Свет
Анализа на СТРАТФОР: Авганистан по заминувањето на генерал Мекристал
Американскиот претседател Барак Обама во среда ја прифати оставката на човекот кој тој самиот го избра минатата година за да ја спроведе новата стратегија за Авганистан и да ја заврши војната во таа земја. На некој начин, командантот на американските сили
Американскиот претседател Барак Обама во среда ја прифати оставката на човекот кој тој самиот го избра минатата година за да ја спроведе новата стратегија за Авганистан и да ја заврши војната во таа земја. На некој начин, командантот на американските сили во Авганистан и на Меѓународните сили за асистенција при безбедноста (ИСАФ), предводени од НАТО, генерал Стенли Мекристал, му остави на претседателот многу малку избор по отворено критичките изјави за високи функционери во администрацијата, дадени во рамките на интервјуто за магазинот „Ролинг стоун“.
Но, она што е битно во оваа вест е дека претседателот Обама не се разбуди во понеделникот со намера, или мисла, да го смени Мекристал во наредните денови. Тој си имаше доволно грижи со нафтената дамка и домашната економија. И така, иако во Вашингтон деновине не недостасуваа теории на заговор поврзани со смената, факт е дека оставката на генералот се должи само и единствено на написот во „Ролинг стоун“, кој во продавниците треба да се појави во петок.
Обама дури и застрани од суштината на говорот кој го држеше во Роуз Гарден во средата, за да го истакне континуитетот на напорите во Авганистан и на стратегијата зад нив со тоа што објави дека шефот на централната команда на САД (ЦЕНТЦОМ), генерал Дејвид Петраус ќе го замени Мекристал. Секако, имајќи го предвид фактот дека Петраус е толку проминентна фигура во контра-востаничката парадигма на која и се приклучи и Мекристал и бидејќи Петраус одигра клучна улога при формулирањето, лобирањето и имплементирањето на тековната американска стратегија во Авганистан, тешко е да се замисли друг потенцијален кандидат за таа работа кој толку целосно би го отелотворувал континуитетот.
Но, војните не можат да се свртат по порачка. Статусот на војната не се преоценува за 24 часа: за тековната стратегија беа потребни шест месеци дискусии и дебати. Претседателот сигурно не си ги одбира теренските команданти за 24 часа, освен ако апсолутно не мора. А бидејќи командувањето со војната во Авганистан и водењето на ЦЕНТЦОМ се секоја за себе и отповеќе работа за еден човек, никој нема да може сам да ги работи и двете. Затоа, останува целосно нејасно дали ова е конечната командна структура.
Главната поента е дека висок офицер е сменет затоа што неговото однесување доведе до тоа. Оставката на Мекристал не претставува промена на стратегијата, но тоа тешко дека значи оти се е во ред со оваа стратегија. На пример, одложувањето на долго очекуваната офанзива во Кандахар се чини симптоматично за некои подлабоки стратешки проблеми. Слично на ова, акцентот ставен на континуитетот на стратешките намери не гарантира мазна транзиција на командата.
Оваа промена на командата доаѓа во време кога талибаните сметаат дека ја добиваат војната, а на западот се зголемува перцепцијата дека НАТО ја губи истата, а Авганистанците и натаму остануваат крајно скептични кон владата во Кабул и интервенцијата на САД во Авганистан.
Перцепцијата е од критично значење во оваа војна. САД мора да се здобијат со следбеници во Авганистан, покрај општо познатиот факт дека САД нема долго да останат во регионот. Натаму, останува да се види како оваа смена ќе биде прифатена и толкувана од сите во Авганистан, од лидерот на талибаните, Мула Омар, до претседателот Хамид Карзаи и од локалните Авганистанци, до американските критичари. А на Американците им е доволно тешко во Авганистан и без последниве настани.
На крајот на денот, без оглед на тоа кој е главен, интервенцијата во Авганистан предводена од Американците останува тешко оптоварена со ограничените можности за успех. Оттаму, нашите погледи повторно се враќаат на завршувањето на војната и на ефективноста на стратегијата која служи како предводник на тој напор. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Си-Ен-Ен: Остин разговараше со Галант пред нападот на Иран, Вашингтон не ја поддржува оваа акција
Американскиот секретар за одбрана Лојд Остин разговараше во четвртокот со израелскиот министер за одбрана Јоав Галант за „регионалните закани и дестабилизирачките дејства на Иран на Блискиот Исток“, соопшти Пентагон.
Повикот бил упатен пред Израел, како што пренесуваат медиумите, да изврши напад внатре на територијата на Иран, а во соопштението на Пентагон не се споменува никаква дискусија за плановите на Израел за овој напад, пренесува Си-Ен-Ен.
Неименуван висок американски функционер изјави за Си-Ен-Ен дека Израел во четвртокот ја информирал Америка дека во наредните денови ќе возврати на нападот на Иран минатиот викенд и дека Вашингтон не ја поддржува оваа акција на Тел Авив.
Тензиите меѓу Тел Авив и Техеран се зголемија по нападот на Иран врз Израел на 13 април, со повеќе од 300 беспилотни летала и проектили. Неименуван американски функционер претходно за Си-Ен-Ен изјави дека Израел утринава извршил напад на иранска територија, а иранската државна телевизија објави дека три беспилотни летала биле забележани над небото во Исфахан и биле уништени откако системот за противвоздушна одбрана на земјата бил активиран.
Новинската агенција „Фарс“ објави дека се слушнале „експлозии“ во близина на меѓународниот аеродром во Исфахан. Провинцијата Исфахан е дом на голема воздухопловна база, голем комплекс за производство на ракети и неколку нуклеарни локации, наведува Би-Би-Си.
Израелската војска соопшти дека „засега нема коментар“ за извештаите за експлозии во Иран. Иранскиот министер за надворешни работи Хосеин Амирабдолахиан изјави неколку часа пред да се слушнат експлозиите дека доколку Израел преземе каква било воена акција, одговорот на Техеран ќе биде „веднаш и на максимално ниво“, пренесува Танјуг.
Свет
Трамп: Опстанокот на Украина е важен за САД
Доналд Трамп рече дека опстанокот на Украина е важен за Соединетите Американски Држави.
Поранешниот претседател поголемиот дел од својата објава на својата платформа „Truth Social“ го посвети на поплаките дека европските сојузници на САД не трошат доволно за поддршка на Украина. Некои десничарски републиканци ја протолкуваа најавата како сигнал дека тој се противи на сегашниот пакет помош, иако Трамп експлицитно не го кажа тоа.
Сепак, објавата се чини дека е едно од првите признанија на Трамп дека опстанокот на Украина е важен безбедносен интерес на САД, оценуваат тие. Минатата година, кога беше прашан за конфликтот во интервју за Си-Ен-Ен, Трамп одби да каже дали сака Украина да ја добие војната со Русија.
„Зошто Европа не може да даде иста сума пари колку што инвестираа САД за да и помогнат на земјата во очајна потреба“, напиша тој.
„Како што сите се согласуваат, опстанокот и силата на Украина треба да ѝ бидат многу поважни на Европа отколку на нас, но тоа е исто така важно за нас“, напиша тој.
Објавата на Трамп дојде еден ден откако ја пофали Полска, по средбата во кулата Трамп во Њујорк со полскиот претседател Анджеј Дуда. Поранешниот претседател и полскиот лидер разговараа за предлогот на Дуда членките на НАТО да трошат најмалку 3 отсто од својот бруто домашен производ за одбрана, изјави претставник на кампањата.
Во моментов од нив се бара да потрошат најмалку два отсто од БДП.
Републиканскиот претседател на Претставничкиот дом на САД, Мајк Џонсон, рече дека тие ќе гласаат за пакетот помош за Украина во сабота, и покрај жестоките приговори од десното крило на неговата пратеничка група.
Свет
(Видео) Светски медиуми: Израелски проектил го погоди Иран
Израел го нападна Иран, јавуваат светските медиуми.
Ројтерс цитираше изјава од три лица запознаени со ова прашање, додека иранските државни медиуми објавија рано денеска дека нивните сили ги уништиле беспилотните летала.
Ова се случува неколку дена откако Иран изврши одмазднички напад со дрон врз Израел. Извор изјави за Ројтерс дека САД не биле вклучени, но дека Израел ги информирал пред нападот.
Иранската новинска агенција „Фарс“ објави дека три експлозии се слушнале во близина на воена база во централниот град Исфахан.
Ирански функционер изјави за Ројтерс дека немало ракетен напад и дека експлозиите се резултат на активирање на иранските системи за противвоздушна одбрана.
Иранската државна телевизија објави дека нешто по полноќ „на небото над Исфахан биле забележани три дронови“.
„Системот за противвоздушна одбрана беше активиран и ги уништи овие дронови на небото“, пренесе медиумот.
Телевизијата подоцна соопшти дека ситуацијата во Исфахан е нормална и дека немало копнени експлозии.
Израелската армија не ги коментираше извештаите.
Си-Ен-Ен пишува дека Израел го извршил нападот внатре во Иран, а тоа го изјавил американски претставник за оваа мрежа.
Си-Ен-Ен тврди дека станува збор за потег кој се заканува со дополнително ескалирање на регионалниот конфликт.