Свет
СЗО: Пандемијата се шири, но растот на нови случаи забавува
Пандемијата на коронавирусот сè уште се шири, но зголемувањето на бројот на нови инфекции и смртни случаи од последиците од Ковид-19 е забавено на глобално ниво.
Исклучоци, како што се наведува, се Југоисточна Азија и источен Медитеран.
Во неодамнешниот извештај за пандемијата, објавен во понеделникот, СЗО рече дека Северна и Јужна Америка продолжуваат да бидат најтешко погодените региони во кои се потврдени половина од бројот на новозаразените од повеќе од 1,7 милион и 62 процента од 39.240 смртни случаи од последиците на Ковид-19.
Во текот на минатата недела бројот на заразени лица опадна четири проценти во однос на претходната недела, а бројот на починати се намали 12 проценти, изјави СЗО, пренесува „Ројтерс“.
Југоисточна Азија, втора во светот во однос на сериозноста на епидемиолошката состојба, објави зголемување на бројот на новозаразени од 28 проценти, а бројот на починати од короната се зголеми 15 проценти.
Бројот на заболени од Ковид-19 во регионот на источен Медитеран исто така е зголемен четири проценти, а бројот на смртни случаи како резултат на оваа болест постојано се намалува во последните шест недели.
Бројот на нови инфекции и смртни случаи од коронавирус во Африка се намали за осум до единаесет проценти минатата недела, се вели во извештајот на СЗО.
Во Европската Унија бројот на нови пријавени случаи на Ковид-19 се зголемува во последните три недели.
Во текот на минатата недела само малку се зголеми, еден процент, а бројот на починати од последиците од инфекција со коронавирус продолжува да расте.
Регионот на Западен Пацифик бележи пад од пет проценти на нови инфекции, според податоците на СЗО.
Според статистиката на „Ројтерс“, над 23,65 милиони луѓе во светот досега биле заразени од коронавирусот, а 811.895 пациенти починале како резултат на болеста предизвикана од него.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас: Ќе станеме политичка партија ако се формира палестинска држава
Заменик-претседателот на политбирото на Хамас за Газа, Калил ал-Хаја, рече дека палестинската милитантна група е подготвена да се договори за петгодишно примирје со Израел и да се претвори во политичка партија доколку се формира палестинска држава со границите од 1976 година.
Ал Хаја, претставник на Хамас во преговорите за прекин на огнот и враќање на заложниците, рече дека групата ќе прифати „целосно суверена палестинска држава на Западниот брег и Појасот Газа и враќање на палестинските бегалци во согласност со меѓународните резолуции“.
Во интервју за „Асошиетед прес“ тој додаде дека во тој случај военото крило на Хамас ќе биде распуштено.
„Сите искуства на луѓето што се бореле против окупаторите, кога се осамостоија и ги освоија своите права и својата земја, се претворија во политички партии, а нивните борбени сили се претворија во национална армија“, рече тој.
Тој оцени дека долго најавуваната израелска копнена офанзива во градот Рафа нема да го победи Хамас.
Свет
Погодена железница во Украина, оштетен и облакодер: Русите нападнаа со моќниот „Искандер“
Руски проектил оштети критична инфраструктура и повреди шест лица во регионот Черкаси во централна Украина, изјави регионалниот гувернер.
Во нападот беше погодена цивилната и железничката инфраструктура во градот Смила, изјави портпаролот на украинските воздухопловни сили, Илја Јевлаш, во телевизиски пренос. Според првичните информации, во нападот бил употребен проектил „Искандер-К“, додаде Јевлаш.
Оштетени се и 47 приватни станбени згради и искршени се прозорци во станбена висококатница, објави на „Телеграм“ гувернерот на Черкаси, Ихор Табурец. Украинската воздушна одбрана ја собори воздушната цел, рече тој, додавајќи дека службите за итни случаи се на терен.
Руските сили претходно ја оштетија железничката инфраструктура во нападот на реонот на Днепар на 19 април, како што објавија украинските железници „Укрзализница“ на „Телеграм“.
Свет
(Видео) Пратеник во ЕУ пушти гулаб во знак на мир
Словачки пратеник во Европскиот парламент денеска привлече внимание со пуштање жива птица од говорницата по својот говор. Како што рече, тоа го направил во знак на мир во светот.
На збунетост и изненадување на присутните претставници во Стразбур, Мирослав Радачовски, лидер на десничарската партија Словачки патриот, посегна во чантата што ја имаше под јакната и го пушти гулабот да одлета во собраниската сала.
Тој рече дека „сака мир за целиот свет, за Русите и Украинците“.
„Би сакал да го ослободам овој гулаб како симбол на мирот, да симболизирам дека на Европа ѝ треба мир. Да оставиме овој гулаб да нѐ обедини сите“, рече Радачовски.
Сепак, иако сакаше да ги обедини присутните, некои ги згрози.
Каролин Руз, француска пратеничка во Европскиот парламент од редовите на зелените, го критикува велејќи дека користел живо животно за да даде политичко мислење, што е спротивно на правилата на парламентот.
„Тој употреби животно, скриено во неговата торба како едноставен предмет, само за да даде изјава за мир денес. Што ќе направите за да го вратите ова животно, господине? Каде е благосостојбата на животните во гестот на овој говорник? Сметам дека ова е апсолутно неприфатливо“, рече Руз.
Додека птицата леташе во салата, друг колега го праша Радачовски: „Можеш ли да ја фатиш“.
Јан-Кристоф Отјен, заменик-претседател на парламентот, рече дека инцидентот ќе биде пријавен кај претседателот на домот, додавајќи: „Се надеваме дека животното ќе биде добро“.