Европа
Хари и Ендру нема да присуствуваат на настанот на балконот на Бакингемската палата
Кралицата Елизабета планира следниот месец да присуствува на големите прослави по повод нејзиниот платинест јубилеј, 70 години на британскиот трон, соопшти денеска Бакингемската палата.
Се наведува и дека двајца членови на кралското семејство, принцовите Ендру и Хари, ќе бидат исклучени од еден од традиционалните настани по тој повод, пренесува „Ројтерс“.
Кралицата Елизабета во февруари прослави седум децении на тронот, а на почетокот на јуни оваа прослава кулминира со четиридневниот викенд „Платина јубилеј“ во Велика Британија.
Елизабета (96) има проблеми со движењето, а повеќето нејзини јавни ангажмани мораше да бидат откажани, но Бакингемската палата објави дека кралицата планира да биде на многубројни настани, наведува британската агенција.
„Нејзиното височество со нетрпение го очекува викендот и ќе учествува на прославата, но нејзиното присуство нема да биде потврдено додека не се приближи времето, па дури и самиот тој ден“, изјави портпаролот на палатата.
Четирите дена на прославување почнуваат на 2 јуни со годишна воена парада во центарот на Лондон по што ќе следува служба за Денот на благодарноста во катедралата „Свети Павле“, концерт пред Бакингемската палата и свечена поворка во британската престолнина во наредните денови.
Една од карактеристиките на овие настани е собирањето на кралското семејство, кое гледа и мавта од балконот на палатата, наведува „Ројтерс“.
Но, кралицата одлучила нејзиниот син, принцот Ендру, и внукот, принцот Хари, кој дал оставка од јавната функција, да не бидат на балконот.
„По внимателно разгледување, кралицата одлучи дека годинешниот традиционален настап на балконот ќе биде ограничен на нејзиното височество и на оние членови на кралското семејство, кои моментно преземаат службени јавни должности во име на кралицата“, изјави портпаролот на палатата.
Принцот Хари и неговата сопруга Меган најавија дека ќе присуствуваат на прославите по повод 70-годишнината од тронот на кралицата Елизабета во јуни, соопшти денеска неговиот портпарол.
„Принцот Хари и Меган, војводата и војвотката од Сасекс, се возбудени и почестени што присуствуваат на платинестиот јубилеј на кралицата со нивните деца овој јуни“, се вели во соопштението на портпаролот, пренесе „Ројтерс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.