Свет
Уапсен маж кој испраќал сомнителни пакети во амбасадите и конзулатите во Австралија
Австралиската полиција уапси 49-годишен маж кој е поврзан со испраќањето на 38 сомнителни пакети кон конзулатите и амбасадите во Канбера, Мелбурн и Сиднеј. Според светските медиуми, станува збор за Савас Аван, на кој му се заканува максимална затворска казна од 10 години. Австралиецот со турско потекло е осомничен за испраќање опасни пратки по пошта и е изведен пред суд.
Во средата неколку конзуларни службеници повикаа итни полициски тимови за сомнителни пратки. Според дел од медиумите, пакетите содржеле азбест, градежен материјал што може да предизвика рак. Полицијата не изнесува детали како пратките со азбест и бетон биле пакувани и кој би можел да биде мотивот за тоа.
Според информациите од локалните медиуми, конзулатите што примиле сомнителни пратки се Обединетото Кралство, Индија, Грција, Јужна Кореја, Италија, Шпанија и Франција. Сомнителни пакети се пронајдени и во конзулатите на САД, Швајцарија, Пакистан и на Нов Зеланд во Мелбурн, но и во дипломатските претставништва на Грција, Франција и Хонг Конг.
По информациите за сомнителни пратки беа евакуирани голем број конзулати и амбасади. Противпожарната бригада во Мелбурн соопшти дека е повикана на „низа инциденти“ ширум градот. Од конзулатот на Нов Зеланд велат дека пакетите имале ознака „азбест“, а во нив се наоѓала пластична кеса за сендвичи со непознат влакнест материјал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Дмитриј Песков: Москва се придржува до идејата на Путин за создавање тампон зона во Украина
Москва се придржува до идејата на рускиот претседател Владимир Путин за создавање тампон зона во Украина за заштита од оружје со долг дострел, изјави на прес-конференција портпаролот на Кремљ, Дмитриј Песков.
„Што се однесува до тоа, ништо не е променето“, рече тој одговарајќи на новинарско прашање, пренесе ТАСС.
Портпаролот на Кремљ додаде дека прашањето за борбата против оружјето со долг дострел доставено до Украина и потенцијалните напади врз областите во кои тие се концентрирани е „прилично во надлежност на вооружените сили“.
Свет
Евакуација на две села во Русија поради поплави, стабилнo во Удмуртија
Во областа Абат во руската област Тјумен во тек е евакуација на жителите на две села поради поплави, ситуацијата во Удмуртија се стабилизира, а водостоите на реките во тој руски регион се намалуваат, соопштија официјални лица.
Жителите на селата Назарово и Јурга во областа Тјумен се евакуираат со бродови, пренесе „Интерфакс“.
Официјални лица соопштија дека нивото на водата во реката Лоза во руската Удмуртска Република, која поплави 120 станбени области во регионалниот центар Игра, се намали речиси 120 сантиметри.
Свет
Авион со 200 луѓе слета во Јапонија, по слетувањето, почна да чади
Јапонскиот државен радиодифузен сервис NHK објави дека се издигнал чад од авионот на All Nippon Airways, кој денеска слета на аеродромот „Шин Читозе“ во Јапонија.
Летот 71 полета од аеродромот „Ханеда“ во Токио со 200 луѓе. Нема извештаи за повредени.
NHK јавува дека чадот, кој се гледал од пределот на крилата по слетувањето, исчезнал кога моторот престанал да работи. Причината за чадот може да биде истекување нафта, според NHK. Индикаторот во пилотската кабина покажа губење на притисокот на маслото во системот што го контролира авионот.
Една од двете писти на аеродромот „Читосе“ беше затворена по инцидентот.
Во јануари, авион на „Јапонија ерлајнс“ и авион на крајбрежната стража се судрија на аеродромот „Ханеда“ и се запалија. Сите 379 патници и членови на екипажот на JAL се евакуирани, но загинаа пет члена од авионот на крајбрежната стража.