Свет
Републиканецот Бонер ќе го води Претставничкиот дом на САД
Републиканецот Џон Бонер денеска е избран за претседател на 112-тото собрание на Претставнички дом, јавија американските медиуми.За 61-годишниот Џон Бонер од редовите на републиканците гласале 241, а досегашната претседателка од редовите на демократите – 70-годишната Ненси Пелоси добила поддршка од 173 конгресмени.Резултатите од гласањето не претставува изненадување, имајќи предвид дека на изборите во ноември републиканците освоија мнозинство во Претставничкиот дом, односно сега имаат 242 места од вкупно 435-те мандати, наспроти 193 на демократите, а за изборот на спикерот на Претставничкиот дом е потребно просто мнозинство од гласовите. Покрај тоа, пред Нова година републиканците изјавија дека тие со сите мандати ќе го поддржат изборот на Бонер.Инаку во средата, новиот состав на американскиот Конгрес го одржа своето прво заседание.Во Претставничкиот дом со минатиот состав Бонер го предводеше републиканското малцинство. Пред Нова година, тој даде неколку остри изјави за неговите планови за во иднина, ја критикуваше администрацијата и вети дека ќе спроведе ревизија на сите закони донесени како предлози на владата и со поддршка на демократите во Претставничкиот дом. Според Бонер, сите предлог-закони од актуелната администрација ќе бидат разгледани „под микроскоп и нема да бидат носени на брзина, како за време на претседателствувањето на Пелоси“.Мнозинство во Претставничкиот дом ќе го предводи Ерик Кантор, избран од еден од окрузите од во сојузната држава Вирџинија. Првата жена претседател во историјата на на Претставничкиот дом, Ненси Пелоси ќе ја преземе не помалку важната функција – лидер на демократското малцинство. Таа со свотие настапи го предизвикуваше бесот на републиканците, кој повеќепати ја обвинуваа за авторитарност и бараа од челниците на Демократската партија да ја „повлечат Пелоси“ .Функциите на претседатели на најважните комитети на Претставничкиот дом, како што се очекува, ќе одат во рацете на републиканците.Претходно во средата во Сенатот на првата средба во новиот состав усвои резолуција со која го извести претседателот и Претставничкиот дом дека „сенаторите се на сесија“. Составот на Сенатот не е целосно заокружен, според традицијата реизбрана е само една третина од сенаторите. Демократите не го загубија мнозинството, но имаат шест мандати помалку – 53 сенатори, вклучувајќи ги и независните, наспроти 47 сенатори од редовите на републиканците.Со новиот состав на Конгресот, на американската администрација ќе и биде многу потешко да ги протуркува своите законски проекти, а тоа може дури да се одрази и на веќе претходно усвоените закони. Сепак, во отсуство на републиканското мнозинство во Сенатот, ова се чини малку веројатно, имено најверојатно работата на владата со Конгресот ќе се претвори во бескрајни преговори и трговија со отстапки, а предлог-законите ќе бидат разгледувани долго и практично нидеден нема да има шанса да биде изгласан брзо и без амандмани, сметаат американските аналитичар./крај/ро/вп/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двегодишното девојче кое исчезна во Србија се бара насекаде, полицијата врши распити на голем број лица
Потрагата по девојчето Данка Илиќ (2), кое во вторникот исчезна во Бањско поле во Бор, се уште трае и не се знае како е можно девојчето да се изгуби. Полицијата ја проверува секоја информација што ќе дојде до нив, сослушани се неколку лица, повторно се разговараше со родителите, но ниту една информација не укажува на тоа што се случило и каде е Данка, пишува „Нова.рс“
Екипата на порталот денеска беше во Бањско поле каде се уште има голем број полицајци. Властите со багер го чистеа теренот околу куќата во која последен пат била видена Данка. Исто така, на имотот е извршено ископување, а јамите повторно се пребаруваат.
Полицијата ја истражува секоја трага што може да укаже на тоа што се случило со девојчето.
„Полицијата разговараше со голем број луѓе, соседи, познаници, се со цел да ја пронајде Данка. Досега ниту една трага не довела до тоа каде е девојчето или што и се случило“, вели изворот на Нова.рс.
Истрагата се одвива во повеќе правци, а денеска полицијата повторно разговараше со родителите на девојчето.
„На вториот ден од нејзиното исчезнување, родителите на девојчето биле во полиција до доцна во ноќта. Тие утрово биле повторно повикани, а исто така цел ден поминале во полициска станица. Не се познати околностите врз основа на кои два дена биле на распит. Извесно е дека родителите вчера имале разговори и со Центарот за социјална работа, а повеќе од тоа не се знае“, додава изворот на „Нова.рс“.
Неофицијално беше објавено и дека полицијата нашла нова трага, односно дупка на местото на кое исчезна девојчето, и дека целото внимание го насочува кон тоа.
Она што е сигурно е дека се проверуваат сите околности и се сослушуваат и сите лица кои можеби имаат сознанија за случајот.
Меѓу нив е и кој бил зад воланот на автомобилот „пунто“ што го снимиле надзорните камери на куќата во Бањско Поље, во моментот на исчезнувањето на малата Данка. Куќата пред која е снимен автомобилот се наоѓа на стотина метри од местото каде исчезна Данка.
На снимката се гледа автомобил кој брза околу 13 часот и 47 минути, а малото девојче исчезнало малку пред тоа, околу 13 часот и 45 минути, како што вели нејзината мајка.
„Ја знам таа жена, ја видов како носи две деца во парк, страшно е што се случи“, велат соседите.
Девојчето Данка Илиќ исчезна во вторникот во Бањско Поље кај Бор. Во средата по 27 часот полицијата ја прекина потрагата и започна друг вид на акција за пронаоѓање на детето. Во ова мало место кај Бор се уште остана одреден број полицајци, а вчера беше блокиран и пристапот до куќата.
Во потрагата по исчезнатото дете се вклучени припадници на Жандармеријата, пожарникари, планинска спасувачка служба, како и голем број доброволци.
Регион
„Само се шалевме“ – уапсените поради тврдењата за исчезнатото девојче се донесени во полиција
Тројцата кои беа уапсени во Босна и Хервеговина, а тврдеа дека имаат информации за исчезнатото девојче од Србија, Данка Илиќ и бараа пари, во полиција рекле дека „само се шегувале“, пренесува Н1 Сараево.
Федералната полициска управа вечерва уапси три лица кои на социјалните мрежи тврдеа дека имаат информации за исчезнувањето на двегодишното девојче од Србија, Данка Илиќ, по коешто трага речиси целиот регион.
Како што јави известувачот на Н1, уапсените биле донесени во зградата на Федералната полициска управа.
Како што се дознава, за време на преносот во живо на „Тик-ток“, тие побарале десетици евра за да ја откријат локацијата на девојчето и тврделе дека ја чуваат во подрумот.
Веднаш по апсењето изјавиле дека „само се шегувале“. Сите уапсени се членови на исто семејство.
Инспекторите на Одделот за компјутерски криминал на Федералната полициска управа преку ИП адресата ги лоцираше лицата кои тврделе дека имаат информации за исчезнувањето на детето.
Вчера на социјалните мрежи се појави видео од надзорната камера на куќа лоцирана во близина на местото каде исчезна Данка Илиќ во 13:45 часот.
На видеото се гледа автомобил кој брза во 13 часот и 47 минути, а малото девојче исчезнало малку пред тоа, односно во 13 часот и 45 минути, како што рекла нејзината мајка.
Свет
Тешка автобуска несреќа во Јужна Африка, загинаа 45 лица
Министерството за транспорт на Јужна Африка денеска соопшти дека 45 лица загинале, а едно лице е повредено во автобуска несреќа кај Маматлакала во северната провинција Лимпопо.
Министерството објави дека возачот изгубил контрола над автобусот, кој потоа удрил во бариерите на мостот, по што возилото паднало преку мостот, удрило во земјата и се запалило.
Автобусот превезувал луѓе од Боцвана до Морија, град во Лимпопо.
Спасувачките операции продолжија до доцна денеска.
Некои тела изгореле до непрепознатливост, а некои патници останале заробени во урнатините на автобусот, соопштија сообраќајните власти во Лимпопо.