Свет
Јужна Кореја објави рекорден број новозаразени од коронавирусот
Втор ден по ред Јужна Кореја пријавува рекорден број нови инфекции со коронавирус, а зголемениот број хоспитализирани и починати го зголемува притисокот врз здравствениот систем.
Властите објавија 5.266 нови инфекции со коронавирус, од кои 4.100 се регистрирани во Сеул и околните области, каде што е исполнет повеќе од 90 отсто од капацитетот на одделот за интензивна нега на ковид-пациенти.
Во тешка или критична состојба рекордни 733 пациенти се заразени од коронавирусот, најмногу од почетокот на пандемијата. Во последните 24 часа починале 47 пациенти.
Брзото ширење на коронавирусот благодарение на делта-сојот доаѓа во време кога се појавува нова омикрон-варијанта на коронавирусот, која се смета за потенцијално позаразна од претходните и предизвикува загриженост дека пандемијата ќе трае.
Вчера, Јужна Кореја ги пријави првите пет инфекции со омикрон-сојот, регистрирани кај лица поврзани со пристигнувања од Нигерија, поради што владата ја зајакна граничната контрола.
Сите патници што доаѓаат од странство во следните две недели, без разлика на нивното државјанство и без разлика дали се вакцинирани или не, ќе мора да одат во карантин најмалку десет дена.
Владата во неделата забрани влез за странски патници од осум јужноафрикански земји и сега ја додаде Нигерија на листата.
Јужнокорејските власти планираат да ги тестираат сите меѓународни патници позитивни на коронавирусот.
Секој што ќе дојде во близок контакт со лице заразено од сојот омикрон ќе мора да биде ставено во карантин најмалку две недели, дури и ако е целосно вакцинирано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Ќе го блокираме полноправното членство на Палестина во ОН, тие треба да преговараат со Израел
САД ќе гласаат против палестинската кандидатура за полноправно членство во Обединетите нации и ќе ја блокираат светската организација да признае палестинска држава.
„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа со поддршка на САД и други партнери“, рече американскиот претставник.
Планирано е 15-члениот совет да гласа за нацрт-резолуцијата со која се препорачува на Генералното собрание на ОН од 193 држави „Државата Палестина да биде примена во членство во ОН“.
За да усвои резолуцијата, потребни се најмалку девет гласа и никакво вето од САД, Велика Британија, Франција, Русија или Кина. Дипломатите проценуваат дека резолуцијата би можела да собере 13 гласа, што би ги принудило САД да стават вето.
„Одамна јасно ставивме до знаење дека предвремените акции во Њујорк, дури и ако се во најдобар интерес, нема да резултираат со државност за палестинскиот народ“, рече американскиот функционер. Палестинците во моментов имаат статус на набљудувач не-членка, што е де факто признавање на државноста доделена од Генералното собрание на ОН во 2012 година.
Меѓутоа, барањето за полноправно членство мора да биде одобрено од Советот за безбедност, а потоа од најмалку две третини од членовите на Генералното собрание. Засилените напори на Палестина за полноправно членство дојдоа шест месеци по масакрот на Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.
Генералниот секретар на ОН, Антонио Гутереш, смета дека „повеќе од кога било, неопходно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Европа
Уапсен Полјак: „Планирал убиство на Зеленски“
Маж од Полска е уапсен под обвинение дека бил подготвен да шпионира за руското воено разузнавање и да и помогне да го испланира убиството на украинскиот претседател Володимир Зеленски, соопштија полските обвинители, а пренесе Асошиетед прес.
Полското национално обвинителство соопшти дека мажот, идентификуван само како Павел К., бил обвинет дека сакал да ги пренесе безбедносните информации на аеродромот на руски агенти и бил уапсен вчера во Полска.
Човекот побарал контакт со Руси директно вклучени во војната во Украина и се очекувало да пренесе детални информации за аеродромот Жешов-Јасионка во југоисточна Полска, во близина на границата со Украина, кој е портата за меѓународни воени и хуманитарни снабдувања за Украина. Аеродромот е под контрола на американски војници.
Доколку биде прогласен за виновен, тој може да добие и до осум години затвор, се вели во соопштението за печатот.
Обвинителите рекоа дека апсењето е резултат на блиска соработка со обвинителите и безбедносните служби на Украина, кои обезбедија клучни докази. Членката на ЕУ, Полска е цврст поддржувач на соседна Украина и Зеленски во одбрана од руската агресија повеќе од две години.