом во Бор, кои се обиделе да извршат реанимација, Д.Д. починал во 3 часот и 10 минути“.
Вештачењето на Институтот за судска медицина во Белград, пак, покажа дека Д.Д. не починал од природна смрт, но од последиците од тепањето, чии траги беа јасно видливи и детално опишани во вештачењето.
Свет
Орбан: Западот е на чекор од испраќање војници во Украина, Брисел си игра со оган
Западот е на чекор од испраќање војници во Украина и во Брисел владее провоено мнозинство, најави унгарскиот премиер Виктор Орбан.
„Во Европа расположението е војна, а во политиката доминира логиката на војната. Гледам подготовки за војна од сите страни. Генералниот секретар на НАТО сака да формира украинска мисија на НАТО. Европските лидери веќе влегоа во војна, разговарам со нив, ги слушам, тие ја гледаат оваа војна како нивна и така ја водат“, истакна Орбан.
Унгарскиот лидер укажа на постепено зголемување на помошта на Европа за Украина, почнувајќи од испраќање воена опрема и воведување санкции кон Русија до испраќање оружје и пари, објави HirTV.
Пари, пари, оружје, но состојбата не се подобрува, всушност се влошува. На чекор сме од Западот да испрати војници во Украина. Ова е вител на војна што може да ја одвлече Европа во длабочините. Брисел си игра со оган – предупреди Орбан и нагласи дека Будимпешта нема да биде вовлечена во руско-украинскиот конфликт.
Свет
Г7: Ќе ја зајакнеме воздушната одбрана на Украина
Земјите-членки на Г7 се решени да ја зајакнат воздушната одбрана на Украина, изјавија денеска нивните министри за надворешни работи кои се собраа на состанокот во Капри.
Седум суперсили – Италија, Канада, Франција, Германија, Јапонија, Велика Британија, САД и ЕУ – силно ја критикуваат руската инвазија на Украина, која трае повеќе од две години.
Сепак, Киев ги предупредува дека мора да ја сменат стратегијата доколку сакаат Украина да издржи се подеструктивни руски воздушни напади. Русија негира дека мета и се цивилите, но смета дека енергетскиот систем на Украина е легитимна цел. Во овие напади беа убиени стотици цивили.
„Г7 ќе ја зајакне воздушната одбрана на Украина за да спаси животи и да ја заштити критичната инфраструктура“, рекоа министрите за надворешни работи, додавајќи дека ќе ја зголемат одбранбената и безбедносната помош за Киев.
„Ние сме решени да продолжиме да обезбедуваме воена, финансиска, политичка, хуманитарна, економска и развојна помош за Украина и нејзиниот народ“, додаваат тие.
Изјавата беше објавена на крајот од тридневниот министерски состанок во Капри, каде главни теми беа Украина и воените конфликти меѓу Израел и Иран.