Обилните врнежи и наглото топење на снегот се главни причини за поплавите што во последните неколку месеци погодија повеќе делови на Европа

Обилните врнежи и наглото топење на снегот се главни причини за поплавите што во последните неколку месеци погодија повеќе делови на Европа.

Повеќе 40 луѓе ги загубија животите во незапамтените поплави и лизгање на земјиште на португалскиот остров Мадеира во февруари предизвикани од повеќечасовните обилни дождови. Најголемиот дел од жртвите загинале од рушевините на своите куќи.  Хоспитализирани беа 100-тина луѓе. Ветерот со брзина од 100 километри на час и силните наноси од вода и кал носеа пред себе автомобили, мостови и откорнати стебла. Голем број улици беа блокирани, а некои места беа отсечени од светот. Некои делови на островот се без струја, а во прекин се и телефонските врски. Најкритично беше во градот Фуншал, каде улиците целосно беа поплавени, а многу семејни куќи беа затрупани од земја.

Наглото топење на снегот на почетокот на јануари во Хрватска предизвика повеќе делови на земјата да бидат поплавени. Состојбата беше најлоша во долината на Неретва, каде што поради високиот водостој на реката во неколку места беше прогласена вонредна состојба.

Повеќе од 3.400 луѓе беа евакуирани во областа Скадар во северна Албанија во средината на февруари, која по тешките дождови беше погодена од поплави. 8.680 хектари земјиште беа поплавен во северниот дел на Албанија поради големите дождови што ги принуди властите да ги отворат браните на хидроелектраните. Поплавени беа и делови на автопатот Скадар-Тирана и Скадар-Кукс.

Еден човек загина во поплавите кои во ноември лани ја зафатија југозападна Србија. Во неколку српски градови беше прогласена вонредна состојба. Стотици луѓе беа евакуирани, а надојдените реки поплавија стотици куќи и други објекти. Надојдената вода урна неколку мостови, а отсечени беа и голем број патишта. Илјадници домаќинства во неколку градови останаа без вода за пиење.

Грција, исто така, кон крајот на минатата година беше погодена од поплави во кои загина едно лице. Телото на 41-годишниот маж беше извадено од Егејско Море во реонот на градот Волос. Тој се удавил откако се превртел неговиот чамец.. Во надојдената вода на реката Есон во реонот на Пиерија потонаа повеќе автомобили од кои се спасени десет лица. Поради обилните дождови, поплавени беа многу куќи и продавници, а инфраструктурата, складиштата и системот за наводнување претрпеа значителна материјална штета во областите Пиерија и Иматија. Голем дел од патиштата во овие области беа затворени.

Поплавите што ги зафатија североисточните делови на Турција во ноември, предизвикуваа големи хаварии. Бројот на жртвите постојано растеше од се почестите лизгања на земјиштето, како и од уривање на домовите. Луѓето беа немоќни да го спречат лизгањето на земјиштето, предизвикано од поројните дождови. Сликите од градот Трабзон, пак, покажуваа поплавени продавници и мошне оштетени патишта и згради. Уште четири луѓе загинаа во североисточна Турција по силните поплави. Во соседната област Ризе обилните врнежи од снег ги затворија патиштата. /крај/ач