Свет
„Сименс“ ја тужи државата
Германската компанија „Сименс“ ќе ја тужи Владата за наводните нерегуларности на неодамна реализираниот тендер за пасоши, велат извори од компанијата.
Германската компанија „Сименс“ ќе ја тужи Владата за наводните нерегуларности на неодамна реализираниот тендер за пасоши, велат извори од компанијата.
Станува збор за компанија што со Владата претходно има потпишано договор за стратегиско партнерство вреден една милијарда евра и чија реализација и сите планирани инвестиции во земјава сега се доведени во прашање.
Формално, тужбата се уште не е поднесена бидејќи во компанијата го чекаат официјалното известување со конечното решение и правна поука од владината комисија што пред повеќе од две недели ја отфрли нивната жалба. Најавата од „Сименс“ доаѓа во време кога во Министерството за внатрешни работи се подготвува текст за договорот што треба да се потпише со победничката „Гисеке и Девриент“. Иако „Гисеке“ неодамна го презентира проектот за изработка на нови лични документи, а за нивниот квалитет гарантираше дури германскиот амбасадор Ралф Андреас Бретх, најавата за покренување судска постапка сега го релативизира целиот случај.
Владиниот портпарол Сашо Чолаковски вчера изјави дека немале најави за тужбата од „Сименс“ и одби да ја коментира неофицијалната информација.
Прогнозите се дека судот, ако ги уважи аргументите на „Сименс“ како третопласирана компанија на тендерот, може да го поништи целиот тендер или да ја врати постапката на првата фаза, од каде 12-те компании повторно ќе можат да влезат во трка за тендерот.
– Тендерот е полн со незаконитости, произволности и манипулации, а допрва ќе се востанови колку скапо тој ќе ја чини државата – објаснуваат наши извори.
Тие велат дека и покрај сите инсистирања, на компаниите не им била дадена на увид целокупната тендерска документација, а дознаваме и дека членовите на комисијата работеле под притисок и дека дури и на некои од нив им бил ограничен пристап до документите .
– Дента кога се сумирани бодовите и кога се носеше конечното решение, на седницата на комисијата цело време беше присутен Радивоја Јовановски, советник на министерот за внатрешни работи, кој не е член на комисијата, а законот предвидува да присуствуваат само членовите. На секоја забелешка Јовановски одговарал: „Ма дајте луѓе, ова треба да биде свечен чин“. Тоа не може да не се протолкува како директен притисок – вели нашиот извор.
Тој објасни и дека токму од таа седница немало записник и дека на решението според кое била избрана „Гисеке“ ги немало потписите од сите членови на комисијата. Владината комисија за жалби, сепак не го зела предвид тој, како што се тврди, многу важен факт, како ни сите други укажувања од компаниите.
Д. М.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двегодишното девојче кое исчезна во Србија се бара насекаде, полицијата врши распити на голем број лица
Потрагата по девојчето Данка Илиќ (2), кое во вторникот исчезна во Бањско поле во Бор, се уште трае и не се знае како е можно девојчето да се изгуби. Полицијата ја проверува секоја информација што ќе дојде до нив, сослушани се неколку лица, повторно се разговараше со родителите, но ниту една информација не укажува на тоа што се случило и каде е Данка, пишува „Нова.рс“
Екипата на порталот денеска беше во Бањско поле каде се уште има голем број полицајци. Властите со багер го чистеа теренот околу куќата во која последен пат била видена Данка. Исто така, на имотот е извршено ископување, а јамите повторно се пребаруваат.
Полицијата ја истражува секоја трага што може да укаже на тоа што се случило со девојчето.
„Полицијата разговараше со голем број луѓе, соседи, познаници, се со цел да ја пронајде Данка. Досега ниту една трага не довела до тоа каде е девојчето или што и се случило“, вели изворот на Нова.рс.
Истрагата се одвива во повеќе правци, а денеска полицијата повторно разговараше со родителите на девојчето.
„На вториот ден од нејзиното исчезнување, родителите на девојчето биле во полиција до доцна во ноќта. Тие утрово биле повторно повикани, а исто така цел ден поминале во полициска станица. Не се познати околностите врз основа на кои два дена биле на распит. Извесно е дека родителите вчера имале разговори и со Центарот за социјална работа, а повеќе од тоа не се знае“, додава изворот на „Нова.рс“.
Неофицијално беше објавено и дека полицијата нашла нова трага, односно дупка на местото на кое исчезна девојчето, и дека целото внимание го насочува кон тоа.
Она што е сигурно е дека се проверуваат сите околности и се сослушуваат и сите лица кои можеби имаат сознанија за случајот.
Меѓу нив е и кој бил зад воланот на автомобилот „пунто“ што го снимиле надзорните камери на куќата во Бањско Поље, во моментот на исчезнувањето на малата Данка. Куќата пред која е снимен автомобилот се наоѓа на стотина метри од местото каде исчезна Данка.
На снимката се гледа автомобил кој брза околу 13 часот и 47 минути, а малото девојче исчезнало малку пред тоа, околу 13 часот и 45 минути, како што вели нејзината мајка.
„Ја знам таа жена, ја видов како носи две деца во парк, страшно е што се случи“, велат соседите.
Девојчето Данка Илиќ исчезна во вторникот во Бањско Поље кај Бор. Во средата по 27 часот полицијата ја прекина потрагата и започна друг вид на акција за пронаоѓање на детето. Во ова мало место кај Бор се уште остана одреден број полицајци, а вчера беше блокиран и пристапот до куќата.
Во потрагата по исчезнатото дете се вклучени припадници на Жандармеријата, пожарникари, планинска спасувачка служба, како и голем број доброволци.
Регион
„Само се шалевме“ – уапсените поради тврдењата за исчезнатото девојче се донесени во полиција
Тројцата кои беа уапсени во Босна и Хервеговина, а тврдеа дека имаат информации за исчезнатото девојче од Србија, Данка Илиќ и бараа пари, во полиција рекле дека „само се шегувале“, пренесува Н1 Сараево.
Федералната полициска управа вечерва уапси три лица кои на социјалните мрежи тврдеа дека имаат информации за исчезнувањето на двегодишното девојче од Србија, Данка Илиќ, по коешто трага речиси целиот регион.
Како што јави известувачот на Н1, уапсените биле донесени во зградата на Федералната полициска управа.
Како што се дознава, за време на преносот во живо на „Тик-ток“, тие побарале десетици евра за да ја откријат локацијата на девојчето и тврделе дека ја чуваат во подрумот.
Веднаш по апсењето изјавиле дека „само се шегувале“. Сите уапсени се членови на исто семејство.
Инспекторите на Одделот за компјутерски криминал на Федералната полициска управа преку ИП адресата ги лоцираше лицата кои тврделе дека имаат информации за исчезнувањето на детето.
Вчера на социјалните мрежи се појави видео од надзорната камера на куќа лоцирана во близина на местото каде исчезна Данка Илиќ во 13:45 часот.
На видеото се гледа автомобил кој брза во 13 часот и 47 минути, а малото девојче исчезнало малку пред тоа, односно во 13 часот и 45 минути, како што рекла нејзината мајка.
Свет
Тешка автобуска несреќа во Јужна Африка, загинаа 45 лица
Министерството за транспорт на Јужна Африка денеска соопшти дека 45 лица загинале, а едно лице е повредено во автобуска несреќа кај Маматлакала во северната провинција Лимпопо.
Министерството објави дека возачот изгубил контрола над автобусот, кој потоа удрил во бариерите на мостот, по што возилото паднало преку мостот, удрило во земјата и се запалило.
Автобусот превезувал луѓе од Боцвана до Морија, град во Лимпопо.
Спасувачките операции продолжија до доцна денеска.
Некои тела изгореле до непрепознатливост, а некои патници останале заробени во урнатините на автобусот, соопштија сообраќајните власти во Лимпопо.