Европа
Украинска пратеничка: Руски војници сексуално напаѓаат жени
Украинска парламентарка алармира поради извештаите дека руски војници силуваат и сексуално напаѓаат жени за време на инвазијата на нејзината земја.
Марија Мезенцева рече дека Украина нема да молчи за овие злосторства.
Во телевизиско интервју Мезенцева се осврна на случајот од Бровари, источно предградие на Киев, каде што една жена била силувана пред очите на своето дете. Во средата генералниот обвинител Ирина Венедиктова изјави дека властите го истражуваат нападот и дека Украина ѝ соопштила на Русија дека е издаден налог за апсење на дотичниот војник, објави „Гардијан“.
„Има еден случај за кој во последно време наголемо се зборува бидејќи е снимен и инициран од Обвинителството, а да не навлегуваме во детали, тоа е многу застрашувачка сцена кога цивил беше убиен во својата куќа во мало гратче во близина на Киев“, изјави Мезенцева.
Неговата сопруга – извинете, но морам да го кажам ова – неколкупати била силувана пред своето малолетно дете, рекла таа.
По нападот, се верува дека војникот му се заканувал на детето.
Мезенцева, шеф на постојаната делегација на Украина во Парламентарното собрание на Советот на Европа, рече дека таквите случаи мора да се евидентираат бидејќи правдата мора да победи. Силувањето и сексуалниот напад се сметаат за воени злосторства и кршење на меѓународното хуманитарно право.
Мезенцева посочи дека ваквите случаи се недоволно пријавени и дека се надева оти Обединетото Кралство ќе ја пренесе својата експертиза за тоа како да се поддржат жртвите по злосторството.
„Има многу повеќе жртви од само оваа што ја најави јавниот обвинител. И, секако, очекуваме уште многу од нив, кои ќе бидат јавни кога жртвите ќе бидат подготвени да зборуваат за тоа“, истакна таа.
Претходно овој месец, друга украинска пратеничка, Лесија Василенко, им кажа на британските парламентарци дека руски војници силуваат и сексуално напаѓаат жени.
„Имаме пријави за групно силување жени. Овие жени обично се оние што не може да излезат. Станува збор за повозрасни граѓани. Повеќето од овие жени биле или егзекутирани по силувањето или си ги одзеле животите“, рече таа.
Дефинитивно, нема да молчиме“, додаде Мезенцева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.