Свет
Трамп се раздели со американскиот актерски синдикат: „Ништо не направивте за мене“
Поранешниот претседател Доналд Трамп се раздели со Здружението на филмски актери со бомбастично писмо во четвртокот.
Причината, како што пренесува порталот „Политико“, е поради тоа што тој бил соочен со дисциплински мерки од страна на синдикатот.
Одборот на синдикатот изгласа во јануари да го упати Трамп до дисциплинскиот одбор, наведувајќи ја неговата улога во упадот во Капитол на 6 јануари, во кој загинаа пет лица и несовесната кампања за дезинформации насочена кон дискредитација и на крај загрозување на безбедноста на новинарите, од кои многумина се членови на SAG-AFTRA, се наведува во соопштението за медиуми од 19 јануари.
Доколку дисциплинскиот одбор го прогласеше за виновен, казните можеа да бидат опомена, парична глоба и протерување.
Но, Трамп ја напушти унијата пред надлежните да размислат за која било од тие казни.
Неговото писмо во четвртокот, со голем потпис и извичници, ја исмејувало претседателката на синдикатот Габриел Картерис, за која Трамп вели: „Не стори ништо за мене, освен да собира членарина и да промовира опасни неамерикански политики и идеи“. Тој исто така се пофалил, тврдејќи дека многу му помогнал на бизнисот за кабелска телевизија и ги пофалил своите мали епизодни улоги што ги играл во разни филмови.
„Кому му е гајле!“, напишал Трамп до дисциплинскиот комитет. „Иако не сум запознаен со вашата работа, јас сум многу горд на мојата работа на филмовите како што се ‘Сам дома 2’, ‘Зулeндер’ и ‘Волстрит: парите никогаш не спијат’, како и телевизиските емисии меѓу кои ‘Принцот од Бел-Ер’, ‘Сатрдеј најт лајв’ и секако, една од најуспешните емисии во историјата на телевизијата, ‘Приправник’ – да именувам само неколку!“, напишал поранешниот американски претседател.
„Ова писмо ве известува за моето отчленување од SAG-AFTRA. Вие не направивте ништо за мене“, нагласил тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во Индија почнаа изборите, кои ќе траат шест недели, а ќе гласаат речиси 970 милиони
Денеска, почнаа најобемните избори во светот, а речиси 970 милиони регистрирани гласачи во Индија учествуваат во овој огромен процес, кој ќе се одвива во седум фази и ќе трае дури шест недели.
Премиерот Нарендра Моди се надева дека ќе освои трет последователен мандат во земјата со 1,4 милијарда жители. Гласачите, всушност, не го избираат директно премиерот, туку 543-те пратеници на Лок Сабха, долниот дом на парламентот на најнаселената земја во светот, објави „Дојче веле“.
На натпреварот учествуваат шест национални партии, 57 партии од индиските сојузни држави и 2.597 помали партии. Сепак, главната трка ќе биде меѓу двете најголеми политички партии во Индија: владејачката Индиска народна партија (БЈП) и опозицискиот Индиски национален конгрес (ИНЦ) или скратено Конгресната партија.
За да се спротивстави на владејачката БЈП и премиерот Моди, Конгресната партија формира сојуз од 28 партии, наречен Индиски национален развој – инклузивен сојуз.
Според анкетите, премиерот Моди и неговата хинду-националистичка БЈП се очекува да победат на изборите оваа година.
Моди е популарен лидер, делумно благодарение на агендата насочена кон хинду-мнозинството во Индија, кое сочинува 80 отсто од населението.
Свет
Русија повика на воздржаност помеѓу Израел и Иран
Русија повика на воздржаност по информациите за напад на Израел врз Иран.
Портпаролот на Кремљ, Дмитриј Песков, изјави денеска за новинарите дека Русија ги проучува деталите за нападот и дека ќе го коментира откако ќе се разјасни неговата природа.
– Во секој случај, без разлика на се, продолжуваме да се залагаме за воздржаност од двете страни за да нема дејствија што би предизвикале натамошна ескалација на тензиите во регионот – рече Песков.
Русија и Иран имаат блиско партнерство. За време на инвазијата на Украина, Москва користи беспилотни летала Шахед од иранско производство.
Свет
(Видео) Туристи малтретирале мечиња за селфи, па ги фатила полиција во Северна Каролина
Во станбен комплекс во округот Бункомб, Северна Каролина, шест лица се снимени како влечат мали мечиња од гранките на дрвото за кои се држеле, а сè со цел да позираат за фотографија. Шестемина ги тегнеле двете мечиња, а едното дури им испаднало од рацете во текот на снимањето.
Кога снимките од инцидентот стигнале до експертите што се занимаваат со заштита на дивите животни, тие веднаш излегле на терен и повикале полиција. Меѓу нив бил и биологот Ешли Хобс, која за „Еј-би-си 13 њуз“ рекла дека кога пристигнала до дрвото каде што луѓето се фотографирале, пронашла само едно мече. Целото било влажно и смрзнато, па било дадено на човечка грижа и нега за да закрепне. Поради тоа, сосема е можно никогаш да не може да се вратат во дивината бидејќи мечките што растат со луѓе потоа не сакаат да ги напуштат. Неверојатно, но можно е некој да ѝ го уништил животот на мечката само за да добие убава фотографија за социјалните мрежи.
„Мечето преживеа големо трауматско искуство. На луѓето што го направија тоа им објаснивме колку е неодговорно и потенцијално смртоносно за мечето да се одвои од мајка си, а особено на овој начин да го влечат од дрвото“, рекла Хобс, пренесува „Унилад“.
По објавувањето на видеото, многумина се згрозиле од она што го направиле овие луѓе. За сето тоа морало да разговараат и со полицијата.