Американскиот претседател, Џо Бајден, изрази задоволство и го поздрави одобрението издадено од американската Администрација за храна и лекови (ФДА) за вакцините на „Џонсон и Џонсон“.

„Ја гледаме светлината на крајот од тунелот, но не смееме да го спуштаме гардот или да претпоставиме дека победата над вирусот е сигурна“, рече американскиот претседател, Џо Бајден и ги повика Американците да продолжат да ги мијат рацете, да ја одржуваат физичката дистанца и да носат маски, рече тој.

„Постојано повторувам дека сè уште е можно ситуацијата да се влоши со ширењето на новите соеви на коронавирус и сегашниот позитивен тренд во борбата против заразата да се промени“, предупреди претседателот Бајден.

Анализите покажаа дека вакцината „Џонсон и Џонсон“ е 66 проценти ефикасна во спречување на умерени до тешки форми на Ковид-19 и 100 проценти ефективна против најтешките форми на болеста за кои е потребна хоспитализација и може да биде фатална.

Австрискиот канцелар, Себастијан Курц, разговараше со рускиот претседател Владимир Путин за испорака и заедничко производство на вакцината „Спутник В“.

Како што беше објавено во Виена, двајцата лидери зборувале за испорака на руската вакцина, веднаш штом ќе биде одобрена од Европската агенција за лекови (ЕМА).

Според медиумите, засега е нејасно дали веќе е поднесено барање за одобрување на вакцината „Спутник В“ до ЕМА. Додека Кремљ тврди дека такво барање е поднесено, во ЕМА нема постапка за одобрување на вакцината.

Австрија, заедно со Израел и Норвешка, се залагаат за заедничко производство на руската вакцина.

На почетокот на месецот, Курц истакна дека дискусијата за вакцината мора да се спроведе без геополитички ограничувања.

Тој посочи дека Австрија, по одобрувањето, ќе се обиде да ги направи достапни производните капацитети во земјата за производство на руски или кинески вакцини.

Полицијата со поддршка на специјалната единица, уапси синоќа маж кој фрли експлозивна направа во населбата Грдоњ, во Сараево.

Нема повредени.

За време на неколкучасовниот претрес, мажот се криел во населбата, а според босанскиот портал „Клих“, повикувајќи се на неофицијални информации, кај него биле пронајдени пушка, пиштол и бомба.

Осомничениот и бил претходно познат на полицијата и се лекувал на Клиниката за неврологија во Сараево.

Засега е непознато зошто ја фрлил бомбата.