Терористичката организација Исламска држава презеде одговорност за напад во кој синоќа биле убиени три новинарки во источен Авганистан.ќ

Разузнавачката група „СИТЕ“ која ги набљудува заканите на џихадистите на интернет, соопшти дека ИД ја презела одговорноста за убиството на три жени, вработени во авганистанската телевизија „Еникас“ во градот Џалалабад, пренесе „Ројтерс“.

Агенцијата наведува дека авганистанските власти претходно потврдиле дека загинале три жени, на возраст од 18 до 20 години, кои работеле како спикерки, а дека четврта жена е тешко повредена, откако на нив вчера пукал непознат напаѓач додека се враќале од работа.

Тексас ги укинува ограничувачките мерки – се отвораат продавници и прекинува да важи обврската за носење маски.

Гувернерот на американската сојузна држава Тексас, Грег Абот, донесе одлука за укинување на обврската за носење заштитни маски и најави дека повеќето продавници ќе можат да се отворат со полн капацитет следната недела, објави „Ројтерс“.

Тексас ги укинува ограничувачките мерки во време кога бројот на нови случаи на коронавирус и хоспитализирани пациенти се намалува низ САД.

„Време е Тексас да се отвори 100 проценти“, рече Абот, најавувајќи дека мерките ќе бидат целосно спроведени од 10 март.

Гувернерот изјави дека е во состојба да ги укине мерките затоа што 5,5 милиони жители од 29 милиони луѓе кои живеат во таа американска сојузна држава се вакцинирани.

Оваа одлука е во спротивност со повикот на претседателот на САД, Џо Бајден, кој апелираше до Американците да се придржуваат до мерките и да носат маски додека не се видат ефектите од вакцинацијата.

По идентификацијата на британскиот и јужноафриканскиот вид на коронавирусот, во Словенија е потврден и нигерискиот вид.

Досега се откриени седум случаи на најновата варијанта, а ги откри лабораторијата на Универзитетскиот медицински центар Љубљана, пренесуваат словенечките медиуми.

Досега достапните податоци покажуваат дека нигериската мутација веројатно не предизвикува потешка форма на Ковид-19.

Јужноафриканската варијанта е потврдена во Словенија на 9 февруари кај 54-годишен маж. Министерот за здравство, Јанез Поклокар, рече дека во изминатата недела се потврдени 62 случаи на британската мутација и еден случај на јужноафриканскиот вид на вирусот, додавајќи дека тој не знае ништо за присуството на нигерискиот вид.

Официјален извештај за присуството на разни мутации на вирусот што кружат во Словенија се очекува утре, јавува агенцијата СТА.