Свет
Интересите ги побиваат доказите
Али Ахмети ќе добие доживотна казна затвор ако македонските власти ги спроведат законите во постапката против него за случајот „Киднапирани Македонци“, тврди Ванчо Шехтански, адвокат на родните на киднапираните.
Емил Зафировски
Али Ахмети ќе добие доживотна казна затвор ако македонските власти ги спроведат законите во постапката против него за случајот „Киднапирани Македонци“, тврди Ванчо Шехтански, адвокат на родните на киднапираните. Шехтански тврди дека се обезбедени сите докази и дека никој не може да го забошоти случајот.
Ѓорги Марјановиќ, пак, професор на Правниот факултет и експерт за кривично право, тврди дека случајот нема да има разрешница и покрај тоа што станува збор за тешки воени злосторства врз цивилно население. Тој смета дека политичките интереси нема да дозволат владеење на правото и на законите.
Според адвокатот Шехтански, Хашкиот трибунал сторил добра работа што не го отфрлил обвинението.
– Не дека сакаше така да постапи, туку Хашкиот трибунал едноставно беше принуден да не го затвора предметот. На 15 март годинава Тетовскиот суд ги прогласи за починати од насилна смрт. Хаг намерно не спроведуваше истрага, туку чекаше да измине рокот за да не покрене обвинение и да се откачи од предметот. Ако Хаг го затвореше случајот, матичната држава немаше да има право да покрене постапка – вели Шехтански.
Тој тврди дека водството на ОНА нема да може да се ослободи од одговорноста за смртта на 12-те Македонци.
– Роднините не се откажуваат од правдата. Главниот удар ќе биде насочен кон раководството на ОНА, поточно кон Али Ахмети и Даут Реџепи – Лека. Обезбедени се сите докази. Има изјави на 20 сведоци. Постојат извештаи на меѓународните тимови што работеа на случајот. Единствена пречка ќе бидат политичките интереси, но, сепак, Ахмети и Лека нема каде да бегаат – вели Шехтански.
Професорот Марјановиќ вели дека е повеќе од јасно оти станува збор за воени злосторства, но тврди дека нема да има обвинение спрема раководството на ОНА.
– Треба да бидеме реални. За жал, во Македонија не владее правото, туку политичките интереси. И покрај сите факти, докази и сведоци, нема теоретски шанси јавниот обвинител Александар Прчевски да покрене обвинение против Али Ахмети, затоа што тој му е партнер во власта на премиерот Владо Бучковски. Се друго освен овој факт се сведува на изреката „што би било кога би било“ – вели Марјановиќ.
Високи дипломатски извори вчера изјавија дека по формалното враќање на четирите предмети од Хаг, македонското обвинителство најверојатно ќе отвори постапки само за два предмети, за случаите „Киднапирани Македонци“ и „Малтретирани работници на ГП „Маврово“. Тие велат дека за случајот со затворањето на браната Липково нема доволно докази за делото, а за случајот со убиството на двајцата работници на мотелот Бриони сторителите се непознати.
Хашкото обвинителство во декември лани ја прекина постапката за сите случаи освен за „Љуботен“, каде што за воени злосторства се обвинети само Македонци. Ниту еден Албанец не е обвинет од Хашкиот трибунал и покрај најавите дека случаите каде што се вмешани Албанци и Македонци ќе се водат паралелно.
Летото во 2001 година 12 Македонци од Тетовско беа киднапирани на автопатот Тетово – Јажинце. Повеќе од три години нивната судбина беше неизвесна, а лани се утврди дека тие биле убиени.
ВМРО-ДПМНЕ: Власта е виновна што Хаг ги врати предметите
ВМРО-ДПМНЕ вчера ја обвини актуелната власт дека е виновна што Хашкиот трибунал ги вратил четирите предмети назад во земјава.
– Најодговорни за тоа се министерката за правда, Мери Младеновска, јавниот обвинител Александар Прчевски и Дане Илиев, претседателот на Врховниот суд. Хашкиот суд ја задолжил државата во рок од девет месеци да го процесуира случајот со работниците на ГП „Маврово“ пред трибуналот, но тоа не било сторено – изјави Александар Бичиклиски, портпарол на ВМРО- ДПМНЕ
Партијата бара и очекува од обвинителството да преземе итни истражни дејства за овие случаи, исто како што сторило за случајот „Раштански Лозја“.
СДСМ ќе ја поддржи одлуката на Обвинителството
Одлуката за евентуална постапка треба да ја донесат надлежните институции на системот, и тоа самостојно.
– Ние целосно ги поддржуваме во тоа. Каква ќе биде судбината за овие случаи ќе проценат надлежните органи. Недозволиво е политичарите да даваат оцени во фаза кога случајот е високоисполитизиран од одредени партии за дневнополитички поени – вели Борис Кондарко, портпарол на СДСМ.
ДУИ: Ако се отворат предметите, ќе влеземе во лавиринт
Владејачката ДУИ смета дека предметите што Хаг ги вратил биле опфатени со Законот за амнестија и немало потреба од постапка за нив.
Со тоа што Хаг ги враќа случаите се потврдува дека немале аргументи или дека не се подготвени понатаму да се суди. Случаите се опфатени со Законот за амнестија. Но, ако случајно се отвори постапка за нив, Македонија ќе влезе во лавиринт и тешко дека ќе може да излезе – вели Абдулаким Адеми, пратеник на ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Свет
Шефот на НАТО: Никој нема корист од војната на Блискиот Исток
Генералниот секретар на НАТО Јенс Столтенберг изрази загриженост за ситуацијата на Блискиот Исток по израелскиот напад врз Иран.
„Клучно е конфликтот да не излезе од контрола и затоа ги повикуваме сите страни на воздржаност“, изјави Столтенберг денеска во Брисел. „Никој нема корист од војната на Блискиот Исток“, рече тој.
Израел го нападна иранскиот Исфахан
Според извештаите на медиумите, Израел ја нападнал иранската провинција Исфахан рано во петокот како одговор на големиот ирански напад со беспилотни летала и ракети минатиот викенд.
Според израелскиот весник Jerusalem Post, нападот бил насочен кон воздушна база во Исфахан, недалеку од иранските нуклеарни постројки. Сепак, според Меѓународната агенција за атомска енергија (МААЕ), нуклеарните капацитети не биле погодени.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.