Свет
Киднаперите на Филипините ослободија 10 заложници, остануваат уште 47
Вооружен маж, препознат како член на бандата Манобо, ослободил денеска на Филипините уште десетмина од киднапираните, но се заканил дека другите ќе ги убијат ако за една недела не се остварат нивните барања, пренесуваат светските агенции
„Ќе ги убијам киднапираните ако полицијата се обиде да ги спаси“, рекол лидерот на групата Џоберт Перез, пред новинар што го придружувал владиниот преговарач на местото на ослободувањето.Малку подоцна тој ослободил 10-мина, од кои девет жени и едно момче, соопштила преговарачката Џозефина Бахаде. На југот од Филипините владините преговарачи продолжуваат со разговорите со членовите на кланот што држат во заложништво 47 луѓе. Лидерот на групата бара да бидат ослободени од обвиненијата за убиство, пренесува Асошиејтед прес. Кланот ги држи луѓето во заложништво веќе една недела. Од училиште во провинцијата Агусан дел Сур 75 луѓе беа киднапирани минатиот четврток, а веднаш потоа, во петокот беа ослободени 18 од нив.
Полицијата соопштува дека лидерите на бандата се бараат под обвинение за убиство, но киднаперите ја отфрлаат одговорноста. Филипинската влада се надева на мирна разрешница на случајот, тврди државниот секретар Керг Ремонд.
„Јас бев уверен дека нашите полицајци се подготвени на акција во секое време кога локалниот комитет за справување со кризи ќе им даде сигнал, но секако сега Комитетот ги разгледува и ги употребува сите преговарачки мирни методи“, рекол Ремонд, пренесува Асошиејтед прес.
Џоберт Перез, лидерот на групата, вели дека обвиненијата против него наместени, за што го обвинува спротивставениот клан, Тобајас, за убиство на шест негови браќа и сестри.
Владините преговарачи се трудат да ги разоружаат двата клана.
Полицијата соопштува дека киднаперите се поранешни припадници на милицијата кои се одметнале од службата. Со декади, филипинската влада има вооружени цивилни волонтери како замена за службите за обезбедување во регионите со комунисти или муслиманско население.
Ранонд вели дека војската прави напредок во разоружување на овие милиционери.
Киднапирањето на последните 75 души се случи како одговор на владините напори да ги фати виновниците за минатомесечниот масакр во кој беа убиени педесетина цивили, меѓу кои и новинари. Тие беа убиени додека штитеа една од жртвите која одеше да го регистрира својот сопруг како кандидат за провинциски гувернер на претстојните избори.
Југот на Филипините има долга историја на насилство. Со декади Муслиманите се борат за отцепување на посебна територија. На неколку групи што велат дека се борат за сопствена земја цел им се цивили, туристи, фармери, бизнисмени и други кои ги киднапираат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Полска истражува наводна руска шпионажа
Полската агенција за внатрешна безбедност изврши претреси како дел од истрагата со други европски безбедносни служби за наводна руска шпионажа, беше соопштено денеска.
Полска, западниот воен центар за снабдување на Украина, која се бори против руската инвазија, вели дека станала главна цел на руските шпиони. Ја обвинува Москва и нејзиниот сојузник Белорусија дека се обидуваат да ја дестабилизираат.
„Документирани се акции насочени кон организирање проруски иницијативи и медиумски кампањи во земјите на ЕУ“, се вели во соопштението, повикувајќи се на интернет порталот voice-of-europe.eu, за кој велат дека објавил проруски материјали.
Претресите беа извршени во вторникот во Варшава и Тихи во западна Полска, се вели без дополнителни детали.
Операцијата била координирана со други земји, особено со партнери од Чешка, се наведува.
Во средата, чешката влада санкционираше две лица, меѓу кои и прорускиот украински политичар Виктор Медведчук и интернет порталот voiceofeurope.com, за, како што рече, водење на операција за проруско влијание во Европа.
Последните дејствија произлегоа од истрагата завршена во јануари оваа година, во која полски државјанин беше обвинет под сомнение дека шпионирал за руските специјални служби.
Свет
Во Франција за Велигден ќе биде распоредена полиција пред секоја црква
Францускиот министер за внатрешни работи Жералд Дарманин денеска им нареди на полициските началници да распоредат сили за ред пред сите католички и протестантски цркви за време на Велигден.
Во СМС порака до полициските началници, Дарманин напиша дека „многу високото“ ниво на терористичка закана и „продолжувањето на тензиите“ на меѓународната сцена, особено со војната во Газа и нападот во Москва, „бара исклучителна будност“. за време на велигденските празници овој викенд.
Тој, исто така, додаде дека е неопходно да се воспостави „визуелна контрола на луѓето кои влегуваат во верските објекти за да се откријат сомнителни лица“ и дека „посебно внимание треба да се посвети на „возилата стационирани во близина на големите собири“.
Дарманин дал инструкции за „зголемено физичко присуство на полицијата пред секоја црква или еврејски храм“ од петок до крајот на неделата.
Од почетокот на годината во Франција спречени се два напади. Националното обвинителство за тероризам објави дека еден од тие напади вклучува „џихадистичка идеологија“ насочена против католичка институција.
Велигден, со кој се слави Христовото воскресение, е најголемиот христијански празник. Католиците и протестантите го слават овој викенд, а православните верници на 5 мај.
Регион
„Во семејството не смее да постои ниту една тајна, верувам дека детето е со некого и дека не е надвор“: Јуриќ за случајот со исчезнатата Данка
Основачот на Центарот за исчезнати и малтретирани деца, Игор Јуриќ, учествувајќи во емисија во живо, кажа нови детали од истрагата за случајот со исчезнатата Данка Илиќ објаснувајќи зошто потрагата на терен била прекината по 27 часа.
„Не, тоа апсолутно не значи дека некои работи се откриени, напротив, значи само дека нема потреба да се троши работна сила и да се насочува енергија кон тој дел од теренот, кој е целосно и темелно прегледан. Штом немаме дополнителни информации, истрагата продолжува, сега истрагата тргна во друга насока и се вршат некои оперативни дејства поврзани со сознанијата за самото девојче“, изјави Јуриќ.
Тој вели дека во случаите на исчезнување на детето родителите мора да споделат сè со полицијата, дури и најинтимните семејни тајни, кои може да бидат важни во тие моменти.
„Кога зборуваме за овие ситуации, кога детето ќе исчезне, едноставно, не смее да има никакви тајни во семејните односи, напротив, треба целосно да ѝ помогнете на полицијата. Ако имате каква било ситуација што може да доведе до несакан настан, во случајот исчезнување мало девојче, мора да кажете сè што знаете“.
Основачот на Центарот за исчезнати и малтретирани деца вели дека во деновите кога не знаеле каде е ќерка му Тијана Јуриќ посакувал некој да излезе и да побара откуп.
„Навистина верувам и го чекам соопштението на полицијата за да видам кое е конечното решение за оваа драма, но, дефинитивно, бев среќен што детето не беше пронајдено на тој простор, особено таа прва вечер бидејќи тешко дека детето може да преживеало таму во тие услови. Кога исчезна Тијана, се надевавме дека некој ќе ни побара откуп и дека е жртва на киднапирање, некако сега се надевам дека има шанси детето поради некоја причина да е со некои луѓе и да е уште живо. Таа надеж постои во нашите глави, но од нашето искуство мораме да бидеме подготвени за најлошите вести.
Според него, добро е што е пребарана областа и последната надеж е дека некој е вмешан и дека детето е скриено поради некоја причина.
„Сега очекувам дека оперативците на МУП ќе завршат добра работа и дека, конечно, ќе ја дознаеме вистинската вистина.
Игор Јуриќ зборуваше и за активирање на системот „Најди ме“.
„Системот го активираат началниците на полициските одделенија, во случајот тоа беше полициското одделение каде што детето исчезна. Кога ќе се процени дека детето е во опасност, системот се активира. Она што беше специфично во овој случај е дека детето е екстремно мало, самите околности беа многу чудни и полицијата бргу реагира и поради возраста на детето, темелно го пребара теренот.
„Полицијата се погрижила да не го загрози дополнително животот на детето и да ги истражи сите околности, детето да не биде жртва на киднапирање, да не се бара откуп и слично, затоа системот бил активиран околу 7 часот“, објаснува тој.