Свет
Ќерката го обвинила својот татко за убиство на 70 жени: еден од најмасовните убијци во САД
Полицијата во американската сојузна држава Ајова почна истрага откако Луси Студи го обвини нејзиниот татко Доналд за убиство на 70 жени.
Таа ѝ кажала на полицијата дека знае каде се наоѓаат телата. Тврди дека нејзиниот покоен татко, Доналд Дин Студи, бил сериски убиец кој со години убивал жени. Овој покоен фармер наводно ги принудил своите деца да му помогнат да ги фрли телата на жените во бунарот.
Таа раскажала дека нејзиниот татко бил алкохоличар кој сакал да убива жени, удирајќи ги до смрт во главата и другите делови од телото.
Локалниот шериф потврди дека кучињата трагачи откриле најмалку четири можни места за масовни гробници на нивниот имот.
Доналд починал во 2013 година, а обвинет е за убиство меѓу 50 и 70 жени, како и двајца мажи. Двете негови сопруги починале, а полицијата соопшти дека и двете извршиле самоубиство. Едната се задавила со сајла, а другата се застрелала. Ако наводите на неговата ќерка се покажат како точни, Доналд ќе стане еден од најмасовните убијци во САД.
Луси тврди дека сите жени кои ги убил имале темна коса, светла кожа и дека повеќето биле на 20-ти и 30-ти години. Таа тврди дека сите жртви биле закопани облечени и со накит, а потоа додала дека нејзиниот татко сакал да ги чува златните заби на жртвата како трофеи.
„Кога дојде дома и ни рече да одиме до бунарот, точно знаевме што значи тоа. Секогаш моравме да молчиме бидејќи се плашевме и нас да не нè убие – вели Луси, пишува „Дејли меил“.
Таа додава дека нема чувства кон нејзиниот покоен татко.
„Сакав додека беше жив да го добие заслуженото, но него веќе го нема. Сакам да им помогнам на семејствата на жртвите да ги најдат нивните тела и да ги погребаат“ – вели таа.
Шерифот на полицијата изјави дека рушењето на бунарот ќе чини 25.000 долари, додека реновирањето на целиот имот ќе чини најмалку 300.000 долари. Имотот во Ајова каде што живеел Доналд сè уште не се третира како место на злосторство бидејќи сè уште не е пронајдено никакво тело.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.