Европа
Украински министер: Русија трпи пораз по пораз, затоа се откажаа од ултиматумот
Наредбата на рускиот претседател Владимир Путин да се стават руските нуклеарни сили во готовност е пресметан обид за притисок пред почетокот на преговорите, но Киев не може да биде заплашен, соопшти Украина.
Украинскиот министер за надворешни работи, Дмитро Кулеба, исто така рече дека Русија се откажала од своите предуслови за почеток на преговори бидејќи украинската војска ја забавила нејзината офанзива. Тој додаде дека Украина ќе слуша што Русија има да каже.
Украинскиот претседател Володимир Зеленски изјави дека Русија се согласила на преговори на белоруската граница во близина на реката Припјат, што ќе бидат први преговори откако Русија ја започна инвазијата на Украина во четвртокот.
Веднаш не беше јасно кој ќе ги претставува страните во преговорите кои се закажани за утре (понеделник). Украинските медиуми соопштија дека Украина ќе го испрати на состанок заменикот на Кулеба.
„Оваа најава, оваа наредба ја гледаме како обид да се подигне влогот и да се изврши дополнителен притисок врз украинската делегација, но нема да попуштиме пред притисокот“, рече Кулеба.
Украина тврди дека Русија веќе изгубила илјадници војници, но точниот број не може да се утврди од независни извори, а Русија не објави свои податоци.
„Сакам да потсетам дека само пред неколку дена, кога започна војната, Русија воопшто не беше заинтересирана за преговори. Откако претрпеа загуби и откако нивниот блицкриг не успеа, Русија почна да зборува за тоа“, рече Кулеба.
„Додека Русија продолжи да страда, а руската армија трпеше пораз по пораз, барањата, предусловите и руските ултиматуми беа ставени на страна и сега ни испратија порака дека само сакаат да разговараат“, додаде министерот, посочувајќи дека Украина нема да препушти ни еден метар од нејзината територија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.