Свет
Скандал во Индонезија, измиени, па повторно користени стапчиња за тестирање на коронавирус
Поголем број вработени во фармацевтска компанија се уапсени во Индонезија за наводно миење и препродажба на користени стапчиња за тестирање на коронавирус.
Според светските агенции, дури 9.000 патници на аеродромот „Медан“ можеби биле тестирани со повторно употребени стапчиња за проверка на коронавирус, соопшти полицијата.
Државната компанија „Кимија фарм“ сега се соочува со потенцијална тужба поднесена во име на патниците, пишува Би-би-си.
Полицијата верува дека измамата трае од минатиот декември на аеродромот „Куаланаму“ во Медан, во северна Суматра.
Патниците мора да направат негативен тест на Ковид-19 пред летот, а аеродромот им нуди тестирање на самото место. Аеродромските власти користеа комплети за брза проба испорачани од компанијата „Кимија фарм“.
По поплаките од патниците дека добиле лажни позитивни резултати на тестот, полицијата минатата недела испрати прикриен полицаец да се претстави како патник, објавија локалните медиуми.
Кога зеле брис од полицаецот и го известиле дека тестот е позитивен, другите полицајци влегле и го пребарувале тестот. Тие пронајдоа користен комплет за тестирање.
Минатата недела беа уапсени петмина вработени во „Кимија фарм“, вклучувајќи го и директорот на „Медан“.
Локалните медиуми велат дека властите разговарале со 23 сведоци и испитуваат дали приходите од измамата, проценета на речиси 1,8 милијарда рупии (124.800 американски долари), биле искористени за изградба на раскошна куќа за еден од осомничените.
„Кимија фарм“, со седиште во главниот град Џакарта, оттогаш го отпушти вклучениот персонал и вети дека ќе ги засили внатрешните контроли.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Емануел Макрон: Постои ризик Европа да умре
Францускиот претседател Емануел Макрон за време на говорот на Универзитетот „Сорбона“ во Париз изјави дека постои ризик Европа да умре.
Макрон истакна дека битката за изградба на силна Европа е далеку од завршена и ризикува да заостане зад светските ривали во наредната деценија, пренесува „Ројтерс“.
Европа, како што оцени Макрон, е на пресвртна точка и мора да стори повеќе за да се натпреварува со забрзаното вооружување на своите глобални ривали.
Свет
Хамас: Ќе станеме политичка партија ако се формира палестинска држава
Заменик-претседателот на политбирото на Хамас за Газа, Калил ал-Хаја, рече дека палестинската милитантна група е подготвена да се договори за петгодишно примирје со Израел и да се претвори во политичка партија доколку се формира палестинска држава со границите од 1976 година.
Ал Хаја, претставник на Хамас во преговорите за прекин на огнот и враќање на заложниците, рече дека групата ќе прифати „целосно суверена палестинска држава на Западниот брег и Појасот Газа и враќање на палестинските бегалци во согласност со меѓународните резолуции“.
Во интервју за „Асошиетед прес“ тој додаде дека во тој случај военото крило на Хамас ќе биде распуштено.
„Сите искуства на луѓето што се бореле против окупаторите, кога се осамостоија и ги освоија своите права и својата земја, се претворија во политички партии, а нивните борбени сили се претворија во национална армија“, рече тој.
Тој оцени дека долго најавуваната израелска копнена офанзива во градот Рафа нема да го победи Хамас.
Свет
Погодена железница во Украина, оштетен и облакодер: Русите нападнаа со моќниот „Искандер“
Руски проектил оштети критична инфраструктура и повреди шест лица во регионот Черкаси во централна Украина, изјави регионалниот гувернер.
Во нападот беше погодена цивилната и железничката инфраструктура во градот Смила, изјави портпаролот на украинските воздухопловни сили, Илја Јевлаш, во телевизиски пренос. Според првичните информации, во нападот бил употребен проектил „Искандер-К“, додаде Јевлаш.
Оштетени се и 47 приватни станбени згради и искршени се прозорци во станбена висококатница, објави на „Телеграм“ гувернерот на Черкаси, Ихор Табурец. Украинската воздушна одбрана ја собори воздушната цел, рече тој, додавајќи дека службите за итни случаи се на терен.
Руските сили претходно ја оштетија железничката инфраструктура во нападот на реонот на Днепар на 19 април, како што објавија украинските железници „Укрзализница“ на „Телеграм“.