Француски суд осуди две жени поврзани со исламските екстремисти на минимум 25 години затвор, поради тоа што пред три години спровеле неуспешен обид за напад со автомобил бомба пред катедралата Нотр Дам во Париз.

Според пишувањето на француски „Фигаро“, едната од жените ја охрабрила другата да и се придружи, претставувајќи се на интернет како екстремистички милитант кој се вратил од Сирија и на тој начин сакал да најде жена, пренесува „Ројтерс“.

Во зората на 4. септември, полицијата пронашла сив автомобил марка „пежо“ без регистарски таблички во кој имало седум контејнери со плин и три канистри со бензин. Автомобилот бил паркиран на левиот брег на Сена близу катедралата, а врз основа на догорчињата од цигари и ќебето натопено во бензин, истражителите заклучиле дека станува збор за неуспешен обид да се предизвика експлозија.

Отпечатоците од прсти укажале на две лица, Инес Мадани и Орнела Жилигман, кои го паркирале возилото откако видео во кое преземаат одговорност за нападот испратиле до Рашид Касим, француски член на Исламска држава.

Мадани, која се претставувала како машки џихадист, е осудена на 30 години затвор, додека Жилигман, инаку мажена жена и мајка на три деца, е осудена на 25 години.

Претседателот на САД, Доналд Трамп изјави дека околу 1.000 американски војници на кои претходно им наредил да се повлечат од Сирија, сепак, ќе останат на Блискиот Исток за да спречат да се оживее таканаречената Исламска држава.

Тој во писмено соопштение објави дека војниците ќе бидат прераспоредени и ќе останат во регионот, пренесува АП.

Нивната улога ќе биде да ја следат ситуацијата и да спречат евентуално повторување на 2014 година, кога припадниците на ИД организирани во Сирија преминаа во соседен Ирак и ја презедоа контролата врз северот и западот на земјата.

Трамп потврди дека мал број американски војници ќе останат на сириската база на југот на земјата.

Курдските Eдиници за заштита на народот ја заземаа контролата врз Рас ал-Аин, откако започнаа контраофанзива, по офанзивата на турските трупи и нивните сојузници кои го окупираа овој пограничен град на 12. октомври.

Според агенцијата „Тасс“, која се повикува на локални медиуми, Курдите и вооружените единици на сириската опозиција кои ја поддржуваат Турција во нејзината воена операција, водат интензивни борби на периферијата на неколку градови.

Курдските единици во моментов го напаѓаат блискиот град Тел Халаф, кој го контролира т.н. Слободна сириска армија.

Извештаи за конфликти доаѓаат и од пограничниот град Кобане, кој се наоѓа на источниот брег на реката Еуфрат.

Вчера, курдските трупи го спречија планот на турските сојузници да пресечат стратешка рута до границата и да го поврзат сирискиот економски центар Алепо со градот Ал Хасака во провинцијата со истото име.