Министерот за надворешни работи на Израел, Израел Кац, денеска ги повика земјите да воведат санкции за ракетната програма на Иран и да ја прогласат нејзината Револуционерна гарда како терористичка организација по првиот директен напад на Иран врз Израел.

„Покрај воениот одговор на лансирањето проектили и беспилотни летала, јас водам дипломатски напад врз Иран“, рече Кац во објава на социјалните мрежи.

Кац додаде дека испратил писма до 32 земји и разговарал со многу колеги, барајќи од нив „да воведат санкции за ракетната програма на Иран и да ја прогласат Револуционерната гарда за терористичка организација како начин да се запре и ослабне Иран“.

„Мораме да го запреме Иран сега, пред да биде предоцна“, вели Кац.

Израел соопшти дека ќе одговори на иранскиот ракетен и беспилотен напад во текот на викендот, и покрај повиците од сојузниците за воздржаност за да се избегне ескалација на конфликтот на Блискиот Исток.

Групата од седум индустриски најразвиени земји, Г7, веќе работи на пакет координирани мерки против Иран, објави британскиот премиер Риши Сунак.

Во најстарата, поранешна зграда на берзата во Копенхаген, една од најпознатите згради во главниот град на Данска, денеска избувна пожар, а пожарот ја зафати кулата, која се урна на покривот.

Засега нема извештаи за повредени, пренесе Ројтерс.

На снимката објавена од локалните медиуми се гледа како луѓе носат слики надвор од зградата за да спречат да бидат зафатени од пламен.

Кулата на зградата, која е изградена во ренесансен стил и повеќе не е берза, се реновира и служи како седиште на Данската стопанска комора.

Полицијата ги замоли граѓаните на Копенхаген да ги избегнуваат улиците околу зградата и централниот дел на градот.

Се’ повеќе високи ирански претставници ги предупредуваат и Израел и Западот за последиците од можната израелска одмазда.

Така, иранскиот воен портпарол ги предупреди САД, Велика Британија, Франција и Германија да престанат да го поддржуваат Израел и рече дека ќе има уште посилен одговор од Иран доколку Израел возврати на нападите што се случија викендов.

Официјалната државна новинска агенција ИРНА објави дека бригадниот генерал Аболфазл Шекарчи рекол: „Ги потсетуваме шефовите на државите на Соединетите Американски Држави, Обединетото Кралство, Франција и Германија да престанат да го поддржуваат терористичкиот режим на Израел што убива деца. Исламската Република на Иран докажа дека нема тенденција да ја прошири војната. Одговорот ќе биде посилен доколку режимот изврши уште поагресивен чин“.

Во текот на ноќта, висок ирански функционер изјави за катарската Ал Џезира дека „Иран има широк спектар на опции што може да ги искористи против Израел“ и додаде дека „израелското малтретирање и избезуменото однесување кон Иран нема да исчезнат“.

Во официјалното соопштение за разговорот меѓу иранскиот претседател Ебрахим Раиси и емирот на Катар, се вели дека иранскиот лидер рекол: „Сега категорично изјавуваме дека дури и најмалата акција против иранските интереси сигурно ќе наиде на остар и болен одговор. против сите сторители“.

Ал Џезира, исто така, објави дека на државната телевизија во Иран, заменик-министерот за надворешни работи Али Багери Кани рекол дека неговата земја нема да чека 12 дена за да одговори на уште еден израелски напад, туку ќе возврати „во рок од неколку секунди“.

Иран изврши повеќе од 300 напади со беспилотни летала врз Израел во текот на викендот како одговор на, како што рече, уништувањето на неговиот конзулат во Дамаск на 1 април, за што го обвини Израел. Огромното мнозинство беспилотни летала и ракети не успеаја да стигнат до своите цели или беа соборени од израелската противвоздушна одбрана, помогната од коалицијата на партнери, вклучувајќи ги ОК и Франција.