Вакцините против Ковид-19 се продаваат на црниот пазар по ценa од 250 до 1.200 долари, соопшти компанијата „Касперски“, која дошла до ова сознание со испитување на пазарот на „Даркнет“, каде што пронашла реклами за продажба на вакцини.

Според глобалната компанија за сајбер безбедност, рекламите биле за главните вакцини против ковид, „Фајзер/ Бионтек“, „Астра зенека“ и „Модерна“, а имало и продавачи кои рекламирале неверификувани вакцини.

Исто така, се наведува дека повеќето продавачи на вакцини се наоѓаат во Франција, Германија, Велика Британија и САД и дека повеќето од нив имаат извршено меѓу 100 и 500 трансакции.

Директорот на германскиот Институт „Роберт Кох“, Лотар Вилер, денес изјави дека многу позаразниот вид коронавирус, кој првпат беше забележан во Велика Британија, набргу може да стане доминантен вид во Германија, што ќе ја забави борбата против ширењето на вирусот.

Тој рече дека со таканаречениот британски вид коронавирус, Б117, во моментот се заразиле 40 отсто од заболенитете во Германија и дека само пред четири недели тој процент бил шест отсто, пренесува „Ројтерс“.

„Се предвидува дека Б117 набргу ќе биде доминантна варијанта во Германија, а потоа ќе биде уште потешко да се држи вирусот под контрола бидејќи е заразен и еднакво опасен за сите возрасни групи“, рече Вилер.

Унгарскиот премиер Виктор Орбан изјави дека последната фаза од војната против коронавирусот започнува со двонеделното заклучување на земјата, кое започнува во понеделник, на 8 март.

Тој за унгарското радио „Кошут“ ​​изјави дека владата нема друг избор откако експертите предупредуваат на катастрофални последици доколку не биде донесена ваква одлука, пренесува МТИ.

„Мораме да се затвориме сега, за да се отвориме до Велигден“, рече Орбан.