Јужна Кореја смета дека лидерот на Северна Кореја, Ким Џонг-ун, е жив и здрав и покрај шпекулациите дека е тешко болен или мртов, соопштија официјални лица.

„Ставот на нашата влада е цврст. Ким Џонг-ун е жив и здрав. Тој престојува во областа Вонсан од 13 април. Досега не се откриени никакви сомнителни движења“, изјави Мун Чунг-ин, висок советник за надворешна политика на Јужна Кореја, за Си-ен-ен.

Тврдењата од соседството на контроверзниот лидер додаваат конфузија за севернокорејскиот моќник, кој во последните денови е предмет на спротивставени извештаи дека починал, некои известуваат дека бил во вегетативна состојба, а  Јужна Кореја тврди дека е добар.

Тврдењето на Јужна Кореја го поткрепува и веста дека Ким Џонг-ун им се заблагодарил на градежниците што работат во источниот крајбрежен регион Вонсан, пренесува главниот весник на земјата „Родонг Синун“. Според медиумите од Сеул, сличен извештај објавила и корејската Централна радиодифузна станица.

„Врховниот лидер Ким Џонг-ун им упати благодарност на работниците кои се посветија на изградбата на туристичката зона Вонсан-Калма“, пишува „Родонг Синмун“.

Вонсан-Калма е туристичка зона во изградба, што Ким Џонг-ун внимателно ја набљудува. Тој и претходно во февруари им упати слична честитка на локалните градежници.

Во саботата,ж американскиот тинк-тенк „38 норт“ објави дека сателитските снимки покажале воз, кој наводно им припаѓа на севернокорејскиот лидер и неговото семејство, паркиран во областа на елитното одморалиште на 21 и 23 април.

Шпекулациите за смртта на Ким Џонг-ун беа поттикнати од неговото отсуство од долгоочекуваната прослава на 88-годишнина од постоењето на Северна Кореја минатата недела. Новите извештаи од Јапонија тврдат дека Ким е мртов, а други извештаи тврдат дека Кина испратила лекари за да му помогнат на критично болниот азиски лидер.

Според Си-ен-ен, официјалната вест за евентуалната смрт на Ким, најверојатно, би дошла од севернокорејските државни медиуми, иако објавата на смртта на неговиот татко, Ким Јонг-ил, дојде најмалку четири дена откако поранешниот диктатор почина од срцев удар.

Ким ја презеде власта по смртта на својот татко. Меѓу можните наследници е и сестрата на Ким, Ким Јо Јонг, која би станала првиот женски лидер на републиката.

„Голем женски лидер би бил брз преседан и шокантна новина, но нема да биде ерес. Потребата да се задржи моќта во семејството е најважно од сè, вклучително и какви било традиции на шовинизам и мизогинија во Северна Кореја“, изјави за Си-ен-ен севернокорејскиот експерт од Универзитет „Тафт“, Сунг-Јун Ли.