Висок официјален претставник на Светската здравствена организација рече дека таканаречените ковид – пасоши не треба да се користат за меѓународни патувања поради бројни проблеми, вклучително и етички причини бидејќи вакцините за коронавирус не се лесно достапни на глобално ниво.

На брифинг со новинарите, шефот на Одделот за итни случаи на СЗО, Мајкл Рајан, рече дека постојат практични и етички разгледувања за земјите што размислуваат да користат сертификати за вакцини како услов за патување, додавајќи дека здравствената агенција на Обединетите нации засега не ги препорачува.

„Вакцинацијата едноставно не е достапна ширум светот и не е достапна на фер основа“, рече Рајан.

СЗО претходно забележа дека сè уште не е познато колку трае имунитетот од вакцините и дека податоците сè уште се собираат.

Рајан, исто така, истакна дека стратегијата може да биде неправедна за луѓето кои поради некоја причина не можат да се вакцинираат и дека барањето ковид – пасош може да дозволи неправдата и неправедноста дополнително да се вметнат во системот.

Вакцината на „Фајзер“ и „Бионтек“ успеа да ја неутрализира новата варијанта на коронавирусот што брзо се шири во Бразил, покажа лабораториска студија објавена во New England Journal of Medicine.

Студијата наведува дека крвта на луѓето кои ја примиле вакцината ја неутрализирала вештачката верзија на вирусот која ги содржела истите мутации што ја има многу заразната верзија на коронавирусот откриена во Бразил.

Научниците во студијата наведуваат дека неутрализирачката способност е приближно еднаква на нивната вакцина за претходната, помалку заразна варијанта на вирусот од минатата година.

Во претходно објавеното истражување, „Фајзер“ открива дека нивната вакцина ги неутрализира и другите заразни варијанти на вирусот, британската и јужноафриканската варијанта, иако е докажано дека јужноафриканската варијанта може да го намали нивото на антитела произведени по вакцинацијата.

Папата Франциско се врати во Ватикан по историското тридневно патување во Ирак. Тој пред новинарите изјави дека неговата средба со големиот шиитски ајатолах Али Систани била мевлем за душата.

Папата, голем поборник за директен разговор со претставници на исламот, го опиша состанокот со Систани како разговор во четири очи со скромен и мудар човек во чија близина се чувствува почестен.

„Тој никогаш не станува да поздрави посетител, но стана двапати да ме поздрави мене“, им рече папата на новинарите во авионот на пат кон Рим.

„Верувам дека ова е универзална порака“, додаде папата.

Ајатолахот Систани е највисокиот водач на шиитите, втората гранка на исламот, која е мнозинство во Ирак.

Папата нагласи дека ќе има и други чекори во дијалогот со муслиманите. Тој ги отфрли критиките на сметка на неговите потези.

„Некои критичари велат дека папата не е храбар, тој не е свесен дека прави чекори надвор од католичката доктрина и дека е на чекор од ерес. Овие одлуки се донесуваат преку молитва, во дијалог и барање совет. Тоа е размислување, не каприц“, заклучи тој.