Свет
За пет дена околу 100 жртви во Карачи
Бројот убиени во меѓуетничките судири во најголемиoт пакистански град Карачи во последните пет денови достигна 98 жртви, јавува во саботата Reuters повикувајќи се на воени извори
Притоа соговорникот на агенцијата наведува дека во престрелките се ранети околу 150 лица. Меѓу жртвите во уличните престрелки има и жени и деца.Претставник на пакистанската полиција соопштил дека само минатата ноќ биле уапсени 157 лица. Исто така, специјалните полициски сили спроведуваат и евакуација на цивилното население во безбедните реони на градот. Убиствата се случуваат во разни делови од градот. Неидентификувани вооружени лица, кои припаѓаат, според написите во локалниот печат, на спротиставени етнички и политички групи, отвораат оган врз автомобили, комбиња, па дури и автобуси од градскиот сообраќај. По големиот број убиства последниот ден, Карачи е парализиран – јавниот сообраќај не функционира, повеќето продавници се затворени, бензинските пумпи не работат, а затворени се и многу компании и образовни институции. Како резултат на тоа, жителите на Карачи во четвртокот речиси ги нападнале неколкуте отворени бензински пумпи да купат гориво. Од петокот, сите бензински пумпи се затворени и никој не знае кога тие ќе бидат повторно отворени.Во градот се ангажирани повеќе од илјада припадници на погранично-ренџерските единици од областите на пакистанскo-авганистанската граница. Властите се надеваат дека присуството на војниците ќе помогне за стабилизирање на ситуацијата.Карачи неодамна беше сцена на многу пресметки меѓу криминални групи и спротивставените политички групации и движења. На улиците на 15-милионската метропола најчесто жртви се членовите на завојуваните страни, а особено припадниците на „Авами нејшнл парти“ (Националната народна партија) којашто ги претставува Паштуните, а на спротивната страна од неа е движењето „Мутахида коми мувмент“, која ги обединува припадниците на заедниците кои го говорат урду јазикот, бегалци од Индија и нивните потомци.Чести се судирите меѓу етничките групи, чиј интензитет се зголемува од година во година. Политичките групации инаку веќе подолго време одржуваат во своите редови и вооружени парамилитантни групи.Мухаџирите (преведено од урду јазикот „бегалци“), чиишто семејства се доселиле во Карачи по поделбата на Британска Индија во 1947 година, кои ги обвинуваат Паштуните дека „организираат мафија“ и со гангстерски методи ја држат контролата врз трговијата и градежништвото во градот. Мухаџирите, исто така, се загрижени што во паштунската заедница се сé популарни идеите што ги шири радикалното исламистичко движење – талибаните. Од друга страна, Паштуните тврдат дека се дискриминирани по етничка основа, и тие не можат да добијат добра работа и да имаат нормални животни услови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ: За Словенците мислам се најдобро, но нема да им се извинувам на нивните политичари
Претседателот на Србија Александар Вучиќ денеска во Њујорк изјави дека не сака да го навреди народот на Словенија и дека го мисли најдоброто за нив, но дека нема намера да им се извинува на нивните политичари бидејќи, како што рече, водат одвратна политика.
„Реков дека Словенците се одвратни, мислејќи на седницата на Советот за безбедност. Тоа беше темата и на сите им беше јасно дека се работи за поединецот и се работи за нивната политика. Сигурно не треба да се користи вокабуларот, но јас на човечки начин кажав што мислам за нивната политика“, рече Вучиќ во обраќањето пред новинарите.
Тој додаде дека на Словенците им мисли најдобро како народ и дека има многу пријатели и роднини во Словенија.
„Ако некого сум навредил, сакам да и се извинам на целата јавност во Словенија и истовремено да кажам дека нема да им се извинувам на словенечките политичари, бидејќи тие водат одвратна политика кон Србија и српскиот народ“, рече Вучиќ.
Тој додаде дека неговата изјава е извадена од контекст и е оценета како нешто „страшно“, но дека нарушувањето на територијалниот интегритет на Србија не е оценето како „страшно“.
„Не е страшно што ја спонзорираат резолуцијата за Сребреница против нашиот народ, без претходно да не консултираат, да не информираат или да не прашаат. Ја користам можноста да ги поканам, премиерот на Словенија, Роберт Голоб и претседателката на Словенија Наташа Пирц Мусар во Белград и Србија. Дефинитивно треба уште еднаш да се извинам, да укажам дека секако не мислев на Словенците, туку да им кажам в лице што мислам за нивната лоша политика кон Србија и српскиот народ“, заклучи Вучиќ.
Свет
Кулеба: Неприфатливо е Украинците надвор од државата да седат во ресторани, додека други умираат
Министерот за надворешни работи на Украина со ентузијазам ги пофали американските политичари за одобрувањето на долго одложуваниот пакет воена помош од 61 милијарда долари за Украина, но предупреди дека новите испораки нема веднаш да го свртат бранот на војната.
„Алелуја“, изјави Дмитро Кулеба во интервју за „Гардијан“, запрашан за реакцијата на гласањето на американскиот Сенат во вторникот. Тој рече дека „неговото верување е дека ќе има позитивен исход“, но Западот мора „да сфати дека ерата на мирот во Европа е завршена“ и да ја изгради својата одбранбена индустрија.
Во интервју за „Гардијан“, Кулеба рече дека се надева оти Белата куќа ќе претстави нов пакет оружје „за неколку дена, можеби дури и часови“ и дека е „само прашање на логистика“ да се префрлат залихите на линија на фронтот.
Претставници на Пентагон најавија дека одредена муниција веќе е складирана во Европа, а се очекува меѓу приоритетите да бидат артилериската и противвоздушната одбрана.
Кулеба, исто така, рече дека Украина идентификувала седум системи за воздушна одбрана „Патриот“ кои би можела да ги користи за заштита на цивилите во поголемите градови надвор од Киев.
Тој исто така додаде дека украинскиот претседател Володимир Зеленски разговарал со Џо Бајден за воената помош во понеделникот. Кулеба рече дека сојузниците на Украина треба да се префрлат од „изразување сочувство на Украинците и ветување помош за закрепнување за да се спречи загубата на животи и уништувањето на земјата“.
Тој рече дека враќањето на американската воена помош, која со месеци ја задржуваат републиканците кои се усогласени со Доналд Трамп, нема да биде доволно за да се победи Русија. „Ниту еден пакет не може да ги запре Русите. Она што ќе ги спречи Русите е обединет фронт на цела Украина и сите нејзини партнери“.
Кулеба рече дека Западот треба да го зголеми своето производство на оружје, како што направи Украина, бидејќи Русија го престигна. „Русија ја надминува Украина со околу 10 спрема еден, додека Украина е без воздушна одбрана.
Кога гледам што постигна Русија во изградбата на одбранбена индустриска база за две години војна и што постигна Западот, мислам дека нешто не е во ред со Западот“, рече Кулеба. „Западот мора да разбере дека ерата на мирот во Европа е завршена.
Врвот на воено-индустриското производство на сојузниците на Украина не се очекува до крајот на 2024 година“, рече шефот на дипломатијата, посочувајќи дека Киев предвидува дека војната ќе продолжи и следната година. Се очекува Русија да започне летна офанзива и се верува дека е во процес на мобилизирање на дополнителни 100.000 војници за борбата.
„Не знам што ќе се случи утре или како ќе се однесуваат политичките елити во САД. Она што го научивме од првиот претседателски мандат на Доналд Трамп е дека има излез од секоја криза“, рече тој.
Кулеба рече дека одлуката за откажување на конзуларните услуги за украинските мажи на борбена возраст кои живеат во странство, објавена во вторникот, е праведна бидејќи „момчињата во рововите се многу уморни“.
„Тие не разбираат зошто владата не се обидува да привлече повеќе луѓе во воените напори“, рече тој. Кулеба рече дека не е јасно колку Украинци ќе се вратат, но неприфатливо е оние надвор од земјата да „седат во ресторани“, додека други умираат.
„Мислам дека на крајот на оваа војна само едната страна ќе преживее, а тоа ќе биде Украина. Но, кога велам преживее, не мислам дека Русија ќе престане да постои како земја“, вели тој.
Свет
Русија и Украина договорија размена на децата одвоени од нивните семејства за време на војната
Руската комесарка за правата на децата Марија Лвова-Белова денеска изјави дека Русија и Украина се договориле за размена на децата кои биле одвоени од нивните родители за време на конфликтот меѓу двете земји.
Преговорите за размената се водеа со посредство на Катар, при што беше договорено Москва да прими 19 деца и 29 од нив да испрати во Украина, пишува РТ.
Белова изјавила дека владата на Катар го следи списокот на деца кои ќе бидат разменети, како и дека ова е прво преговарање во живо меѓу Москва и Киев од почетокот на војната, пренесува Танјуг.