Свет
Шведска: Исчезнале илјадници мигранти од кризата во 2015 година
Околу 24.000 мигранти кои пристигнале во екот на мигрантската криза во 2015 година живеат во Шведска без дозвола или исчезнале, велат од Одборот за миграција, пренесува шведскиот радиодифузер СВТ.
Од 163.000 мигранти кои пристигнале во Шведска пред пет години, на огромното мнозинство, 98.500, им бил одобрен некаков вид престој. Сепак, само 31.000 од оние без дозвола ја напуштиле Шведска од 2015 година, а на илјадници мигранти им нема трага.
Десет илјади мигранти остануваат во земјата без дозвола за престој. Други 14.000 исчезнале, а шведските власти не знаат каде се. За други 8.000 се вели дека се во процес на решавање на барањето за азил; многу од нив аплицирале за азил повеќе од еднаш.
Претходно годинава беше објавено дека најмалку 18.420 од оние кои добија престој во 2015 година сега добиле шведско државјанство, овозможувајќи им слободно движење низ земјите членки на ЕУ.
Огромното мнозинство од оние кои добиле државјанство се малолетни мигранти бидејќи Шведска им дозволува на малолетните мигранти да чекаат само три години за да добијат државјанство или две години ако детето е апатрид. Возрасните мора да чекаат најмалку пет години пред да аплицираат за државјанство или четири ако се апатриди или имаат статус на бегалец.
Во последната деценија Шведска додели 1,2 милиони дозволи за престој. Масовната миграција е главниот двигател зад растот на населението во земјата во последниве години.
Сепак, мигрантите имаат многу поголема стапка на невработеност отколку родените Швеѓани. Извештајот од 2019 година тврди дека дури 90 отсто од мигрантите кои дошле во 2015 година и добиле дозволи за престој не биле во можност да се издржуваат самостојно преку работа.
Во 2020 година, главно поради ограничувањата на патувањата за запирање на ширењето на Ковид-19, Шведска забележа најнизок раст на населението во последните 15 години. Коронавирусот исто така доведе до највисока стапка на смртност во земјата од големиот глад во 1869 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Свет
Шефот на НАТО: Никој нема корист од војната на Блискиот Исток
Генералниот секретар на НАТО Јенс Столтенберг изрази загриженост за ситуацијата на Блискиот Исток по израелскиот напад врз Иран.
„Клучно е конфликтот да не излезе од контрола и затоа ги повикуваме сите страни на воздржаност“, изјави Столтенберг денеска во Брисел. „Никој нема корист од војната на Блискиот Исток“, рече тој.
Израел го нападна иранскиот Исфахан
Според извештаите на медиумите, Израел ја нападнал иранската провинција Исфахан рано во петокот како одговор на големиот ирански напад со беспилотни летала и ракети минатиот викенд.
Според израелскиот весник Jerusalem Post, нападот бил насочен кон воздушна база во Исфахан, недалеку од иранските нуклеарни постројки. Сепак, според Меѓународната агенција за атомска енергија (МААЕ), нуклеарните капацитети не биле погодени.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.