Свет
Шест земји нема да присуствуваат на доделувањето на Нобеловата награда за мир
Шест земји на 10 декември нема да присуствуваат на церемонијата на доделувањето на Нобеловата награда за мир, чиј лауреат за оваа година е кинескиот дисидент Луи Ксиабао, соопшти Нобеловиот комитет во Осло
„До денес 36 амбасадори ја прифатија поканата, 16 сè уште не одговориле, а амбасадорите на Кина, Русија, Казахстан, Куба, Мароко и Ирак нема да присуствуваат на церемонијата“, изјави директорот на Нобеловиот комитет, Гејр Лундестат. Тој додаде дека причините за неприсуство на церемонијата не мора секогаш да бидат од политички карактер, и дека секоја година некој од амбасадорите не е во можност да присуствува на доделувањето.Кинеските власти во повеќе наврати Ксиабао го нарекоа „криминалец“, а амбасадата на Кина во Осло на бројни амбасади им упати писмо со барање да не присуствуваат на церемонијата. Поголем дел од земјите меѓу кои се Велика Британија, Франција, Германија и САД веќе го потврдија присуството на своите преставници. Кинескиот дисидент и борец за човекови права, Лиу Ксиабао се наоѓа на извршување на 11-годишна казна затвор, затоа што е еден од авторите на таканаречената Повелба 08. Со оваа повелба се бара повеќе слобода и крај на политичката доминација на Комунистичката партија на Кина.Нобеловиот комитет, поради долгогодишната и ненасилна борба за основни човекови права во Кина, наградата за мир на Ксиабао му ја додели на 8 октомври. Кинеските власти по доделувањето на наградата го изразија своето незадоволство и предупредија дека одлуката може да ги загрози односите помеѓу Кина и Норвешка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
ЕУ инвестира повеќе од 65 милиони евра во развој на вештачка интелигенција
Европската комисија (ЕК) најави дека ќе инвестира повеќе од 65 милиони евра во развојот на вештачката интелигенција (АИ), вклучително и 50 милиони кои ќе бидат наменети за финансирање проекти насочени кон развој на нови начини за комбинирање на податоците.
ЕК објави повици за предлози за финансирање проекти во областа на вештачката интелигенција и квантната технологија во рамките на програмата за истражување и иновации Хоризонт Европа од 2023 до 2024 година, објави АНСА.
ЕК наведува дека проектите се насочени кон подобрување на доверливоста на системите за вештачка интелигенција и обезбедување значителен увид во процесите на донесување одлуки за вештачка интелигенција.
Регион
Мајката на осомничениот за убиството на Данка: Не го видов телото на мојот син
Светлана Драгијевиќ, мајката на Далибор Драгијевиќ, кој почина од насилна смрт во полициската станица во Бор, на распитот за убиството на Данка Илиќ (2), за порталот „Нова.рс“ вели дека нејзиниот починат син бил жртва на полициска тортура.
Таа истакнува дека не го видела телото, и дека се уште го чека извештајот од обдукцијата на нејзиниот син.
Драгијевиќ е брат на Дејан, осомничениот за убиството на девојчето Данка Илиќ. Тој беше приведен на 6 април под сомнение дека му помогнал на својот брат да го сокрие нејзиното тело, а почина ноќта меѓу саботата и неделата, односно на 7 април.
Мајката на Драгијевиќ за Нова.рс изјави дека никој не дошол кај неа да и каже дека нејзиниот син е претепан, туку дека само полицаецот дошол да ја извести за неговиот погреб.
„Не се сомневам дека ќе се дознае кој го убил, од Бор се. Извештајот од обдукцијата се уште не сум го добила, па се надевам дека ќе открие се“, вели Светлана, која исто така наведува дека не го видела телото на синот.
Неделникот „Радар“ неодамна објави дека обдукцијата покажала дека Драгијевиќ починал со насилна смрт, а доказ за тоа се бројните повреди што ги имал по телото. Но, полицијата во соопштението наведе дека Драгијевиќ починал од природна смрт, односно му се слошило во полициската станица.
Полицијата ги уапси работниците на ПУК „Водовод“ Дејан Драгијевиќ и Срѓан Јанковиќ под сомнение дека го убиле девојчето Данка Илиќ. Таткото Радослав и братот Далибор на осомничениот Драгијевиќ беа приведени под сомнение дека му помогнале да го сокрие телото на детето.
Телото на Данка се уште не е пронајдено.
Свет
Дмитриј Песков: Москва се придржува до идејата на Путин за создавање тампон зона во Украина
Москва се придржува до идејата на рускиот претседател Владимир Путин за создавање тампон зона во Украина за заштита од оружје со долг дострел, изјави на прес-конференција портпаролот на Кремљ, Дмитриј Песков.
„Што се однесува до тоа, ништо не е променето“, рече тој одговарајќи на новинарско прашање, пренесе ТАСС.
Портпаролот на Кремљ додаде дека прашањето за борбата против оружјето со долг дострел доставено до Украина и потенцијалните напади врз областите во кои тие се концентрирани е „прилично во надлежност на вооружените сили“.