Свет
Пјонгјанг провоцира нуклеарна војна?
Откако Северна Кореја соопшти дека успешно ја тестирала својата нуклеарна бомба, јужнокорејската војска е ставена во состојба на подготвеност, Јапонија најави остра акција, а американскиот претседател Обама тоа го прогласи за безбедносна закана
По соопштението дека е тестирана втората нуклеарна бомба, Пјонгјанг во понеделник попладне издаде соопштение дека лансирале две ракети со кус дострел. Според проценките на јапонскиот метеоролошки институт оваа експлозија била четири, а според руското министерство за одбрана дури до 20 пати помоќна од 0,8-килотонската нуклеарна бомба која Северна Кореја ја тестираше во 2006 г. А тоа би било еднакво на американската атомска бомба која беше фрлена врз Хирошима во 1945 г. Тестирањето според јужнокорејските и руските извори е направено на полигонот крај градот Киџуа, на северот во државата. По првото соопштение за успешното тестирање на бомбата, севернокорејската државна новинска агенција KCNA подоцна соопшти дека оваа проба билa, како што го пренесува интегрално соопштението на власите во Пјонгјанг New York Times „.. разрешување на научните и технолошките проблеми кои произлегувале од натамошните зголемување на силата на нуклеарното оружје и развивање на нуклеарната технологија“. Кај соседите и другите светски сили, оваа проба предизвика страв дека Северна Кореја напредувала во технологијата што ќе и’ овозможи нуклеарна боева глава да биде ставена во проектил кој беше тестиран денеска или, пак, во долгострелниот Раеподонг-2, кој беше тестиран во април, а кој има дострел до Алјаска или до Хаваите. Остри меѓународни реакции Прва денеска реагираше Русија, преку соопштение на тамошното Министерство за надворешни работи во кое се вели дека тестирањето претставува ескалација на тензиите во Азија и закана за безбедноста и стабилноста на регионот. Подоцна реагираше и Пекинг, кој иако е благонаклонет кој Пјонгјанг, официјално соопшти дека решително се противи на нуклеарната проба. „Кина остро бара Северна Кореја да го одржи ветувањето за денуклеаризација и да престане со сите активности кои можат дополнително да ја влошат ситуацијата“, стои во соопштението на кинеското Министерство за надворешни работи.Американскиот претседател Барак Обама изјави: „Обидот на Северна Кореја да развие нуклеарно оружје, како и нејзината програма за балистички ракети, претставува закана за меѓународниот мир и безбедноста. Опасноста од активностите на Северна Кореја побаруваат остра акција на меѓународната заедница“.Мотивите на Пјонгјан Светските медиуми во понеделникот се полни со мислења на аналитичари кои го разгледуваат актуелниот момент во кој Пјонгјанг токму сега се реши на пробата за која знаеше дека ќе биде голема светска провокација. Според некои гледишта, Северна Кореја бара да стане американски приоритет и да биде призната како нуклеарна сила за да придобие сериозен однос од страна на меѓународната заедница при преговорите. Односно, бидејќи администрацијата на Обама во изминативе четири месеца вниманието го насочила кон Блискиот Исток и на односите со Русија, Пјонгјанг се обидува да го сврти вниманието на меѓународната заедница кон себе, откако не успеа процесот со двете американски новинарки за наводно илегално влегување на севернокорејската територија од Кина. Другата теорија е дека ова е порака до Сеул, по доаѓањето на власт на јужнокорејскиот претседател Ли Мјунк-бак, кој помошта од неговата држава за Северна Кореја ја условува со подобрување на човековите права и укинување на нуклеарната програма. Во тој контекст се споменува и самоубиството на поранешниот јужнокорејски претседател Рох Му-хјун кој беше обвинет за корупција, а Мијунг-бак инсистираше на истрагата. Дел од американските аналитичари сметаат дека можеби севернокорејскиот претседател Ким Јонг-ил кој претрпе мозочен удар, пред именувањето на својот наследник сака да ја обезбеди поддршката на воениот врв. На пример, се споменува дека во Националниот совет на одбраната Јонг-ил го именувал својот шура Јанг Сеонг-таек кој заедно со воените началници и челниците на Работничката партија треба да го обезбедат непречениот пат на 26-годишниот негов син Ким Јонг-ун постепено да дојде на власт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двегодишното девојче кое исчезна во Србија се бара насекаде, полицијата врши распити на голем број лица
Потрагата по девојчето Данка Илиќ (2), кое во вторникот исчезна во Бањско поле во Бор, се уште трае и не се знае како е можно девојчето да се изгуби. Полицијата ја проверува секоја информација што ќе дојде до нив, сослушани се неколку лица, повторно се разговараше со родителите, но ниту една информација не укажува на тоа што се случило и каде е Данка, пишува „Нова.рс“
Екипата на порталот денеска беше во Бањско поле каде се уште има голем број полицајци. Властите со багер го чистеа теренот околу куќата во која последен пат била видена Данка. Исто така, на имотот е извршено ископување, а јамите повторно се пребаруваат.
Полицијата ја истражува секоја трага што може да укаже на тоа што се случило со девојчето.
„Полицијата разговараше со голем број луѓе, соседи, познаници, се со цел да ја пронајде Данка. Досега ниту една трага не довела до тоа каде е девојчето или што и се случило“, вели изворот на Нова.рс.
Истрагата се одвива во повеќе правци, а денеска полицијата повторно разговараше со родителите на девојчето.
„На вториот ден од нејзиното исчезнување, родителите на девојчето биле во полиција до доцна во ноќта. Тие утрово биле повторно повикани, а исто така цел ден поминале во полициска станица. Не се познати околностите врз основа на кои два дена биле на распит. Извесно е дека родителите вчера имале разговори и со Центарот за социјална работа, а повеќе од тоа не се знае“, додава изворот на „Нова.рс“.
Неофицијално беше објавено и дека полицијата нашла нова трага, односно дупка на местото на кое исчезна девојчето, и дека целото внимание го насочува кон тоа.
Она што е сигурно е дека се проверуваат сите околности и се сослушуваат и сите лица кои можеби имаат сознанија за случајот.
Меѓу нив е и кој бил зад воланот на автомобилот „пунто“ што го снимиле надзорните камери на куќата во Бањско Поље, во моментот на исчезнувањето на малата Данка. Куќата пред која е снимен автомобилот се наоѓа на стотина метри од местото каде исчезна Данка.
На снимката се гледа автомобил кој брза околу 13 часот и 47 минути, а малото девојче исчезнало малку пред тоа, околу 13 часот и 45 минути, како што вели нејзината мајка.
„Ја знам таа жена, ја видов како носи две деца во парк, страшно е што се случи“, велат соседите.
Девојчето Данка Илиќ исчезна во вторникот во Бањско Поље кај Бор. Во средата по 27 часот полицијата ја прекина потрагата и започна друг вид на акција за пронаоѓање на детето. Во ова мало место кај Бор се уште остана одреден број полицајци, а вчера беше блокиран и пристапот до куќата.
Во потрагата по исчезнатото дете се вклучени припадници на Жандармеријата, пожарникари, планинска спасувачка служба, како и голем број доброволци.
Регион
„Само се шалевме“ – уапсените поради тврдењата за исчезнатото девојче се донесени во полиција
Тројцата кои беа уапсени во Босна и Хервеговина, а тврдеа дека имаат информации за исчезнатото девојче од Србија, Данка Илиќ и бараа пари, во полиција рекле дека „само се шегувале“, пренесува Н1 Сараево.
Федералната полициска управа вечерва уапси три лица кои на социјалните мрежи тврдеа дека имаат информации за исчезнувањето на двегодишното девојче од Србија, Данка Илиќ, по коешто трага речиси целиот регион.
Како што јави известувачот на Н1, уапсените биле донесени во зградата на Федералната полициска управа.
Како што се дознава, за време на преносот во живо на „Тик-ток“, тие побарале десетици евра за да ја откријат локацијата на девојчето и тврделе дека ја чуваат во подрумот.
Веднаш по апсењето изјавиле дека „само се шегувале“. Сите уапсени се членови на исто семејство.
Инспекторите на Одделот за компјутерски криминал на Федералната полициска управа преку ИП адресата ги лоцираше лицата кои тврделе дека имаат информации за исчезнувањето на детето.
Вчера на социјалните мрежи се појави видео од надзорната камера на куќа лоцирана во близина на местото каде исчезна Данка Илиќ во 13:45 часот.
На видеото се гледа автомобил кој брза во 13 часот и 47 минути, а малото девојче исчезнало малку пред тоа, односно во 13 часот и 45 минути, како што рекла нејзината мајка.
Свет
Тешка автобуска несреќа во Јужна Африка, загинаа 45 лица
Министерството за транспорт на Јужна Африка денеска соопшти дека 45 лица загинале, а едно лице е повредено во автобуска несреќа кај Маматлакала во северната провинција Лимпопо.
Министерството објави дека возачот изгубил контрола над автобусот, кој потоа удрил во бариерите на мостот, по што возилото паднало преку мостот, удрило во земјата и се запалило.
Автобусот превезувал луѓе од Боцвана до Морија, град во Лимпопо.
Спасувачките операции продолжија до доцна денеска.
Некои тела изгореле до непрепознатливост, а некои патници останале заробени во урнатините на автобусот, соопштија сообраќајните власти во Лимпопо.