Европа
Француски медиуми: Говорот на Макрон не ги убеди во целост „жолтите елеци“
Новите отстапки што ги најави претседателот на Франција, Емануел Макрон, во своето долгоочекувано обраќање до нацијата допрва треба да го убеди движењето „Жолти елеци”, кои денес продолжуваат да се мобилизираат додека во јавноста сè повеќе се споменуваат нови протести в сабота, пишуваат француските медиуми.
Многу Французи преку социјалните мрежи упатуваа критики до претседателот Макрон за неговиот говор. Како што пишуваат француските медиуми, тоа пред сè се должело на тоа што неговото обраќање било снимено, а не во живо, што според коментарите на граѓаните тоа е недостиг на почит кон народот.
Тие, исто така, прашуваат како ќе се направат некои отстапки, бидејќи тие се уште „не ги допираат богатите”.
Во медиумите утрово може да се видат различни реакции. Весникот „Паризиен” утрово излезе со наслов „Овој пат тој одговори”.
Макрон, кој беше следен од 21 милион луѓе, вети серија отспатки за смирување на кризата што завладеа во земјата по протестите на „жолтите елеци”, вклучувајќи и зголемување на минималната плата од 2019 година, за 100 евра месечно, како и различни бенефиции за вработените и пензионерите со ниски приходи.
Многу експерти веруваат дека без разлика колку тие отстапки може да бидат силни, таквите мерки не успеале во целост да го смират гневот на граѓаните, кои од 17 ноември се мобилизирани низ целата земја, а секоја сабота организираат и протести во поголемите градови, пишуваат француските медиуми.
„Жолтите елеци“ велат дека вратите кај властите се отворени, но тие ќе продолжат да се борат.
Опозицијата беше меѓу првите со реакција. Лидерот на радикалната левица, Жан-Лик Меланесон, веќе реагираше на повикот за продолжување на протестот.
Претседателката на екстремната десница, Марин ле Пен, изјави дека е добро што Mакрон се откажува од некои даноци, но истакна дека претседателот одбива да признае дека луѓето го оспоруваат моделот за кој тој се залага.
Претседателот на синдикатот ЦГТ, Лоран Берже, рече дека Maкрон не го разбирал гневот поради тоа што нуди краткорочни решенија.
Од политичка страна, премиерот Едуар Филип денеска ќе се обрати во парламентот, додека разни министри се поканети во голем број медиуми да одговорат на прашањата на граѓаните.
Макрон денеска ќе има средба со претставниците на банкарскиот сектор и со претставници на големи компании, а според тамошните медиуми тој ќе ги замоли да учествуваат во заедничкиот напор во решавање на кризата, која се смета за најголема од неговото доаѓање на власт во мај 2017 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Возачот на „Фликсбас“ осомничен за убиство од небрежност во Германија
Против возачот на автобусот кој вчера се преврте на германскиот автопат при што загинаа четири лица, а многумина беа повредени, се води истрага за убиство и нанесување телесни повреди од небрежност, соопштија од јавното обвинителство.
Портпаролот на канцеларијата не можеше да каже дали мажот (62) веќе бил сослушан.
Двокатниот европски превозник „Фликсбас“ со 54 лица, меѓу кои и двајца возачи, излетал од автопатот А9 во близина на Лајпциг во средата наутро и се превртел. Автобускиот оператор претходно пријавил дека во автобусот имало 55 лица. Полицијата соопшти дека загинале четири лица, а шест лица се тешко повредени, а 29 лица се полесно повредени.
Не се соопштени детали за здравствената состојба на повредените.
Инспекторите во моментов се фокусирани на утврдување на причините за несреќата. Сите повредени кои се наоѓаат во болница ќе бидат испрашани, доколку тоа им го дозволи здравствената состојба, изјави портпаролката на полицискиот штаб во Лајпциг како одговор на истрагата.
Ќе се нареди и извештај за анализа на автобуската несреќа, соопштија од јавното обвинителство. Првите резултати се очекуваат само за неколку недели.
Идентитетот на четворицата загинати се уште не беше утврден до четвртокот напладне.
„Се трудиме и се надеваме дека ќе можеме да дадеме информации за тоа во попладневните часови“, изјави портпаролката на полицијата.
Автобусот патувал од Берлин до Цирих.
Европа
(Аудио) Кралот Чарлс ја испрати првата јавна порака по дијагнозата на здравјето на Кејт
Порака од кралот Чарлс беше емитувана денеска по повод годишната служба на Величетврток.
Аудиообраќањето на Чарлс беше емитувано на собранието во катедралата „Ворчестер“ во негово отсуство поради тековното лекување на ракот на монархот.
Тој им порача на сите „да ја подадат раката на пријателството“.
„Актот на богослужба, овде во катедралата ‘Ворчестер’, ме потсетува на заклетвата што ја дадов на почетокот на моето крунисување да го следам примерот на Христос ‘да не ми служат, туку да служам’“, рече кралот.
„Тоа е она што секогаш се трудев да го правам и правам со целото мое срце“, додаде тој.
Кралот дојде на тронот пред 18 месеци, а на почетокот на годината му беше дијагностициран рак поради што беше подложен на хемотерапија.
Европа
Заменик-началникот на генералштабот: Британија може да се бори со Русија само 2 месеца
Британските вооружени сили мора да управуваат со оперативниот ризик, што произлегува од недостигот на ресурси што би сакале да ги имаат во идните војни, пишува „Телеграф“.
Информациите се појавија откако Грант Шапс, министерот за одбрана, им рече на пратениците дека лобирал кај премиерот, Риши Сунак, и министерот за економија и финансии, Џереми Хант, повеќе пари во буџетот да се потрошат за одбраната, но не успеал да обезбеди зголемување.
За време на сослушувањето пред пратениците во Комитетот за одбрана на долниот дом, висок офицер на кралските маринци рече: „Ние бевме многу јасни дека сумата што моментно ја трошиме за муниција не ги покрива трошоците во сите области и заканите со кои се соочуваме“.
„Бевме јасни дека треба да потрошиме повеќе пари над буџетот, на она што го нарекуваме интегрирани противвоздушни ракети“.
На прашањето на Марк Франсоа, поранешен министер за вооружени сили, дали е вистина оти Обединетото Кралство „не може да се бори со Владимир Путин повеќе од неколку месеци во целосна воена ситуација поради недостиог на резерви муниција и опрема, Шапс додаде дека секој таков конфликт ќе се води заедно со сојузниците од НАТО, кои заедно би можеле да ја совладаат Русија, наместо само Велика Британија.
„За луѓето што гледаат и слушаат дека Велика Британија не е подготвена за војна исклучиво со Русија, важно е да разберат дека сме во НАТО и постои меѓусојузнички одбранбен договор Член 5, така што никогаш не би биле во таква ситуација“.
Во еден извештај пратениците рекоа дека на вооружените сили им требаат повеќе средства за „учество во операции додека развиваат воена готовност“ или ќе мора да го намалат „оперативниот товар“ на војската.
Поранешните воени началници на комитетот му кажаа дека вооружените сили се ослабени од 2010 година и дека „во конфликт со еднаков противник тие ќе бидат исцрпени по првите неколку месеци од распоредувањето“.
Шапс исто така им рече на пратениците дека лекциите научени од војната во Украина ја покажале важноста на војната со беспилотни летала бидејќи е смртоносна и евтина.
„Ова во Украина е веројатно првата вистинска војна со беспилотни летала и мислам дека никогаш повторно нема да видиме војна која не вклучува тешка употреба на беспилотни летала“, рече тој.
Минатиот месец Обединетото Кралство објави дека, заедно со Латвија, ќе ја предводи новата коалиција за испорака на илјадници беспилотни летала „камикаѕе“ во Украина во услови на растечки недостиг на муниција на фронтот.
„Дроновите ги нарушуваат нормалните факти за војната. Обично секоја генерација станува поскапа за да има смртоносен ефект, но всушност беспилотните летала, кои понекогаш чинат неколку илјади фунти, може да бидат крајно смртоносни“, рече Шапс.
Сепак, тој предупреди дека „основното војување и муницијата“ остануваат важни во секој иден конфликт.