Руското Министерство за надворешни работи објави денеска дека протерало двајца вработени во Холандската амбасада во Москва, пренесува РТ.

„ Му кажавме на претставникот на Холандската амбасада дека руската страна донесе одлука, водејќи се од принципот на реципроцитет, да протера од Руската Федерација двајца дипломатски службеници на Холандската амбасада во Москва. Тие ќе бидат обврзани да ја напуштат руската територија во рок од две недели“ се вели во соопштението на руското министерство.

Привремениот холандски амфасадор Јост Рајнтјес беше повикан во руското Министерство за надворешни работи во понеделникот. Министерството го изрази својот решителен протест против неоснованото протерување на двајца руски дипломати од Холандија во декември.

Во декември 2020 година, Руската амбасада во Хаг вети дека ќе возврати откако Министерството за надворешни работи на Холандија прогласи за персона нон грата двајца вработени во руската дипломатска мисија за наводни активности некомпатибилни со нивниот дипломатски статус.

Ирак во неделата му ги предаде на Иран посмртните останки на 55 војници убиени за време на војната меѓу двете земји од 1980 до 1988 година, пренесува „Анадолија“.

Казим Јасери, директор на граничниот премин „Шаламхех“ во ирачката провинција Басра, изјави дека останките на иранските војници се пронајдени во област помеѓу Ирак и Иран во која се водеа битките.

„Претставниците на Меѓународниот комитет на Црвениот крст учествуваа во церемонијата на примопредавање на телата“, додаде Јасери.

Стотици ирански и ирачки војници кои беа убиени во војната 1980-88 година за првпат беа разменети меѓу двете земји во 2003 година, и втора размена имаше во 2008 година.

Американскoто ФБИ истражува дојава дека жена можеби украла лаптоп од канцеларијата на Ненси Пелоси за време на упадот во зградата на Конгресот, со цел да го продаде на Русија.

Против засега неименуваната жена е поднесена кривична пријава, пренесува Си-ен-ен.

Сепак, неофицијално, се работи за 22-годишната Рилеј Џун Вилијамс од Пенсилванија, која е осомничена за влегување во зградата за време на опсадата на Конгресот и за кражба на лаптопот на спикерката на Претставничкиот дом, Ненси Пелоси.

Наводниот сведок им рекол на истражителите дека пријателите на Вилијамс објавиле видео на кое се гледа како таа го краде уредот, додавајќи дека има информации според кои таа сакала да го испрати компјутерот на пријател во Русија, кој потоа планирал да го продаде на руска разузнавачка служба.

Сепак, според сведокот, планот пропаднал од непознати причини, а Вилијамс или сè уште го поседува уредот или во меѓувреме го уништила.

Како што се наведува, целиот случај е сè уште под истрага, а Вилијамс не е уапсена.