Свет
Сеул го отфрли предлогот на Пјонгјанг за преговори
Јужна Кореја денеска ја отфрли понудата од северниот сосед за преговори за намалување на тензиите на полуостровот како несериозна и пропагандистичка, соопшти јужнокорејското Министерство за обединување
„Северна Кореја и претходно на почетокот на годината издавало вакви соопштенија. Тоа е дел од нивната редовна пропагандна кампања кон Југот“, се вели во соопштението на министерството, во кое се вели и дека ваквото соопштение не се смета за сериозно, па дури дека не е испратено во потребниот формат.Во средата Северна Кореја понуди безусловни преговори со Југот за да се стави крај на провокациите. Во соопштението од Пјонгјанг се вели дека тие нудат „сеопфатни преговори и дијалог“ со Сеул, тврдејќи дека тоа било „единствениот начин да се излезе од оваа сериозна ситуација“.Вчера и Кина соопшти дека би поддржала такви преговори. Соопштението од Пекинг дојде непосредно по средбата на кинескиот државен врв со специјалниот американски пратеник за Северна Кореја, Стивен Босфорт.Минатата година тензиите помеѓу двата дела на поделената Кореја достигнаа највисоко ниво во последниве неколку децении, откако Пјонгјанг беше обвинет за потопувањето на јужнокорејскиот воен брод, при што загинаа 46 морнари. Во ноември северот истрела неколку артилериски гранати врз спорниот остров Јеонпјеонг на самата поморска граница помеѓу двете Кореи, при што загинаа четири лица. Веднаш потоа Јужна Кореја и САД одржаа неколку воени вежби во близина на административната граница, што во Пјонгјанг беше протолкувано како провокација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Разузнавачки извор за Си-ен-ен: Директните напади меѓу Израел и Иран завршија
Регионален разузнавачки извор рече дека директните напади меѓу Израел и Иран се завршени.
Изворот разговарал за Си-ен-ен под услов да остане анонимен околу два и пол часа по објавувањето на нападите. Изворот вели дека, според неговите сознанија, не се очекува Иран да одговори на нападот, но не наведе причина.
Претходно и висок ирански функционер изјави за „Ројтерс“ дека „Иран нема план за итна одмазда против Израел“.
Израел сѐ уште не потврдил дека го извршил нападот врз Иран, а тврдењата за нападот дојдоа од Вашингтон.
Од друга страна, од Иран доаѓаат контрадикторни информации, но нема официјален извештај.
Пред само еден час ирански аналитичар изјави за иранската државна телевизија дека „мини дроновите соборени од противвоздушната одбрана во Исфахан биле управувани од инфилтратори од Иран“.
Претходно, пак, ирански функционер изјави за „Ројтерс“ дека немало ракетен напад и дека експлозиите биле резултат на активирање на иранските системи за противвоздушна одбрана.
Свет
Украина тврди дека соборила руски бомбардер
Украинските воздухопловни сили денеска соопштија дека собориле руски стратешки бомбардер првпат од почетокот на руската инвазија, а Москва објави дека авионот се урнал поради технички дефект и дека еден член на екипажот загинал.
„Првпат противвоздушните ракетни единици на Военото воздухопловство во соработка со одбранбеното разузнавање на Украина го уништија стратешкиот бомбардер со долг дострел ‘ту-22М3’, кој носи крстосувачки ракети ‘Х-22’“, изјави командантот на украинските воздухопловни сили на „Телеграм“.
Украинската воена разузнавачка служба (ГУР) соопшти дека рускиот авион „бил соборен благодарение на специјалната операција спроведена од украинското одбранбено разузнавање во соработка со воздухопловните сили“.
Руското Министерство за одбрана не потврди дека украинската страна нападнала еден нејзин авион, но воен извор изјавил за новинската агенција ТАСС дека бомбардерот „туполев-22М3“ се урнал во регионот Ставропол по борбена мисија додека се враќал во базата. Според овој извор, авионот не носел оружје.
Свет
САД ставија вето на приемот на Палестина во ОН
Соединетите Американски Држави ставија вето на нацрт-резолуцијата на Советот за безбедност на Обединетите нации „Државата Палестина да биде прифатена како членка на ОН“.
Воздржани беа Велика Британија и Швајцарија, а „за“ гласаа Словенија, Сиера Леоне, Русија, Јужна Кореја, Мозамбик, Малта, Јапонија, Франција, Гвајана, Еквадор, Кина и Алжир.
Претходно вчера, заменик-портпаролот на американскиот Стејт департмент, Ведант Пател, потврди дека Вашингтон ќе стави вето на гласањето во Советот за безбедност на ОН наведувајќи дека нема едногласно мислење меѓу членовите на комитетот за тоа дали Палестинците ги исполнуваат критериумите неопходни за да бидат дефинирани како држава.
Палестинската управа (ПА) го осуди потегот нарекувајќи го „нефер, неетички и неоправдан“.
Кабинетот на претседателот на палестинската управа, Махмуд Абас, го нарече американското вето „еклатантна агресија …туркање на регионот преку работ“.
Израелскиот министер за надворешни работи, Израел Кац, го пофали американското вето додавајќи: „Срамниот предлог беше отфрлен. Тероризмот нема да биде награден“.