Претседателот на Чешка, Милош Земан му се обрати на кинескиот лидер Си Џиннпинг за да обезбеди испорака на кинеската вакцина против Ковид-19 во неговата земја, изјави вчера портпаролот на Земан.

Според амбасадата на Чешка во Пекинг, Кина одлучила „веднаш да го исполни“ барањето.

Досега, Унгарија е единствената членка на Европската Унија која ги вакцинира своите граѓани со кинеската вакцина „Синофарм“.

Европската агенција за лекови сè уште не ја одобрила вакцината.

Земан испрати слично барање до Русија.

Чешка е погодена од голем бран на нови случаи со Ковид-19 и покрај строгите мерки за затворање , а чешките болници вчера објавија рекорден број случаи на пациенти од Ковид-19.

Многу болници се преполни и немаат лекари и друг медицински персонал.

Од следната недела, секој германски граѓанин ќе има неделно по еден бесплатен тест за коронавирус, најави германската канцеларка, Ангела Меркел. Како што посочи, стратегијата на борбата против пандемијата не се заснова само на забрзана вакцинација, туку и на масовно тестирање.

Германија ќе ги продолжи мерките за затворање до 28 март со многу опции за отворање во зависност од епидемиолошката состојба.

Меркел најави и поголема флексибилност при вакцинирањето со списоците на чекање, со цел што помалку датуми за вакцинација да останат неискористени, како и вакцинации кај матични лекари.

Постепеното отворање што ќе зависи од седумдневната инциденца. Од 8 март, во луѓето од едно домаќинство ќе можат да се сретнат со пет лица од друго домаќинство. Досега беше дозволена средба само со едно лице од друго домаќинство.

Продавниците ќе можат да ги отворат своите врати за клиентите во случај на инциденца под 50. Во случај на инциденца над 50, дозволено е купување преку Интернет со можност за подигање на стоката во самата продавница.

Терасите на рестораните и кафулињата ќе можат да примаат гости во случај на инциденца под 50 за 14 дена.

Од 8 март дозволено ќе биде работењето на цвеќарници, градинарски продавници и книжарниците. Од 8 март ќе можат да работат и педикирите, како и училиштата за возење и летање.

Правилото за работа од дома каде што е можно е продолжено до крајот на април.

Околу 2.400 дози на фалсификувани вакцини се запленети во Јужна Африка, а во Кина е разбиена мрежа на шверцери на вакцини, соопшти Интерпол, предупредувајќи дека ова е само врвот на ледениот брег.

„Јужноафриканските власти запленија стотици дози на фалсификувани вакцини против Ковид-19 по дојавата на Интерпол, со предупредување дека вакцините се омилена цел на криминалните мрежи“, додава меѓународната организација за полициска соработка со седиште во Лион.

Тројца кинески државјани и еден Замбиец се уапсени во акцијата, спроведена во Гермистон, во провинцијата Гаутенг, каде што е откриена и голема количина фалсификувани маски.

Интерпол исто така интервенирал и во Кина, каде полицијата открила мрежа за продажба на лажни вакцини против Ковид-19 и упаднала во производствен погон, приведувајќи 80 осомничени и запленувајќи над 3.000 дози лажни вакцини.

„Иако сме задоволни од овој исход, ова е само врвот на ледениот брег што се однесува до криминалот поврзан со вакцини против Ковид-19“, рече генералниот секретар на Интерпол, Јирген Сток.

Интерпол повторно предупредува дека неовластените вакцини кои се продаваат онлајн или се рекламираат по интернет-страници за продажба не се легитимни или тестирани и можат да бидат погубни.