Свет
Шверцот на цигари цвета по пазарите
Шверцерите очекуваат бизнисот дополнително да им процвета по новото линеарно поскапување на цигарите од шест денари на 1 април
Шверцерите очекуваат бизнисот дополнително да им процвета по новото линеарно поскапување на цигарите од шест денари на 1 април
„Марлборо“, „лаки“, „бонд“, „бос“, „лорд“…. „Сите видови цигари по најниски цени“. Вака шверцерите на скопските пазари ги мамат граѓаните да купат кутија цигари од под тезга, за „багателна“ цена. На пазарите во земјава цигарите им го одземаат местото на доматите, краставиците и на пиперките. Причината на сите им е јасна. Шверцот со цигари станува многу попрофитабилен бизнис поради поскапувањето на тутунските производи.
Тезгаџиите на еден од пазарите во Скопје на шега велат дека прекупците сега наместо во килограми и во тони размислуваат во кутии. Шверцерите не се плашат да се пофалат дека не можат да постигнат да ги снабдат сите заинтересирани потрошувачи. Очекуваат нивниот бизнис дополнително да процвета по новото линеарно поскапување на цигарите од шест денари на 1 април, бидејќи ќе се зголеми разликата помеѓу цената што тие ја нудат и таа во легалната продажба.
– Откако на први јануари сите цигари поскапеа од 11 до 15 денари, се зголеми бројот на купувачите. Се почесто доаѓаат луѓе и од другиот крај на градот само за да купат цигари. Тоа е нормално бидејќи разликата помеѓу цените на некои видови цигари е речиси двојна. Свесен сум дека шверцот со цигари е штетен за државата, а со тоа и за сите нас, но во услови кога нема друга работа сум принуден да ризикувам. Ќе работам се што е можно, и легално и нелегално, само за да обезбедам храна за моите деца – вели шверцер од скопските пазари.
Надлежните молчат
Во надлежните институции за контрола и спречување на шверцот на цигари (кои се акцизна стока) никој не сака јавно да коментира за зголемувањето на незаконската трговија. И луѓето од тутунските комбинати не сакаат да зборуваат за овој проблем. Според неофицијалните информации, продажбата на цигари со бандероли во првите три месеци од годинава е опадната за околу 40 отсто.
Се очекува драстичен пад и на државните приходи од акцизи и даноци од трговијата со цигари. Во Министерството за финансии велат дека немаат се уште официјални податоци за приходите по овие основи и дека тие се изработуваат квартално. Тоа практично значи дека податоците ќе бидат познати на крајот од овој месец.
Поранешниот директор на Царинската управа Илија Илоски при заминувањето од оваа функција во минатата недела изјави дека има показатели оти шверцот на цигари е зголемен. Но, тој рече дека Царината нема се уште официјални податоци за тоа колкав процент од цигарите во земјава се шверцувани.
Опасно е поскапувањето
Лани од Царината се пофалија дека странска тутунска компанија утврдила оти процентот на шверцувани цигари во Македонија не надминува шест отсто, што е речиси двојно пониско од просекот во земјите од западна Европа. Илоски смета дека шверцот на цигари не е интересен ако тие се евтини бидејќи никој нема да ризикува ако заработката е многу мала.
– Со зголемувањето на цената на цигарите се зголемува и интересот за шверц – вели тој.
Експертите се децидни дека оваа појава не може да се искорени, но дека во интерес на државата може да се сведе на најниско ниво.
– Во земјите од западна Европа, каде што една кутија цигари чини повеќе од 4-5 евра, нормално е да има поголем интерес за шверц на тутунски производи. Иако тие држави имаат многу поорганизирани инспекциски служби, процентот на шверцуваните цигари на пазарот надминува 12 отсто. Токму затоа целта на сите земји во транзиција, како што е Македонија, треба да биде цените на цигарите што е можно повеќе да се задржат на ниво под просекот во развиените земји. Не може да се избегне поскапувањето, но тоа може да се направи постепено, за да нема големи турбуленции на пазарот – објаснуваат експертите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двегодишното девојче кое исчезна во Србија се бара насекаде, полицијата врши распити на голем број лица
Потрагата по девојчето Данка Илиќ (2), кое во вторникот исчезна во Бањско поле во Бор, се уште трае и не се знае како е можно девојчето да се изгуби. Полицијата ја проверува секоја информација што ќе дојде до нив, сослушани се неколку лица, повторно се разговараше со родителите, но ниту една информација не укажува на тоа што се случило и каде е Данка, пишува „Нова.рс“
Екипата на порталот денеска беше во Бањско поле каде се уште има голем број полицајци. Властите со багер го чистеа теренот околу куќата во која последен пат била видена Данка. Исто така, на имотот е извршено ископување, а јамите повторно се пребаруваат.
Полицијата ја истражува секоја трага што може да укаже на тоа што се случило со девојчето.
„Полицијата разговараше со голем број луѓе, соседи, познаници, се со цел да ја пронајде Данка. Досега ниту една трага не довела до тоа каде е девојчето или што и се случило“, вели изворот на Нова.рс.
Истрагата се одвива во повеќе правци, а денеска полицијата повторно разговараше со родителите на девојчето.
„На вториот ден од нејзиното исчезнување, родителите на девојчето биле во полиција до доцна во ноќта. Тие утрово биле повторно повикани, а исто така цел ден поминале во полициска станица. Не се познати околностите врз основа на кои два дена биле на распит. Извесно е дека родителите вчера имале разговори и со Центарот за социјална работа, а повеќе од тоа не се знае“, додава изворот на „Нова.рс“.
Неофицијално беше објавено и дека полицијата нашла нова трага, односно дупка на местото на кое исчезна девојчето, и дека целото внимание го насочува кон тоа.
Она што е сигурно е дека се проверуваат сите околности и се сослушуваат и сите лица кои можеби имаат сознанија за случајот.
Меѓу нив е и кој бил зад воланот на автомобилот „пунто“ што го снимиле надзорните камери на куќата во Бањско Поље, во моментот на исчезнувањето на малата Данка. Куќата пред која е снимен автомобилот се наоѓа на стотина метри од местото каде исчезна Данка.
На снимката се гледа автомобил кој брза околу 13 часот и 47 минути, а малото девојче исчезнало малку пред тоа, околу 13 часот и 45 минути, како што вели нејзината мајка.
„Ја знам таа жена, ја видов како носи две деца во парк, страшно е што се случи“, велат соседите.
Девојчето Данка Илиќ исчезна во вторникот во Бањско Поље кај Бор. Во средата по 27 часот полицијата ја прекина потрагата и започна друг вид на акција за пронаоѓање на детето. Во ова мало место кај Бор се уште остана одреден број полицајци, а вчера беше блокиран и пристапот до куќата.
Во потрагата по исчезнатото дете се вклучени припадници на Жандармеријата, пожарникари, планинска спасувачка служба, како и голем број доброволци.
Регион
„Само се шалевме“ – уапсените поради тврдењата за исчезнатото девојче се донесени во полиција
Тројцата кои беа уапсени во Босна и Хервеговина, а тврдеа дека имаат информации за исчезнатото девојче од Србија, Данка Илиќ и бараа пари, во полиција рекле дека „само се шегувале“, пренесува Н1 Сараево.
Федералната полициска управа вечерва уапси три лица кои на социјалните мрежи тврдеа дека имаат информации за исчезнувањето на двегодишното девојче од Србија, Данка Илиќ, по коешто трага речиси целиот регион.
Како што јави известувачот на Н1, уапсените биле донесени во зградата на Федералната полициска управа.
Како што се дознава, за време на преносот во живо на „Тик-ток“, тие побарале десетици евра за да ја откријат локацијата на девојчето и тврделе дека ја чуваат во подрумот.
Веднаш по апсењето изјавиле дека „само се шегувале“. Сите уапсени се членови на исто семејство.
Инспекторите на Одделот за компјутерски криминал на Федералната полициска управа преку ИП адресата ги лоцираше лицата кои тврделе дека имаат информации за исчезнувањето на детето.
Вчера на социјалните мрежи се појави видео од надзорната камера на куќа лоцирана во близина на местото каде исчезна Данка Илиќ во 13:45 часот.
На видеото се гледа автомобил кој брза во 13 часот и 47 минути, а малото девојче исчезнало малку пред тоа, односно во 13 часот и 45 минути, како што рекла нејзината мајка.
Свет
Тешка автобуска несреќа во Јужна Африка, загинаа 45 лица
Министерството за транспорт на Јужна Африка денеска соопшти дека 45 лица загинале, а едно лице е повредено во автобуска несреќа кај Маматлакала во северната провинција Лимпопо.
Министерството објави дека возачот изгубил контрола над автобусот, кој потоа удрил во бариерите на мостот, по што возилото паднало преку мостот, удрило во земјата и се запалило.
Автобусот превезувал луѓе од Боцвана до Морија, град во Лимпопо.
Спасувачките операции продолжија до доцна денеска.
Некои тела изгореле до непрепознатливост, а некои патници останале заробени во урнатините на автобусот, соопштија сообраќајните власти во Лимпопо.