Свет
Трамп призна дека е делумно виновен за хаосот во Капитол Хил во кој загинаа пет лица
Американскиот претседател во заминување, Доналд Трамп, призна дека сноси дел од вината за хаосот што се случи на 6 јануари, кога демонстрантите упаднаа во зградата на Конгресот, пренесуваат американските медиуми.
„Фокс њуз“, повикувајќи се на извор запознаен со целата ситуација, наведува дека претседателот на САД го спомнал тоа додека разговарал со лидерот на републиканците во Претставничкиот дом, Кевин Мекарти.
Според информациите, Мекарти телефонски разговарал со Трамп и за време на разговорот се согласил со претседателот дека тој е одговорен за немирите во Вашингтон во кои беа убиени пет лица, пренесува „Спутник“.
Во меѓувреме на Трамп трајно му е избришан профилот на Твитер откако беше обвинет за предизвикување насилство, а профилите на Фејсбук и Инстаграм исто така се суспендирани.
Треба да се напомене дека се појавија и други извештаи во врска со разговорот помеѓу Трамп и Мекарти. Имено, како што тврди Аксиос, претседателот во заминување наводно го обвинил левичарското движење Антифа за упад во зградата на американскиот Конгрес.
Извори од Белата куќа, кои знаат за овој разговор, наведуваат дека комуникацијата била проткаена со напнатост, главно со агресија и тврдат дека Мекарти му рекол на Трамп дека тоа не е Антифа, туку приврзаници на МАГА (Да ја направиме Америка повторно голема).
„Тие беа членови на МАГА. Го знам тоа. Бев таму“, му рече Мекарти на Трамп и го советуваше да го повика Џо Бајден, да се сретне со него или да му остави писмо за добредојде на неговото биро во Овалната канцеларија на Белата куќа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Емануел Макрон: Постои ризик Европа да умре
Францускиот претседател Емануел Макрон за време на говорот на Универзитетот „Сорбона“ во Париз изјави дека постои ризик Европа да умре.
Макрон истакна дека битката за изградба на силна Европа е далеку од завршена и ризикува да заостане зад светските ривали во наредната деценија, пренесува „Ројтерс“.
Европа, како што оцени Макрон, е на пресвртна точка и мора да стори повеќе за да се натпреварува со забрзаното вооружување на своите глобални ривали.
Свет
Хамас: Ќе станеме политичка партија ако се формира палестинска држава
Заменик-претседателот на политбирото на Хамас за Газа, Калил ал-Хаја, рече дека палестинската милитантна група е подготвена да се договори за петгодишно примирје со Израел и да се претвори во политичка партија доколку се формира палестинска држава со границите од 1976 година.
Ал Хаја, претставник на Хамас во преговорите за прекин на огнот и враќање на заложниците, рече дека групата ќе прифати „целосно суверена палестинска држава на Западниот брег и Појасот Газа и враќање на палестинските бегалци во согласност со меѓународните резолуции“.
Во интервју за „Асошиетед прес“ тој додаде дека во тој случај военото крило на Хамас ќе биде распуштено.
„Сите искуства на луѓето што се бореле против окупаторите, кога се осамостоија и ги освоија своите права и својата земја, се претворија во политички партии, а нивните борбени сили се претворија во национална армија“, рече тој.
Тој оцени дека долго најавуваната израелска копнена офанзива во градот Рафа нема да го победи Хамас.
Свет
Погодена железница во Украина, оштетен и облакодер: Русите нападнаа со моќниот „Искандер“
Руски проектил оштети критична инфраструктура и повреди шест лица во регионот Черкаси во централна Украина, изјави регионалниот гувернер.
Во нападот беше погодена цивилната и железничката инфраструктура во градот Смила, изјави портпаролот на украинските воздухопловни сили, Илја Јевлаш, во телевизиски пренос. Според првичните информации, во нападот бил употребен проектил „Искандер-К“, додаде Јевлаш.
Оштетени се и 47 приватни станбени згради и искршени се прозорци во станбена висококатница, објави на „Телеграм“ гувернерот на Черкаси, Ихор Табурец. Украинската воздушна одбрана ја собори воздушната цел, рече тој, додавајќи дека службите за итни случаи се на терен.
Руските сили претходно ја оштетија железничката инфраструктура во нападот на реонот на Днепар на 19 април, како што објавија украинските железници „Укрзализница“ на „Телеграм“.