Русија во четвртокот застана зад привремената влада на Киргистан, предводена од поранешната министерка за надворешни работи, Роза Отунбајева и вети хуманитарна и економска помош

Русија во четвртокот застана зад привремената влада на Киргистан, предводена од поранешната министерка за надворешни работи, Роза Отунбајева, јавува агенцијата РИА Новости.Во телефонскиот разговор кој рускиот премиер Владимир Путин го водел со Отунбајева, таа од Москва побарала и добила ветување за хуманитарна и економска помош за Киргистан, соопшти портпаролот на Путин, Дмитри Песков. Претходно, Отунбајева изјави дека привремената влада веќе ги распуштила и владата и парламентот. Привремената влада ќе управува со земјата во наредните шест месеци, по што ќе има избори според новиот Устав, кој во меѓувреме ќе биде променет. Во крвавите судири меѓу демонстрантите и полицијата во изминативе два дена загинаа 74 луѓе, а околу 500 се повредени. Протестите започнаа во вторникот во северозападниот град Талас, по апсењето на десетмина опозицискки лидери и се проширија и на други региони во земјата, вклучувајќи ја и престолнината Бишкик во средата и траеја се до четвртокот. Уапсените лидери беа ослободени во средата, но тоа не ги сопре протестите, во кои беа заземени киргистанската државна телевизија, парламентот и владата. Демонстрантите, исто така, ја запалија и резиденцијата на претседателот Курманбек Бакијев,

Во четвртокот и армијата, граничарите и полицијата на Киргистан и се приклучија на новата влада. Отунбајева, сепак, предупреди дека Бакијев се уште официјално не се откажал од претседателската функција и дека се обидува да организира отпор на југот на земјата, од каде што потекнува и каде што има најсилна поддршка. Според неофицијални информации, тој пребегал во градот Ош, исто така на југот на земјата.Отунбајева додаде и дека опозицијата, која ужива најголема поддршка на северот на земјата, веќе контролира четири од седумте региони на Киргистан.

„Состојбата на Бакијев останува нејасна. Најновите информации велат дека тој се наоѓа во градот Јалал-Абад и дека се обидува да ги организира своите поддржувачи за да продолжат со отпорот“, вели Отунбајева. РИА Новости од жители на градот добила информмации дека таму се одржува собир на поддржувачите на Бакијев, на кој и тој треба да одржи говор.Во меѓувреме, и самиот Бакијев приза дека повеќе не поседува вистинска власт, но сепак одби доброволно да даде оставка како претседател„Објавувам дека, како претседател, нема да се откажам одс воите должности. Во моментов нема можност да влијаам врз ситуацијата во земјава„, изјави тој, но не кажа каде се наоѓа.Поранешниот премиер Феликс Кулов, кој сега ја води опозициската партија „Ар-Наис“, во четвртокот побара од претседателот Бакијев веднаш да поднесе оставка и против него да започне судски процес и повика за донесување на амандмани на Уставот, со кои ќе се ограничат надлежностите на претседателската функција. „Нема сомнеж дека наредбата да се пука во демонстрантите ја дал Бакијев, бидејќи тој ја имаше апсолутната контрола врз безбедносните сили на земјата“, вели Кулов. Привремента влада веднаш ја затвори Агенцијата за развој, инвестиции и иновации, која беше раководена од помладиот син на Бакијев, Максим. Агенцијата ги контролираше сите пари кои во земјата доаѓаа од странство. Затворени се и неколлу банки во сопственост на блиски соработници на Бакијев, наводно со цел да се спречи изнесување на пари од земјата.