Свет
Трамп загуби на суд во Пенсилванија, републиканците бараат да го признае поразот
По новиот пораз во судот во Пенсилванија, американскиот претседател Доналд Трамп се соочува со зголемен притисок од републиканците да се откаже од понатамошните обиди за пресврт на резултатите од претседателските избори во САД и да ја признае победата на демократот, Џо Бајден.
Трамп покрена тужби во судовите на неколку клучни земји
Откако Бајден беше прогласен за победник пред две недели, Трамп покрена тужби против неколку земји – клучни за претседателските избори во САД во обид да го промени резултатот и почна силна кампања за да се спречат државите да ги потврдат изборните резултати.
Судовите во Џорџија, Мичиген и Аризона ги отфрлија неговите обиди да го запре процесот за потврда на изборните резултати.
Во саботата, федералниот судија Метју Бран, републиканец номиниран за оваа функција од поранешниот претседател Барак Обама, отфрли сличен обид во Пенсилванија, пишувајќи дека пред него има поднесок со „развлечени правни аргументи, без основа, и многу сомнителни обвинувања“.
Тимот на Трамп се обиде да го запре процесот за потврдување на резултатите во Пенсилванија, тврдејќи дека има неправилности со гласачките ливчиња испратени по пошта, а Бран одговори дека „тој нема овластување да лиши некого од правото на глас, а најмалку тоа да им го направи на милиони граѓани“.
Правниот тим на Трамп објави дека веднаш ќе се жали на одлуката на судијата
За да има какви било шанси да остане во Белата куќа, Трамп мора да ја поништи предноста на Бајден во Пенсилванија од 81.000 гласови. Државата треба да започне со процесот за потврда на изборните резултати во понеделник.
Адвокатскиот тим на Трамп објави дека веднаш ќе ја обжали одлуката на судијата Бран до Окружниот суд во Филаделфија.
Републиканците го повикаа Трамп да го признае поразот
Републиканскиот сенатор Пат Томеј по пресудата на Бран рече дека се исклучува каква било можност за законска победа на тимот на Трамп во Пенсилванија и го повика Трамп да го признае поразот.
Член на раководството на Републиканците во Претставничкиот дом, пратеничката Лиз Чејни, го повика Трамп да ја почитува „светоста на изборниот процес“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лукашенко: Исходот од претседателските избори во Русија е сериозен сигнал за Западот
Претседателот на Белорусија Александар Лукашенко ги коментираше резултатите од претседателските „избори“ во Русија.
„Исходот од претседателските избори во Русија е сериозен сигнал за Западот, кој сметаше на протресување на ситуацијата во Русија одвнатре. Тие не можеа да го направат тоа на првата линија, па се обидоа да го направат тоа одвнатре, но и тие не успеаја“, рече Лукашенко, цитиран од државната агенција „БелТА“.
Лукашенко рече дека никој не може да ги принуди луѓето на Белорусија и Русија на ништо.
Тој се пофали како изборниот процес во Русија е добро организиран. „Природно, претседателот Путин мораше да работи многу, видовте. Тој неуморно патуваше низ цела Русија, посетуваше различни места и одговараше на виталните прашања на рускиот народ.
Процесот на планирање и селекција беше совршен. Има многу да се научи. Сите беа мобилизирани и консолидирани. Луѓето се патриоти и резултатот е совршен. Ова е лекција за нас“, рече претседателот на Белорусија.
Свет
Драма на лет за Лондон: Патник се обидел да се убие во тоалетот на авионот
Пилотот на авионот принудно слетал откако патник наводно се обидел да се самоубие за време на летот.
Патувањето од Бангкок до Лондон завршило драматично, откако стјуардесите наишле на страшна сцена. Наводно патникот бил пронајден во тоалетот во моментот кога се обидувал да стави крај на животот, пренесуваат медиумите.
Британскиот таблоид „Сан“ наведува дека на помош на патникот дошле стјуардесите и докторот кој се затекнал на летот. На мажот му била укажана прва помош по слетувањето и итно бил пренесен во болница на понатамошно лекување.
Компанијата „ЕВА“ потврди дека инцидентот се случил на летот „БР67 Бангкок-Лондон“.
Не е познато на кој аеродром во Лондон слетал авионот.
Регион
Неписмени гангстери: реакција на Милановиќ по одлуката на Уставниот суд
Хрватскиот претседател Зоран Милановиќ денеска ја коментираше одлуката на Уставниот суд за неговата кандидатура.
Медиумите во регионот потсетуваат на одлуката на Уставниот суд во која е заклучокот дека хрватскиот претседател Зоран Милановиќ не може да учествува во политичките активности на ниту една политичка партија додека ја извршува својата функција. Претседателот на Уставниот суд,Мирослав Шепаровиќ му забранил да биде на избирачкиот список и на кој било начин да учествува во изборната кампања додека е претседател.
„Тоа го направија на гангстерски начин. Тие не ми можат ништо, но јас им можам. Тоа се сељаци, неписмени. Писмен човек, барем тој што завршил автошкола, има проблем со тоа“, рече тој.
Зоран Милановиќ потоа на насобраните во Вела Лука им ја прочитал одлуката на Уставниот суд.
„Најверојатно хрватскиот го научиле во автомеханичарска работилница. Според овие неписмени гангстери, тоа е забрането, но не е“, рече тој.
„Ова мора да се реши на избори. На крајот ќе бидам премиер, но нема да и кажувам на таа банда како. Ќе бидам кандидат на изборите, како што можев да бидам и на европските избори. Јас нема да си дадам мандат. Што е тука спорот, неписмени гангстери“, праша тој.
Собирот на ХДЗ во Лисински го нарече бал на вампирите. Тој рече дека во првите редови имало двајца ректори на државните универзитети.
„Со гангстерите ќе се справиме по изборите“ рече тој.