Свет
Од палатата на Гадафи украдени златни пиштоли
Локалното население ја ограбило резиденцијата на либискиот водач полковникот Моамер ел-Гадафи, пред во неа да навлезат припадниците на силите на бунтовниците
Локалното население ја ограбило резиденцијата на либискиот водач полковникот Моамер ел-Гадафи, пред во неа да навлезат припадниците на силите на бунтовниците. Од палатата биле однесени позлатени пиштоли, остен за добиток, па дури и медицинската евиденција за членовите на семејството на Гадафи, пишува денеска New York Times. Паравоените единици им се приклучија на бунтовниците во Триполи во ноќта на 21 август. Денеска западните медиуми јавија дека единиците на бунтовниците успеале да продрат во утврдената резиденција на полковникот Моамер ел-Гадафи во населбата Баб ал-Азизја, при што бил скршен отпорот од страна на единиците лојални на либискиот лидер.Според New York Times, групи ограбувачи навлегле во резиденцијата, кога сé уште не биле завршени борбите меѓу бунтовниците и владините трупи. По пребарувањето на резиденцијата, „среќниците“ гордо на новинарите им ги покажале позлатените пиштоли и кутии од марката „Берета“, омиленото оружје на Џејмс Бонд. Многумина од резиденцијата на Гадафи, исто така, изнесувале остени за добиток. Во Либија, како и во многу други земји во арапскиот свет, огромна популарност имаат трките со камили, и дел од приборот за овој вид спорт често претставуваат вистински скапоцени уметнички дела. Покрај тоа, остенот често е земен како форма при камуфлирањето на електро-шок палките, што, според западните медиуми, либиската полиција ги употребувала за растерување на мирните демонстранти. Еден од ограбувачите, Хишам ал-Винди, земал трофејна воена шапка, за која вели дека лично му припаѓала на Гадафи. „Ова капа ја знае целиот свет“, гордо изјавил ал-Винди. Разграбувањето на палатата на Гадафи почна да личи на личи на шоу, кога ограбувачи почнаа да се тетерават под еден предмет кој ја отсликуваше ексцентричноста на полковникот Гадафи – електромобил за голф, со кој според некои информации, тој го обиколувал својот имот со површина од неколку хектари. Можеби еден од најневообичаените „сувенир“ кои се однесени од резиденцијата е оној до кој се дошол локалниот жител Сидик Руџбани, картотека, којашто како што тој ги убедувал новинарите, ја претставува медицинската евиденција за членовите на семејството Гадафи. Инаку, повеќето „гости“ во резиденцијата во Баб аз-Азизија, преферирале да земат од палатата на Гадафи телевизори со рамен екран и други современи домашни апарати кои се вистинска реткост во Либија. Експертите истакнуваат дека предметите украдени од палатата на Гадафи може да достигнат голема вредност на црните пазари. Според репортажите на странските телевизиски станици и информациите на новинарите, се добива впечатокот оти либиската престолнина којашто е речиси 90 проценти освоена од бунтовниците, е зафатена од хаос и безредие, а има многу сведоштва за грабежи. Според јужнокорејската новинска агенција Yonhap, група ограбувачи синоќа од амбасадата на Јужна Кореја во Триполи, одземале телевизори и друга техника. Претходно денеска беше објавено дека Моамер ел-Гадафи наводно тајно престојувал во Триполи, и заклучил дека ситуацијата во Триполи не е опасна. „Јас не почувствував дека Триполи е во опасност“, ги цитира Reuters зборовите од аудио пораката на Гадафи/крај/нт/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.